विद्यार्थीलाई सवारी (लिण्डे) साग टिप्न चटारो
हिमाली जिल्ला डोल्पाको त्रिपुराकोटका खेतका गडाहरुमा शनिबारको दिन बालबालिकाहरू साग टिप्न व्यस्त देखिए ।
कोहलपुर–सुर्खेत सडक दुई लेन बनाइँदै
कोहलपुर–सुर्खेत सडक खण्ड दुई लेनमा विस्तार हुने भएको छ । निर्माण भएको लामो समय सम्म पनि स्तरोन्नति हुन नसकेको रत्नराज मार्गको क्षेत्र निर्धारण र कार्यसूची (टिओआर) स्वीकृत भएसँग वातावरणीय प्रभाव मूल्याङ्कन (इआईए) अन्तिम चरणमा पुगेको हो ।
सडक बनेको दुई वर्ष नपुग्दै मर्मत
जाजरकोटमा दुई वर्ष नबित्दै सडक मर्मत गर्न थालिएको छ। भेरी नगरपालिका–४, रामजानकी टोलदेखि भेलहाले मूल सडक जोड्ने सडक प्राविधिकको गलत स्टिमेटका कारण पुनः मर्मत गर्नु परेको बताइएको छ।
खानेपानीको अभावले सार्छ बसाइँ
पश्चिम सुर्खेतको चौकुने गाउँपालिका–५, रेक्चामा खानेपानीको चरम अभाव भएपछि सर्वसाधारण बस्ती नै छोडेर बेँसी तथा अन्यत्र बसाइँ सरिरहेका छन्। पानीको कुनै मुहान नहुनु र भएको पनि गर्मी नलाग्दै सुकेपछि त्यहाँका बासिन्दा बर्सेनि बसाइँ सरिरहेका छन्। पाँच वर्षअघिसम्म सो ठाउँमा करिब ११५ घरधुरी थिए, अहिले ८० घरधुरी छन्। घरधुरी घट्नुको मुख्य कारण नै खानेपानीको अभाव हो। स्थानीय बासिन्दा जितन बीसीले सो ठाउँमा चार/पाँच वर्षको अवधिमा ३५ घरधुरी खानेपानीकै कारण बसाइँ सरेको बताउनुभयो। रेक्चामा रेक्चा, खाडगाडी, हाडकाँध, खेल र ढुङ्गालोटे बस्ती पर्छ। यी बस्तीबाट प्रत्येक वर्ष कुनै नै कुनै परिवार बसाइँ सरिरहेको उहाँले जनाउनुभयो।
वडाका बालबालिका विद्यालयभित्रै
यहाँको हिमा गाउँपालिका–५ मा सबै बालबालिका विद्यालयको पहुँचमा पुगेका छन्। वडाले घरधुरी सर्वेक्षण गरेर सबै घरमा रहेका बालबालिका विद्यालयको पहुँचमा पुगेका र कोही पनि पढ्ने उमेरका बालबालिका विद्यालयबाहिर नरहेको भन्दै ‘विद्यालयबाहिर बालबालिकाविहीन वडा’ घोषणा गरेको हो।
साढे सोह्र हजार पशुपन्छीलाई खोप
सिमकोट गाउँपालिकामा साढे १६ हजारभन्दा बढी पशुपन्छीको उपचार गरिएको छ । आठवटै वडामा एक महिनासम्म सञ्चालन गरेको बृहत् खोप कार्यक्रमबाट पशुबस्तुलाई खोप लगाउनुका साथै विभिन्न रोगको उपचार गरिएको हो । गाउँपालिका पशु स्वास्थ्य शाखाका प्राविधिक विष्णु बुमीले एक महिनासम्म सञ्चालन भएको शिविरबाट पशु, कुखुरा र कुकुर गरी १६ हजार ७४० वटालाई खोप लगाएको जानकारी दिनुभयो । यति धेरै परिणाममा पशुपन्छीलाई खोप लगाएको यो पहिलो पटक हो ।
नागरिकको मन जित्दै स्थानीय सरकार
स्थानीय सरकारले सेवामार्फत नागरिकको मन जित्न नसकिरहेको आरोप लागिरहेका बेला जिल्लाका केही स्थानीय सरकारले नागरिकको मन जित्ने प्रयास गरेका छन् ।
स्ववियु सभापतिको लागि जुम्लामा पाँच प्रतिस्पर्धी
चैत्र ५ गते त्रिभुवन विश्वविद्यालयको स्वतन्त्र विद्यार्थी युनियनको निर्वाचनको लागि जुम्ला बहुमुखी क्याम्पसले सबै तयारी पूरा गरेको छ ।
खाद्यान्न रासनबारे अध्ययन गर्न समिति गठन
खाद्य व्यवस्था तथा व्यापार कम्पनी लिमिटेडको शाखा कार्यालय सिमकोटले बिक्री गर्दैआएको रासन कार्डका उल्लेख गरिएको परिवार सङ्ख्या यकिन गर्न समिति गठन गरेको छ ।
आयात रोक्न नसक्नु नेपालको कमजोरी
विप्लव नेतृत्वको नेपाल कम्युनिष्ट पार्टी (नेकपा) का स्थायी समिति सदस्य सन्तोष बुढा मगरले नुनदेखि सुनसम्म आयातमा भरपर्दा मुलुक गरिबीको दलदलमा फसेको बताउनुभएको छ ।
आँखा नदेख्ने बिरामी युवाको बिचल्ली
बिरामी आँखा नदेख्ने एक युवा उपचार पाउनु त परकै कुरा उहाँ गोठमा बस्न बाध्य छ । सिमकोट गाउँपालिका –२ को ठेहे गाउँका २७ वर्षीय नरेन्द्र बोहरा आँखा नदेख्ने र हिँडडुल गर्न नसक्ने भएपछि उहाँलाई परिवारलाई उपचार गर्न नसक्ने भन्दै गोठमा राख्दै आएको छ ।
कर्मचारीले असहयोग गरेको आरोप
गुठीचौर गाउँपालिका अध्यक्ष दानबहादुर बुढाले विद्यालयमा स्वयंसेवक शिक्षक कार्यक्रम कार्यान्वयन गर्ने कार्यमा कार्यपालिका सदस्य र प्रमुख प्रशासकीय अधिकृतले असहयोग गरेको आरोप लगाउनुभएको छ। अध्यक्ष बुढाले पत्रकार सम्मेलन गरी १२ औँ गाउँ सभाले पारित गरेको शिक्षण सिकाइ अनुदानमा कोटामा स्वयंसेवक शिक्षक नियुक्ति गर्ने कार्यमा अवरोध गरिएको बताउनुभयो। अध्यक्ष बुढाका अनुसार सो प्रयोजनका लागि कार्यविधि–२०७९ समेत पारित गरी सो कार्यविधिअनुसार पदपूर्तिसम्बन्धी व्यवस्थालाई आन्तरिक मामिलाका रायसहित १३औँ हिउँदे सभामा समेत अनुमोदन गरिएको छ। यद्यपि सो कार्यक्रम कार्यान्वयन गर्न प्रशासकीय अधिकृतले आनाकानी गरेको आरोप अध्यक्ष बुढाको छ।
एमाले हुम्लाको 'ग्रासरुट' अभियानको पहिलो चरण सकियाे
नेकपा एमालेले हाल सञ्चालनमा रहेको सङ्गठन सुदृढीकरणका लागि मिसन ग्रासरुट अभियानको पहिलो चरण सम्पन्न भएको छ ।
कर्णाली कोरिडोर सडक अनिश्चित काललाई बन्द हुने
कर्णाली कोरिडोरको सिमकोट हिल्सा सडक खण्डको च्याछरा क्षेत्रको सडक अनिश्चित कालका लागि बन्द हुने भएको छ । च्याछरादेखि पातीहाल्नसम्मको सडकको स्तरबृद्धि हुने भएको कारण सडक बन्द हुने भएको हो ।
औद्योगिक ग्राम बनाउने योजना अलपत्र
कर्णालीका १० जिल्लामा औद्योगिक ग्राम बनाउने योजना अलपत्र परेको छ । आर्थिक वर्ष २०७६ र ०७७ मा केन्द्र सरकारले एक स्थानीय तह एक औद्योगिक ग्राम स्थापना गरी सञ्चालनमा ल्याउने योजनासहित औद्योगिक ग्राम बनाउने घोषणा गरेको थियो ।
लिमीलगायत उच्च स्थानमा हिमपात
हिमाली जिल्ला हुम्लाका उच्च स्थानका साथै लिमीमा हिमपात भएको छ । बिहीबार बिहानैबाट मौसम बदली भएपछि दिउँसोबाट हिमपात सुरु भएको हो ।
पुलको निर्माणकार्य कछुवा गतिमा
क्याराभान कन्स्ट्रक्सनले काम नै शुरु नगरी दुई वर्षदेखि त्रिवेणीमा अलपत्र पक्की पुलको निर्माणकार्य सुरु गरेको छ । तर काम कछुवा गतिमा भइरहेको छ । जगदुल्ला जलविद्युत कम्पनी लिमिटेले भेरी करिडोर अन्तर्गत भेरी नदीमा पुल निर्माण गर्न क्याराभान कन्स्ट्रक्सनलाई टेण्डरमार्फत कामको जिम्मा दिएको थियो ।
माटोको छाना हटाउन जस्तापाता सहयोग
हुम्ला समाचारदाता हुम्ला, चैत २ गते । माटोले घरको छाना छाएका न्यून आयस्राेत भएका घरधुरीलाई निःशुल्क जस्तापाता सहयोग गरिएको छ । सुरक्षित नागरिक आवास कार्यक्रम अन्तर्गत लक्षित वर्गका घरधुरीलाई जस्तापाता सहयोग गरिएको हो । खार्पुनाथ गाउँपालिका–५ को ताक्ला गाउँका खड्क बुमीले अनुदानमा जस्तापाता पाएको बताउनुभयो । यसअघि उहाँको घरको छाना माटो र काठले छाएको थियो । उहाँले जस्तापाताले घरको छानो छाएपछि बर्खायाममा पानी चुहिने समस्या र हिउँदमा हिउँ फाल्ने कार्यबाट छुटकारा मिलेको बताउनुुभयो । उहाँले समस्याबाट छुटकारा पाउनुुका साथै सुरक्षित घरमा बस्न पाएको बताउनुभयो । उक्त गाउँबाट बुमी छनाेट हुनुभएको थियो । केही घरधुरीले भने खर र काठले छाउनु भएको थियो । जस्तापाता पाएपछि ती छाना हटाउने कार्य सुरु भएको छ ।उक्त वडाका सदस्य भरतजङ्ग शाहीले सङ्घीय सरकार अन्तर्गतको सघन सहरी विकास कार्यक्रमको आर्थिक सहयोगमा खार्पुनाथ गाउँपालिकाका पाँच वडाका ७२ घरधुरीलाई जस्तापाता निःशुल्क उपलब्ध गराइएको बताउनुभयो । उहाँले सुरक्षित नागरिक आवास कार्यक्रमले तीन वर्ष लगाएर यी जस्तापाता वितरण गरिएको र अन्तिम वितरण कार्य यतिबेला भएको बताउनुभयो । उहाँले जस्तापाता पाएका घरधुरीमध्ये ६५ प्रतिशत घरधुरीले माटोको छाना हटाएर जस्ता छाएको र बाँकीले छाउने कार्य गरिरहेको बताउनुुभयो । जस्तापाता अनुदानमा पाए पनि अन्य काम भने घरधनी आफैँले गरिरहनुभएको छ । उहाँले लक्षित वर्गका नागरिकले सुरक्षित आवासमा बस्न पाउने कार्यको थालनी भएको बताउनुभयो ।
शववाहन खरिद गर्दै स्थानीय सरकार
स्थानीय तहले पछिल्लो समय धमाधम एम्बुलेन्स र शववाहन खरिद गर्न थालेका छन्। स्थानीय आवश्यकतालाई ध्यानमा राखेर एम्बुलेन्स र शववाहन खरिद गरिएको जनप्रतिनिधि बताउँछन्। पश्चिम सुर्खेतको चौकुने गाउँपालिकाले दुईवटा एम्बुलेन्स खरिद गरी सञ्चालनमा ल्याएको छ। गाउँपालिकाका अध्यक्ष खड्क विकका अनुसार पालिकाले थप अर्को एम्बुलेन्स खरिद प्रक्रिया अघि बढाएको छ। गर्भवती तथा सुत्केरी महिलाका लागि पालिकाले निःशुल्क एम्बुलेन्स सेवा दिने गरेको छ।
प्रदेश अस्पताल सुविधासम्पन्न बनाइँदै
कर्णाली प्रदेश अस्पताललाई थप सुविधासम्पन्न बनाउन लागिएको छ। प्रदेश अस्पतालका निर्देशक डा. डम्बर खड्काका अनुसार अस्पताललाई पाँच सय शय्याको बनाउने गरी भवनको तला थप गर्न लागिएको छ। तला थप गर्नका लागि प्रदेश सरकारले करिब डेढ अर्ब बजेट र आगामी तीन वर्षमा निर्माण गरिसक्ने गरी काम अघि बढाउन लागिएको निर्देशक डा. खड्काले जानकारी दिनुभयो।
अत्याधुनिक भवनबाट सेवा सुरु
सुर्खेत जिल्ला प्रशासन कार्यालयको आफ्नै आधुनिक भवन निर्माण भएको छ। मङ्गलबार गृहसचिव विनोदप्रकाश सिंहले प्रशासनको नयाँ आधुनिक भवनको उद्घाटन गर्नुभयो। गृहसचिव सिंहले नयाँ भवनबाट सेवाग्राहीलाई सेवा दिन सहज र गुणस्तरीय हुने बताउनुभयो। उहाँले जसरी भवन निर्माणको काम तोकिएको अवधिभन्दा छिटो भयो, त्यसैगरी सेवाग्राहीलाई पनि छिटो सेवा प्रदान गरेर सरकारी कार्यालयप्रति थप विश्वास जगाउनुपर्ने सुझाव दिनुभयो।
सडक निर्माणमा ढिलासुस्ती
नारायण नगरपालिकाको मुख्य सडक क्षेत्र निर्माणमा ढिलाइ भएको छ। पुरानो बजारदेखि गणेश चोकसम्म मुख्य सडक क्षेत्रमा नालासहित सडक स्तरोन्नति गर्न ढिलाइ हुँदा पैदल यात्रुलाई समेत समस्या भएको छ। कामको मूल्याङ्कनका आधारमा भुक्तानी दिने गरी नगरपालिकाले एक करोड १२ लाख बजेट विनियोजन गरेको थियो। सो कामको ठेक्का एसआरपी ग्रुप कन्स्ट्रक्सनले पाएको थियो। सो कम्पनीले मुख्य बजार क्षेत्र पुरानो बजार, देवकोटा चोक हुँदै गणेश चोक जाने सडकका विभिन्न ठाउँमा भत्काएर अलपत्र पारेको छ। सडक निर्माण अलपत्र पर्दा मुख्य बजार क्षेत्रको ट्राफिक व्यवस्थापन अस्तव्यस्त बनेको छ। पैदल यात्रुलाई आवतजावतमा समस्या परेको बताइन्छ। नाला भत्काइँदा दुर्गन्ध, धुलो, धुवाँले समेत स्थानीय पीडित छन्।
२० वर्षपछि विवाह गरे १० हजार पुरस्कार
कालीकोटको शुभकालिका गाउँपालिका -७ ले उमेर पुगेर विवाह गर्ने युवायुवतीलाई जनही दश हजार पुरस्कार दिने निर्णय गरेको छ ।
स्थलगत अनुगमनपछि सडक निर्माण कार्य सुचारु
गाउँपालिका अध्यक्षको टोली स्थलगत रूपमा अनुगमनमा गएपछि रोकिएको सडकको निर्माण कार्य सुचारु भएको छ ।
घाँटी रेटिएको अवस्थामा पुरुष मृत फेला
घाँटी रेटिएको अवस्थामा सुर्खेतमा एक पुरुषको शव फेला परेको छ । वीरेन्द्रनगर नगरपालिका–१० बुदबुदेमा हिजो (मङ्गलबार) अपराह्न ५ बजे मृत भेटिएको जिल्ला प्रहरी कार्यालय सुर्खेतले जनाएको छ ।
