गोरखापत्र अनलाइन
प्रविधिसँगै अघि बढे स्मार्ट गोरखापत्रको यात्रा सफल हुन्छ : अध्यक्ष सुवेदी
गोदावरी, ललितपुर, जेठ १३ गते। गोरखापत्र संस्थानका कार्यकारी अध्यक्ष विष्णुप्रसाद सुवेदीले प्रविधिको गति र समयको मागअनुसार अघि बढे स्मार्ट गोरखापत्रको यात्रा सफल हुने बताउनुभएको छ। ललितपुरको गोदावरीमा शुक्रबार आयोजित दुई दिने नेतृत्व र सकारात्मक सोचको अभ्यास विषयक कार्यशालामा बोल्दै अध्यक्ष सुवेदीले यस्तो बताउनुभएको हो। संस्थानमा कार्यरत विभागीय प्रमुख तथा शाखा प्रमुखका लागि कार्यशाला आयोजना गरिएको हो।गोरखापत्रको शक्ति र पूँजी भनेको पाठक भएको उल्लेख गर्नुहुँदै अध्यक्ष सुवेदीले पाठकको अभिरुचि अनुसार सामग्री पस्कनुपर्ने, संस्थानको जनशक्तिले काम गर्ने प्रणाली र प्रक्रियालाई पनि स्मार्ट बनाउनुपर्नेमा जोड दिनुभयो। “गोरखापत्रसँग १२२ वर्षको गौरवमय इतिहास छ, सिंगो युगको प्रतिनिधित्व छ, सभ्यता र संस्कृति बोकेको छ। तर, आधुनिक संसारको डिजिटल गतिसँग हामी हिँड्न सकेका छैनौं”, उहाँले भन्नुभयो, ‘‘अब हामीले डिजिटलको गतिसँगै अघि बढ्नुपर्छ, आफ्नो क्षमता र अनुभवलाई स्मार्ट गोरखापत्रको यात्रामा सदुपयोग गर्नुपर्छ।” संस्थानका महाप्रबन्धक लालबहादुर ऐरीले परिणाम देखिने गरी काम गर्न विभागीय प्रमुख तथा शाखा प्रमुखलाई आग्रह गर्नुभयो। पेशागत आचरण, अनुशासन र संस्थानप्रतिको इमान्दारिता जरुरी रहेको भन्दै उहाँले सकारात्मक सोच र समूहगत भावनाका साथ अघि बढ्नुपर्नेमा जोड दिनुभयो। गोरखापत्र संस्थानका कर्मचारी प्रशासन प्रमुख बिक्रमबाबु राईले कार्यशालाको उद्देश्यबारे चर्चा गर्दै यहाँ सिकेका ज्ञानलाई व्यवहारमा लागू गरेर परिवर्तनको सन्देश दिन सकिने उल्लेख गर्नुभयो। कार्यक्रममा रमण भट्टराईले समय र तनाव व्यवस्थापन तथा सामूहिक कार्यका बारेमा प्रस्तुति दिनुभएको थियो। शुक्रबार ललितपुरको गोदावरीमा सुरु भएको कार्यशाला शानिवारसम्म चल्नेछ।
होमस्टे सञ्चालनमा उत्साहित कैलालीका कठरिया समुदाय
चाँदनी आचार्यघोडाघोडी (कैलाली), जेठ १३ गते । कैलालीका कठरिया थारु समुदाय आफ्नो पहिचान झल्काउने होमस्टे (घरबास) सञ्चालनका लागि हौसिएका छन् । जिल्लाको घोडाघोडी नगरपालिका–११ तप्पा गाउँका कठरिया समुदायका युवायुवती होमस्टे सञ्चालनमा उत्साहित भएका हुन् । शुक्रबार संस्कृति पर्यटन तथा नागरिक उड्यन मन्त्रालय तारा गाउँ विकास समितिको आयोजनामा होमस्टे सम्बन्धी जनचेतनामुलक कार्यक्रममा सहभागी उहाँहरुले होमस्टेको महत्व बुझेपछि आफ्नो ठाउँको विकास र कठरिया समुदायको सांस्कृतिक पहिचान सामाजिक विकासमा सामुदायिक होमस्टे सञ्चालनका लागि एकजुट भएर लाग्ने बताउनुभएको छ । गाउँका युवा सरद कठरियाले होमस्टे बारेमा सुनेको भएपनि त्यसको उद्देश्य थाहा नभएको बताउँदै जनचेतनामुलक कार्यक्रमबाट धेरैकुरा बुझ्न पाएको बताउनुभयो । उहाँले भन्नुभयो ‘तप्पा गाउँमा रहेको १४० घर सबै कठरिया समुदायको छ, हामीले आफ्नो कला संस्कृतिलाई चिनाउने अवसर होमस्टेबाट गर्नसक्ने रहेछौं ।’ सरद मात्र होईन सो गाउँका धेरै युवादेखि बयस्कसम्म होमस्टे सञ्चालनमा उत्साहित भएको बताउनुभयो । आफ्नो समुदायको कला संस्कृति, रीतिरिवाजसहितको पहिचान खोजिरहेको अवस्थामा होमस्टे सञ्चालन कठरिया समुदायका लागि एउटा अवसर हुने स्थानीय युवा टिआर कठरियाले बताउनुभयो । उहाँले भन्नुभयो ‘होमस्टे सञ्चालनबाट हामीले आफ्नो कला संस्कृति चिनाउन पाउने छौ्ं, कठरिया समुदायको पहिचानको प्रचारप्रसार समेत हुनेछ ।’भलभन्सा भोजप्रसाद कठरियाले बाहिरका मानिसलाई आफ्नो चालचलन अनुसार जे जे खानेकुरा छ बनाएर खुवाउन र आफ्नो सांस्कृतिक पहिचान देखाउन होमस्टे राम्रो माध्यम बन्ने बताउनुभयो । ग्रामीण पर्यटन विकासका लागि होमस्टेको महत्वरहेको बताउदै तारागाउँ विकास समितिका सदस्यसचिव मदनगोपाल बानियाले कठरिया समुदाय रहेको तप्पा गाउँमा होमस्टे सञ्चालनमा आए कठरिया समुदायको कला संस्कृतिको संरक्षण हुने विश्वास व्यक्त गर्नुभयो ।पहलमानुपुर बजारदेखि दक्षिण लालबोजी सडकखण्डमा पर्ने तप्पा गाउँमा होमस्टे सञ्चालन आएपछि त्यस क्षेत्रको ग्रामीण पर्यटन विकास हुने समेत अपेक्षा गरिएको छ । होमस्टे सञ्चालनक लागि तारा गाउँ विकास समितिले एक दशक्देखि सहयोग गर्दैआएको छ । होमस्टे सञ्चालनका लागि समितिले सामुदायिक भवन निर्माण, सांस्कृतिक संग्रालय, पाहुनाको स्वागत सत्कार र ग्रामिण पर्यटनको बजारिकरणमा सहयोग गर्दैआएको सदस्यसचिव बानियाले बताउनुभयो ।तप्पा गाउँमा होमस्टे सञ्चालनका लागि लामो समयदेखि पर्यटन व्यवसायी डबल शाहले पहल गर्नुभएको थियो । पर्यटन व्यवसायी शाहले कैलालीमा ६० गाउँ कठरिया समुदायको रहेको जनाउँदै तप्पा होमस्टेले पर्यटन विकासका लागि कनेक्टिभिटीको कामगर्ने विश्वास व्यक्त गर्नुभयो । शाहले कठरिया समुदायलाई नजिकबाट बुझेको बताउँदै भन्नुभयो ‘कठरिया समुदायको कला संस्कृति अत्यन्त राम्रो छ, पहिचान र संस्कृति जोगाउन हामस्टेले मद्दत गर्छ, गाउँको सरसफाई, आर्थिक आय आर्जन, सामाजिक विकासमा पनि सहयोग पुग्छ । साथै पर्यटन विकासमा कनेक्टीभिटिको समेत काम गर्छ ।’होमस्टे सञ्चालनका लागि तारागाउँ विकास समितिका प्रशिक्षक घनश्याम ढकालले हाल नेपालमा पाँच हजार हाराहारीमा निजी तथा तीन हजार पाँचसय सामुदायिक होमस्टे (घरबास) सञ्चालनमा रहेको जानकारी दिनुभयो ।
सञ्चारमाध्यमको सहयोगले निर्वाचन सोचेभन्दा सफल रह्योः आयुक्त तुलाधर
काठमाडौं, जेठ १३ गते । निर्वाचन आयोगका आयुक्त डा. जानकीकुमारी तुलाधरले गत वैशाख ३० गते भएको स्थानीय तह सदस्य निर्वाचन २०७९ सञ्चारमाध्यमको सहयोगका कारण सोचेभन्दा सफल भएको बताउनुभएको छ ।स्थानीय तह निर्वाचनका लागि वैशाख १ गतेदेखि सञ्चालित आयोगको ई—बुलेटिन प्रकाशन समूहसँग आज आयोगमा आयोजित समीक्षा कार्यक्रममा उहाँले सो कुरा बताउनुभएको हो । निर्वाचन सूचना सम्प्रेषण गर्नमा ई–बुलेटिनमा आवद्ध समूहले प्रभावकारी काम गरेकोभन्दै उहाँले धन्यवाद व्यक्त गर्नुभयो । आयुक्त डा तुलाधरले छिटपुट घटनाबाहेक मुलुकभर एकैपटक भएको स्थानीय निर्वाचन शान्तिपूर्ण र उत्साहपूर्ण ढंगले सम्पन्न भएको चर्चा गर्नुभयो । यसको सफलताको श्रेय सञ्चार माध्यम तथा सम्बद्ध सबै पक्षलाई जाने उहाँले बताउनुभयो । “निर्वाचन सफल बनाउन सञ्चार माध्यम, कर्मचारी संयन्त्र र सञ्चार टिम सबैको सक्रिय भूमिका रह्यो, आगामी दिनमा पनि सहयोगको अपेक्षा आयोगले गरेको छ” आयुक्त डा. तुलाधरले भन्नुभयो, “छोटो समयमा राम्रो काम भएको छ, सीमित स्रोत साधनकाबीच पनि ई-बुलेटिनको काम प्रभावकारी भएको महशुस गरेका छौं ।”स्रोतको कमीका कारण स्थानीय तह सदस्य निर्वाचनमा निजी सञ्चार माध्यमलाई विज्ञापनमा सहयोग गर्न नसकिएको स्मरण गर्नुहुँदै आयुक्त डा. तुलाधरले आगामी निर्वाचनमा सबैलाई पुग्नेगरी आर्थिक व्यवस्थापनको पहल हुने विश्वास दिलाउनुभयो । आयोगबाट जाने सूचना एकद्वार प्रणालीबाट जानसके अझ प्रभावकारी हुने उहाँले बताउनुभयो ।आयोगका सहसचिव एवम् प्रवक्ता शालिग्राम शर्मा पौडेलले निर्वाचनसम्बन्धी सूचना र तथ्याङ्कलाई स्रोत साधनले भ्याएसम्म विश्वसनीय रुपमा उपलब्ध गराउने प्रयास गरिएको बताउनुभयो । स्थानीय तह सदस्य निर्वाचनले धेरै कुरा सिकाएकाले आगामी निर्वाचनमा थप सुधार गरेर आयोग अघि बढ्ने उहाँले विश्वास दिलाउनुभयो । समीक्षा बैठकमा आयोगका सहसचिव तुलसीबहादुर श्रेष्ठ, यज्ञप्रसाद भट्टराई, उपसचिवहरु कमल भट्टराई, आदेश खड्का, बुलेटिन प्रकाशन समितिका सदस्यहरुको सहभागिता थियो । ई-बुलेटिन प्रकाशन समितिमा सञ्चारसम्बन्धी विज्ञका साथै गोरखापत्र र राससका प्रतिनिधिहरुको सहभागिता थियो । गत वैशाख १ गतेदेखि शुरुभएको ई-बुलेटिन जेठ १२ गतेसम्म प्रकाशन भएको छ । यस अवधिमा जम्मा ४३ अङ्क बुलेटिन प्रकाशन भएको छ । निर्वाचनलाई केन्द्रीत गरी गरिएको प्रकाशन जेठ १३ गतेदेखि बन्द भएको छ । बुलेटिन प्रकाशन समितिको संरक्षकमा आयोगका सचिव गोकर्णमणि दुवाडी, संयोजकमा सहसचिव तथा आयोगका प्रवक्ता शालिग्राम शर्मा पौडेल रहनुभएको थियो ।
बाजुराको बुढीगंगा नगरपालिकाको मतदान रद्द, पुनः मतदान हुने
गोरखापत्र अनलाइनकाठमाडौं, जेठ १२ गते । बाजुराको बुढीगंगा नगरपालिकामा पुनः मतदान हुने भएको छ । निर्वाचन आयोगको आजको निर्णयअनुसार सो नगरपालिकाको निर्वाचन केन्द्रमा पुनः मतदान गर्ने निर्णय गरेको हो । आयोगका प्रवक्ता तथा सहसचिव शालिग्राम शर्मा पौडेलकाअनुसार सो नगरपालिकामा यसअघि वैशाख ३० गते भएको निर्वाचन निष्पक्ष हुन नसकेकाले मतदान रद्द गरी पुनः मतदान गर्ने निर्णय गरेको छ । सो नगरपालिकाभित्र यथाशीघ्र मतदान गर्ने मिति र समय तोकी मतदान गराउन सम्बन्धित निर्वाचन अधिकृतलाई आयोगले निर्देशन गरेको छ । यसैगरी बाजुराका प्रमुख जिल्ला अधिकारी उपेन्द्रराज पौड्याल, त्यहाँका प्रहरी नायव उपरीक्षक चतुर्भुज ओझा र सशस्त्र प्रहरी बल नेपालका सशस्त्र प्रहरी उपरीक्षक दीपक विष्टलाई तीन दिन भित्र हटाई सो ठाउँमा जिम्मेवार कर्मचारीलाई खटाउन आयोगले सरकारलाई भनेको छ । उहाँहरुले निर्वाचनमा गम्भीर लापरवाही गरी निर्वाचनको स्वच्छता, स्वतन्त्रता तथा निष्पक्षतामा आँच आउने काम गरेको आयोगको ठहर छ । ती पदाधिकारीहरुलाई तीन महिनाभित्र विभागीय कारवाही गरी आयोगलाई जानकारी गराउन पनि आयोगले सरकारलाई भनेको छ ।
-original-thumb.jpg)
पचपन्न जना एयरहोस्टेस दीक्षित
गोरखापत्र अनलाइनकाठमाडौं, जेठ १२ गते । नेपाल एयरहोस्टेस एकाडेमीमा अध्ययनरत १६, १७ र १८ औँ व्याचका ५५ एयरहोस्टेस दीक्षित हुनुभएको छ । काठमाडौंको हात्तिसारमा भएको एक समारोहमा दीक्षित भएर प्रमाणपत्र पाएसँगै उहाँहरुको विमान परिचारिका बन्ने वाटो खुल्ला भएको छ ।सात महिना पहिले एयरहोस्टेस बन्ने सपना बोकेर उहाँहरु नेपाल एयरहोस्टेस एकाडेमीमा अध्ययन गर्न आउनुभएको थियो । सात महिनाको प्रयासपछि विमान परिचारिकाको रोजगारीका लागि उहाँहरु सक्षम बनेका नेपाल एयरहोस्टेस एकाडेमीका निर्देशक रेजिना तुलाधरले जानकारी दिनुभयो । विमान परिचारिका आफैंमा आकर्षक पेशा हो । आकाशमा उड्ने यो पेशा जति रोमाञ्चक छ, उत्तिकै जिम्मेवारी पनि बहन गर्नुपर्ने खालको रहेको तुलाधरले बताउनुभयो । दीक्षित समारोहमा एकाडेमीका चिफ इन्सटक्टर गौरीकला थापा, भारतीय मूलकी अन्तर्राष्ट्रिय विमान परिचारिका सञ्चिता नेपाली, पर्सनालिटी प्रशिक्षक रोजिन शाक्य तथा संस्थाका अध्यक्ष प्रदीपराज वन्तको समेत सहभागिता थियो । कार्यक्रममा विद्यार्थीलाई प्रमाणपत्रका साथै उत्कृष्ट विद्यार्थीलाई मेडल प्रदान गरिएको थियो । सो अवसरमा अतिथिहरुले विमान परिचारिकाजस्तो महत्वपूर्ण क्षेत्रमा लगानी गरेर युवाहरुलाई शिक्षा प्रदान गर्नु आफैँमा महत्वपूर्ण रहेको भन्दै प्रसंसा गर्नुभयो । अध्ययन कोर्समा विमानको इतिहास र प्रकार, यात्रु सुरक्षा, यात्रु सत्कार, फायर फाइटिङ रहेको छ । ड्रेस र मेकअप, फुड सर्भिस, प्राथमिक उपचार विधि, व्यक्तित्व विकास, आत्मरक्षा, पौडीलगायतका विषयलाई बढी प्राथमिकता दिने गरिएको निर्देशक तुलाधरले बताउनुभयो । विमान परिचारिकाले यात्रुको सत्कार गर्ने, यात्रुको सुरक्षाको अनुभूति दिलाउने, यात्रुको कमाण्ड लिने, यात्रुलाई अप्ठ्यारो समयमा सान्त्वना दिने, सूचना प्रवाह गर्ने, मौसमसम्बन्धी जानकारी दिने, परिचयपत्र चेकजाँच गर्ने लगायतको काम गर्ने जिम्मेवारी हुन्छ । अध्यक्ष वन्तकाअनुसार राष्ट्रिय उडानमा मासिक न्यूनतम ३० हजारदेखि ८० हजार रुपियाँसम्म कमाइ हुन्छ । त्यस्तै, अन्तर्राष्ट्रिय उडानमा मासिक एक लाखदेखि दुई लाख रुपियाँसम्म कमाइ हुन्छ ।
अग्नी पीडितलाई २८ क्वीन्टल धान सहयोग
अविनाश चौधरीधनगढी, जेठ ११ गते । कैलालीका एक दम्पत्तीले कैलारी गाउँपालिका –७ विपतपुर मुक्त कमैया शिविरका अग्नी पीडित परिवारलाई २८ क्वीन्टल २१ किलो धान सहयोग गर्नुभएको छ । सोही वडाको रतनपुर गाउँका भरथनियाँदेवी चौधरी र भरतकुमार चौधरीले अग्नी पीडित परिवारलाई आफ्नो निजी धान सहयोग गर्नुभएको हो । गत वैशाख ११ गते भएको आगलागीबाट पूर्ण र आङ्शिक गरेर ७१ घरमा क्षति पुगेको थियो । पूर्ण क्षति भएका परिवारको खाद्यान्न, लत्ताकपडा सबै जलेर नष्ट भएको थियो । अग्नी पीडित परिवारलाई केही हद्सम्म राहत पुगोस भनेर आफ्नो कमाइबाट सकेजति सहयोग गरेको भरतकुमारले बताउनुभयो । उहाँले ५० किलो नुनसमेत सहयोग गरेको जानकारी दिनुभयो ।
तुलसीपुुरमा एमालेका उम्मेदवार विजयी
गोकर्ण पौडेलतुलसीपुर, जेठ ११ गते । तुलसीपुर उपमहानगरपालिकाको प्रमुख उपप्रमुख दुवै पदमा नेकपा (एमाले) का उम्मेदवार विजयी हुनुभएको छ । एमालेबाट प्रमुख पदका उम्मेदवार टीकाराम खडकाले ३१ हजार चार सय आठ मत प्राप्त गरी विजयी बन्नुभएको हो । उहाँका निकटतम प्रतिस्पर्धी गठबन्धनबाट काँग्रेसका गेहेन्द्र गिरीले २७ हजार सात सय १६ मत प्राप्त गर्नुभयो । मतान्तर तीन हजार छ सय ३७ रहेको छ ।त्यस्तै, उपप्रमुखमा एमालेकै स्यानी चौधरीले ३० हजार पाँच सय ९७ मत प्राप्त गर्नुभएको छ । गठबन्धनबाट नेकपा (एकीकृत समाजवादी) का जोगबहादुर राणाले २१ हजार एक सय ६५ मत प्राप्त गर्नुभएको छ । मतान्तर नौ हजार ५३२ मत रहेको छ । तुलसीपुरका १९ वटामध्ये एमालेले १० वटामा जित हासिल गरेको छ । २, ३, ६, ८, १०, ११, १३, १५, १८ र १९ नम्बर वडाको नेतृत्वमा जीत हासिल गरेको छ ।सोहीअनुसार, काँग्रेसले चारवटा वडामा जित हासिल गरेको छ । काँग्रेसले ५, ७, ९ र १४ मा वडा नेतृत्वमा जित हासिल गरेको छ । त्यस्तै, नेकपा माओवादी केन्द्रले तीन वटा वडा १, ४ र १२ मा जितेको छ । वडा नम्बर १६ मा स्वतन्त्रका उम्मेदवारले वडाध्यक्षमा जितेका छन् । तुलसीपुरमा काँग्रेस, माओवादी केन्द्र, जनमोर्चा र एकीकृत समाजवादी गठबन्धनमा छन् । एमालेले एक्लै चुनावी मैदानमा थियो । तुलसीपुर एमालेका केन्द्रीय उपाध्यक्ष युवराज ज्ञवाली र महासचिव शंकर पोखरेलको गृह नगर हो ।दाङमा एमालेले दुईवटै उपमहानगरमा जित हात पार्न सफल भएको छ । तुलसीपुरमा २०५४, २०७४ मा पनि एमालेले नेतृत्वमा विजयी हासिल गरेको थियो ।
धन्यवादका लागि उम्मेदवारहरु मतदाताको घरमा
बेलिना थापालमजुङ, जेठ ११ गते । लमजुङका स्थानीय तहमा निर्वाचित जनप्रतिनिधिहरु चुनावपछि पनि मतदाताको घर पुग्न छाडेका छैनन् । निर्वाचनअघि प्रतिवद्धताका साथ मतदाताको घर घरमा पुगेका उहाँहरु निर्वाचन पछि धन्यवाद दिनका लागि घरमा पुगिरहेको बताउनुभएको छ ।चुनाव जितेपछि नेताले वास्ता गर्दैनन् भन्ने नागरिकको गुनासालाई चिर्दै जनप्रतिनिधिहरु नागरिकलाई भेट्न पुगेको दावी गर्नुभएको छ । चार नगरपालिका र चार गाउँपालिका रहेको लमजुङमा निर्वाचित जनप्रतिनिधिहरुले गाउँ गाउँ पुग्ने, मतदातालाई धन्यवाद दिने र उनीहरुको पिरमर्का बुझ्ने गरिरहनुभएको छ । बेँसीसहर नगरपालिकाका प्रमुख गुमानसिंह अर्याल, उपप्रमुख पद्मा गुरुङ लगायतको टिम गाउँमा पुगेको छ । नव–निर्वाचित प्रमुख अर्यालले नागरिकलाई चुनावअघि मात्र नभएर चुनावपछि पनि भेट्न गएको बताउनुभयो । ‘उम्मेदवारहरु गाउँ जाँदा चुनाव जित्नकै लागि गाउँ आयो । जितेर गएपछि वास्ता गर्दैनन् भन्ने चलन छ । तर, हामीले त्यस्तो गरेनौं । चुनाव अघि जति महत्वकासाथ गयौं, अहिले पनि सोही महत्वकासाथ गयौं’ उहाँले भन्नुभयो । उपप्रमुख पद्मा गुरुङले स्थानीय तह निर्वाचन २०७९ मा अमूल्य मत दिएर बिजयी गराएको भन्दै मतदातालाई धन्यवाद ज्ञापन गर्न गाउँ पुगेको बताउनुभयो । चुनाव अघि गरेका प्रतिवद्धता पूरा गर्ने उहाँले पुनः दोहो¥याउनुभयो । सुन्दरबजार नगरपालिकाका नव–निर्वाचित प्रमुख कृष्णप्रसाद कोइरालाले नगरपालिका भित्रका गाउँँ पुगेको बताउनुभयो । चुनावअघि भोट माग्न र चुनाव पछि धन्यवाद दिन आफूहरु त्यहाँ पुगेको बताउनुभयो । नगरपालिकाका सबैजसो गाउँमा पुगेर धन्यवाद दिएको उहाँले बताउनुभयो । उपप्रमुख भवानी केसीले भोट दिएर बिजयी गराउनेलाई गाउँमै पुगेर धन्यवाद दिएको बताउनुभयो । मस्र्याङदी गाउँपालिका अध्यक्ष अर्जुन गुरुङ, उपाध्यक्ष जुनामाया थापा पनि घरदैलो अभियानमा हुनुहुन्छ । नौ वटा वडा रहेको गाउँपालिकाका गाउँमा पुग्ने गरेको अध्यक्ष गुरुङले बताउनुभयो । ‘चुनावमा विभिन्न एजेण्डा लिएर गएका थियौं । त्यसलाई मन पराएर हामीलाई जिताउनुभयो । अमूल्य मतको सम्मानका लागि गाउँ जाने, धन्यवाद दिने, रमाइलो गर्ने, दुःख सुःखका कुरा सुन्ने गरेका छौं’ उहाँले भन्नुभयो, ‘हामीले गरेका प्रतिवद्धता अवश्य पूरा गरेर छाड्नेछौं । नागरिकलाई दुःखी बनाउने छैनौं ।’दोर्दी गाउँपालिका अध्यक्ष युवराज अधिकारीले मतदातालाई धन्यवाद दिनका लागि गाउँघर जाने अभियानमा व्यस्त रहेको बताउनुभयो । नागरिकको माया र प्रेमले चुनाव जित्न सफल भएको भन्दै मतदाता भेट्न पुगेको बताउनुभयो । आफूले गरेका प्रतिवद्धता पूरा नभएमा झकझकाउन पनि अनुरोध गरेको जानकारी दिनुभयो । नागरिकको आवश्यकता र माग अनुसार नै अघि बढ्ने उहाँको भनाई छ । कव्होलासोंथर गाउँपालिका अध्यक्ष सूर्यप्रसाद गुरुङले मतदातालाई भेट्न गाउँ पुग्ने कार्यमा लागेको बताउनुभयो । बिजयी भएपछि मतदातालाई धन्यवाद दिनुपर्ने भन्दै गाउँघर पुग्ने, नागरिकको घर पुग्ने, समस्या बुझ्ने गरेको बताउनुभयो । मतदातालाई चुनावअघि दिएका आश्वासन पूरा गर्ने उहाँले बताउनुभयो । अन्य पालिकाका प्रमुख–अध्यक्ष, उपप्रमुख–उपाध्यक्ष लगायत पनि मतदातालाई धन्यवाद दिन गाउँ पुगेका छन् ।
बेँसीसहरको कार्यपालिका सदस्यहरु निर्विरोध
बेलिना थापालमजुङ, जेठ ११ गते । लमजुङको बेँसीसहर नगरपालिकाको कार्यापालिका सदस्यमा आठ उम्मेदवार निर्विरोध चयन हुनुभएको छ । पालिकाको कार्यपालिका निर्वाचनका लागि मनोनयन दर्ता गराउनु भएका आठ जना निर्विरोध भएको मुख्य निर्वाचन अधिकृतको कार्यालयले जनाएको छ । मुख्य निर्वाचन अधिकृत शिवप्रसाद खनालका अनुसार कार्यपालिका सदस्य आठ जनाका लागि एमालेबाट महिलातर्फ कल्पना थापा बोहरा, बुनादेवी रिमाल, विमला न्यौपाने अधिकारी, सुकमाया गुरुङ, मनिता परियारको उम्मेदवारी परेको छ । दलित तथा अल्पसङ्ख्यकबाट हिरालाल विश्वकर्मा, श्रीनाथ सार्की र सुकमाया घर्तीको उम्मेदवारी परेको छ । सबै सदस्य सर्वसम्मत हुनुभएपछि उहाँहरुलाई अर्को कार्यक्रममा प्रमाणपत्र प्रदान गरिने निर्वाचन अधिकृतको कार्यालयले जनाएको छ । गठबन्धन दलहरुले मनोनयन दर्ताको समयसम्म उम्मेदवारी दर्ता नगराएको सो कार्यालयले जनाएका छ । मनोनयन दर्ताको समय विहान १० बजेदेखि ३ः३० बजेसम्म तोकिएको थियो । गठबन्धनको तर्फबाट उम्मेदवारी नआएपछि एमालेका उम्मेदवार निर्विरोध हुनुभएको सो कार्यालयले जनाएको छ । कार्यपालिका निर्वाचन जेठ १७ गतेका लागि तय गरिएको छ ।
पैदलयात्रुलाई आवत जावतमा समस्या
राजन रावतहुुम्ला, जेठ १० गते । जिल्लाको मध्यक्षेत्रको सर्केगार्ड गाउँपालिकाको दुुल्लीकुुना क्षेत्रमा पैदलयात्रुलाई आवत जावतमा समस्या भएको छ । कर्णाली करिडोरको सडक निर्माण कार्य भइरहेका कारण पैदल यात्रुुलाई हिड्डुलमा समस्या भएको हो । स्थानीय तह निर्वाचनमा खटिनुु भएका मालपोत कार्यालयका प्रमुख रबिन्द्र शाहीले दुुल्ली कुना क्षेत्रमा पैदल हिडडुुल गर्न समस्या हुनेगरेको बताउनुुभयो । चट्टानी भीरमा बिष्फोट भएर सडकमा खसेका ढुङ्गा पन्छाउने कार्य नभएका कारण पैदलयात्रुुलाई समस्या भएको उहाँको भनाई छ । कर्णाली नदी किनारामा ग्याविन लगाउने र बिष्फोट भएका ढुुङ्गा फाल्ने कार्य नभएसम्म पैदल यात्रुुहरुले सास्ती खेप्नुुपर्ने उहाँले बताउनुुभयो । अग्लो चट्टानी भीरमा सडकको लेबल मिलाउन अझै काम बाँकी रहेकाले पूरा नहुुन्जेलसम्म पैदल यात्रुुहरुले समस्या भोग्नुु पर्ने उहाँको बुझाई छ । उक्त खण्डमाथि भीर र तल कर्णाली नदी बगेकाले अन्यत्रबाट पैदलयात्रुु जाने बिकल्प नरहेको स्थानीयको भनाई छ । यस्तो असजिलो बाटोमा पैदल यात्रुुहरुले डराई डराई पन्ध्रदेखि बीस मिटरभन्दा बढी दूुरी पार गर्नुपर्ने अबस्था रहेको स्थानीयको गुनासो छ । दैनिक सयभन्दा बढी बटुवाहरु सो खण्ड हुुँदै आवत जावत गर्ने गर्छन् । सो बाटोबाट पशुु बस्तुलाई समेत लैजान सक्ने अबस्था नरहेको स्थानीयको भनाई छ । सडक निर्माणको जिम्मा लिई हिल्सा सिमकोट सडक आयोजनाले निर्माण कम्पनी पक्षलाई सडक निर्माण कार्यलाई तिब्रता दिएको छ ।
धनुषाका नवनिर्वाचित प्रमुखलाई पद तथा गोपनियताको शपथ
धर्बेन्द्र झा जनकपुरधाम, जेठ १० गते । मधेस प्रदेशको राजधानी समेत रहेको जनकपुरधाम उपमहानगरपालिकाको मेयर र उपमेयरसहित धनुषाको १८ वटै पालिकाका नवनिर्वाचित प्रमुखले पद तथा गोपनियताको शपथ लिनुभएको छ । मुख्य निर्वाचन अधिकृतको कार्यालय धनुषाले मंगलबार जनकपुरधाममा आयोजना गरेको कार्यक्रमवीच उहाँहरुलाई मुख्य निर्वाचन अधिकृत ब्रजेस प्याकुरेलले पद तथा गोपनियताको शपथ खुवाउनु भएको हो । कार्यक्रममा मुख्य निर्वाचन अधिकृत प्याकुरेललले धनुषाको १८ वटै पालिकामा सौहार्दपूर्ण र शान्तिपूर्वक निर्वाचन गराउन सबै पक्षको त्यतिकै सहयोग भएकोमा धन्यवाद व्यक्त गर्नुभयो । जनप्रतिनिधिसँग जनताको धेरै अपेक्षा रहेको चर्चा गर्दै जनताको अपेक्षाअनुसार काम गर्न उहाँले सबैमा आग्रह गर्नुभयो । कार्यक्रममा धनुषाका प्रमुख जिल्ला अधिकारी सुरेन्द्र पौडेल, मधेस प्रदेश निर्वाचन कार्यालयका प्रमुख श्रीधर पन्थी, जनकपुरधाम उपमहानगरपालिकाका कार्यकारी अधिकृत प्रद्युम्न उपाध्यायसहितले जनप्रतिनिधहरुको कार्यकालको सफलताको शुभकामना व्यक्त गर्नुभयो । शपथ ग्रहण गरेका १८ वटै पालिकाका प्रमुखले आजै आ—आफनो पालिकामा पदभार समेत ग्रहण गर्नुभएको छ । जनकपुरधाम उपमहानगरपालिकामा स्वतन्त्रवाट निर्वाचित हुनुभएका नगर प्रमुख मनोज साह र नेपाली काँग्रेसबाट निर्वाचित नगर उपप्रमुख किशोरी साहले पदभार ग्रहण गर्नुभयो । जनकपुरधाम उपमहानगरपालिकाका कार्यकारी अधिकृत प्रद्युम्न उपाध्याले दुवै जनालाई पदभार ग्रहण गराउनुभयो । पदभार ग्रहण पश्चात सञ्चारकर्मीसँगको कुराकानीमा नगर प्रमुख साहले आजै आफुले दुईवटा निर्णय गरेको बताउनुभयो । सफाईको सवालमा रहदैआएको केन्द्रीकृत प्रणालीलाई बिकेन्द्रीकृत गरी नगरको प्रत्येक वडाको सफाईको जिम्मा वाडालाई नै दिने, त्यसको लागि आवश्यक स्रोत साधन नगरपालिकाले व्यवस्थापन गर्ने र नगरपािलका भित्रका कामकाज लाई पारदर्शी बनाउन सूचना डेस्क स्थापना गरी समय समयमा सूचना प्रवाह गर्ने निर्णय भएको बताउनुभयो ।
निर्वाचन आचारसंहिता आजदेखि लागू नरहने : आयोग
गोरखापत्र अनलाइनकाठमाडौं, जेठ १० गते । स्थानीय तह सदस्य निर्वाचन २०७९ का लागि २०७८ चैत २५ गतेदेखि लागू रहेको निर्वाचन आचारसंहिता आज मङ्गलबारदेखि फुकुवा भएको छ । निर्वाचन आयोगका प्रवक्ता शालिग्राम शर्मा पौडेलले विज्ञप्ति जारी गर्नुहुँदै सो जानकारी गराउनुभएको हो ।आयोगको परामर्शमा नेपाल सरकार मन्त्रिपरिषदबाट मिति २०७८/१०/२४ गते स्थानीय तह सदस्य निर्वाचन संवत् २०७९ वैशाख ३० गते शुक्रबार सम्पन्न गर्नेगरी निर्वाचन मिति तोकिएकोमा निर्वाचन सम्पन्न भई अन्तिम परिणाम आउने क्रममा रहेकाले आचारसंहिता लागू नरहने आयोगले निर्णय गरेको जनाएको छ ।“निर्वाचन आयोग ऐन, २०७३ को दफा २२ ले दिएको अधिकार प्रयोग गरी जारी भएको निर्वाचन आचारसंहिता, २०७८ को दफा १ को उपदफा (२) बमोजिम मिति २०७८/१२/२५ गतेदेखि मुलुकभर लागू उक्त आचारसंहिता मिति २०७९/०२/१० गतेदेखि लागू नरहने व्यहोरा आयोगको निर्णयअनुसार सम्बन्धित सबैको जानकारीका लागि अनुरोध छ” प्रवक्ता पौडेलद्वारा जारी विज्ञप्तिमा भनिएको छ ।
सरकारको साझा नीति तथा कार्यक्रमबारे बालुवाटारमा छलफल
सत्तारुढ पाँच दलका शीर्ष नेताको उपस्थितिमा नयाँ आर्थिक वर्षका लागि नेपाल सरकारको नीति तथा कार्यक्रमबारेमा शीर्ष तहमा वृहत् छलफल भएको छ।
खोलामा डुबेर दुई जनाको मृत्यु
अर्घाखाँची जिल्लाको शीतगङ्गा नगरपालिकामा माछा मार्ने क्रममा खोलामा डुबेर दुई जनाको मृत्यु भएको छ।
विदेशको सीप र आम्दानी गाउँमा लगानी
गणेश पौडेलपर्वत, जेठ ८ गते । पर्वतको कुश्मा नगरपालिका –९ कटुवाचौपारीको चिन्ने खोलानजिकै बस्दैआएका ३३ वर्षीय सुवास नेपालीले विदेशमा दुःख गरी कमाएको पैसा गाउँमा फर्केर लगानी गर्नुभयो । लामो समयको मलेसिया बसाइपछि नेपाल फर्किनुभएका नेपालीले मलेसियामा मासिक झन्डै ६० हजार रुपियाँ कमाएको रकमबाट झन्डै १७ लाख रुपियाँको लगानीमा कटुवाचौपारीमा कुखुरा फार्म सुरु गर्नुभयो । अहिले उहाँले मासिक तीन लाख रुपियाँको कारोबार गरिरहनुभएको छ । नेपाल रहँदा रोजगारीको कुनै बाटो नपाएका नेपालीले विदेश पुगेपछि नेपालमा गर्न सकिने कामको सम्भावना बारेमा सपना देखेर केही वर्ष विदेशमा काम गर्नुभयो । त्यहाँ कमाएको रुपियाँलाई गाउँमै लगानी गरेर व्यावसायिक सफलता हात पार्ने सपना उहाँमा थियो । नेपालीले तयारी अवस्थामा रहेको कुखुराको फर्म किनेर कुखुरापालन व्यवसाय सुरु गर्नुभयो । उहाँको फर्ममा अहिले झन्डै डेढसयको सङ्ख्यामा टर्की, झन्डै एक हजार ब्रोइलर, झन्डै ११ सय लोकल जातका कुखुरा छन् । विदेशमा बसेको भन्दा आफ्नै परिवारको साथमा रहेर गरेको कामले सुख र आयआर्जन समेत भएको उहाँको भनाइ छ । ‘अरूको देशमा काम गरेर खान सजिलो कहाँ छ र ? आफ्नो देशमा उपाय नदेखेको बेलामा त्यही भएपनि राहत हुन्छ भनेर गएको हुँ । तर आफ्नो मातृभूमिमा काम गरेको जस्तो विदेशमा छैन’ नेपालीले भन्नुभयो, “अहिले परिवारको साथमा बस्न पाएको छुँ । कसैको गाली खानुपरेको छैन ।”नेपालीले ‘सुवित पशुपक्षी तथा कृषि फार्म’ का लागि चल्ला उत्पादनको ह्याचरी मेसिन र जेनरेटरसमेत जडान गरेर व्यवसाय चलाउँदै आउनुभएको छ । उहाँको फर्मबाट लोकल कुखुरा प्रतिगोटा १५ सयसम्म, टर्कीको प्रतिकिलो सातसय ५० रुपियाँमा बिक्री हुनेगरेको छ । ब्रोइलर कुखुराको मूल्य पर्वतमा हप्ता दिनमै तलमाथि भइरहेको छ ।उहाँका अनुसार महिनामा खर्चसहित करिब तीन लाख रुपियाँको कारोबार हुनेगरेको छ । जसमा आधा खर्च कटाएर पनि कम्तीमा एक लाख रुपियाँ बचत हुनेगरेको नेपालीले बताउनुभयो । एक दिनमा झन्डै दुई सयभन्दा बढी लोकल अण्डा उत्पादन हुनेगरेको र अण्डाले राम्रै बजार पाइरहेको उहाँको भनाइ छ ।आफ्नो फर्ममा आवश्यकताअनुसारको कुखुरा रहेको भए पनि बजारीकरणको व्यवस्थापन नहुँदा समस्या भइरहेको उहाँले बताउनुभयो । सामान्यतः पर्वत सदरमुकाम कुश्मा बजारमा तथा गाउँमा पनि टर्की जातको कुखुराको मासुको कारोबार भएको यदाकदा मात्र देख्न पाइन्छ । बजारमा लोकल कुखुरको माग भए पनि बजारभाउ राम्रो नभएकाले समस्या भएको उहाँले बताउनुभयो ।
