पाएनन् कृषकले राहत
धानबाली डुबानमा परेका वीरेन्द्रनगरको तल्लो तटीय क्षेत्रका किसानले दुई वर्षमा पनि राहत पाउन सकेका छैनन्। २०७८ साल कात्तिक पहिलो साता परेको वर्षाले भित्र्याउने बेलाको धान डुबानमा परी क्षति पुगेको थियो। वीरेन्द्रनगर नगरपालिका–२ की सरिता चौधरीको करिब २० कट्ठा जमिनमा लगाएको धानबाली बाढीले नै नष्ट भएको थियो। उहाँका अनुसार सरकारी निकायबाट पटक पटक क्षतिको विवरण सङ्कलन गरिएको तर राहत अझै दिइएको छैन।
चौँरीखर्क पुगेर उपचार
स्वास्थ्यकर्मीको एक टोलीले उच्च पाटनमा रहेका चौँरीखर्कमा पुगेर बालबालिकालाई खोप तथा अन्य खर्कालु (गोठाला) को उपचार गरेका छन्। नियमित खोपबाट बालबालिका नछुटून् र अन्य बिरामीको उपचारमा सहजताका लागि खर्कमै पुगेर उपचार गरिएको हो। सिमकोट गाउँपालिका–१, दोजामभित्र पर्ने चुँवा खोलाका उच्च पाटनमा पालनका लागि दुई महिनाअगाडि गएका खर्कालुको उपचारका लागि स्वास्थ्यकर्मीको टोली पुगेर उपचार गरेको हो।
आज कर्णालीमा सार्वजनिक बिदा
कर्णाली प्रदेश सरकारले आज प्रदेश स्थापना तथा सहिद दिवसका अवसरमा सार्वजनिक बिदा दिएको छ ।
खाद्यन्न बोकेका ४० गाडी हुम्ला आउँदै
खाद्य ब्यवस्था तथा ब्यापार कम्पनी लिमिटेडले काठमाडौंबाट रसुवाको केरुङ नाका हुँदै तिब्बती मार्ग भएर हुम्लाका लागि खाद्यन्न बोकेका गाडी आइतबार काठमाडौंबाट छुटेका छन् । जिल्लामा खाद्यन्नको समस्या भएको बेला लिमिटेडले चार हजार क्विन्टल खाद्यन्न पठाएको हो ।
गाडीमा कालो सिसाको दुरुपयोग
हिमाली जिल्ला मुगु भएर सवार गर्ने निजी सवारी साधनमा कालो स्टिकर टास्ने गरेको पाइएको छ । सिसामा कालो स्टिकर टाँसेर सर्वसाधारणले समेत प्रयोग गरी दुरुपयोग भइरहेको सरोकारवाला पक्षको भनाइ छ ।
तिलागुफा बालविवाह मुक्त वडा घोषणा
प्रेमराज सिम्खडाकालीकोट, भदौ ३ गते । कालीकोट जिल्लाका केही स्थानीय तहमा बालविवाहविरुद्धको अभियानले सार्थकता पाएको छ । स्थानीय सरकारको सक्रियता विभिन्न राष्ट्रिय तथा अन्तराष्ट्रिय गैरसरकारी संस्थाको सहयोगमा सामाजिक कुरीतिका रुपमा रहेको बालविवाह अन्त्यको अभियानले सफलता पाइरहेको हो । तिलागुफा नगरपालिकाभित्रका ११ वडामध्ये ८ वडामा बालविवाह हुने तर शून्यमा झारिएको छ । बालविवाह हुनै छोडेपछि ती वडालाई नगर सरकारले बालविवाह मुक्त वडा घोषणा गरेको छ । वडा नं ८ र ७ लाई बालविवाह मुक्त वडा घोषणा गरिएको छ । सन् २०१८ बाट बालविवाह अन्त्यको थालनी गर्दा वडा नं ८ मा जम्मा विवाहको ९२ प्रतिशत बालविवाह हुँदै आएको थियो । तर सन् २०२३ पुग्दा पाँच वर्षको अवधिमा बालविवाहको दर शून्यमा झरेको वडा सरकारको तथ्याङ्कमा उल्लेख छ । शुक्रबार वडालाई बालविवाह निषेधित वडा घोषणा गर्दै वडा अध्यक्ष तिलक न्यौपानेले सबैको प्रयासले पाँच वर्षमा बालविवाहको दरलाई शून्यमा झार्न सकेको बताउनुभयो । उहाँले सहयोग गर्ने सेभःद चिल्ड्रेन, किर्डाक नेपाल सहयात्रा परियोजना लगाएत सबै वडाका नागरिकलाई धन्यावाद दिनुभयो । नगरपालिका प्रमुख शङ्करप्रसाद उपाध्याय लगायत सबै सरोकारवालाको रोहवरमा वडा नं ८ र ७ लाई बालविवाह निषेधित वडा घोषणा गरिएको छ । शनिवार वडा नं ७ लाई पनि औपचारिक रुपमा बालविवाह निषेधित वडा घोषणा गरेपछि तिलागुफा नगरपालिकाभित्रका ११ वटा वडामध्ये ८ वडालाई बालविवाह निषेधित वडा घोषणा भएका छन् । अब बाँकी तीन वटा वडालाई एकै पटक बालमैत्री स्थानीय शासन लागु भएका वडा घोषणा गर्ने तयारी नगरपालिकाले लिएको छ । अनिवार्य बालमैत्री स्थानीय शासन लागु भएको वडा घोषणा गर्नका लागि बालविवाह एउटा सुचक मात्र हो । नगरपालिकामा बालविवाहविरुद्धको अभियानमा सहभागी सेभ द चिल्ड्रेन बालसंरक्षण अधिकृत बाले विश्वक्रर्माले भदौको अन्त्यमा तीन वडा घोषणासँगै पुरै नगरपालिकालाई बालविवाह निषेधित पालिका घोषणा हुने बताउनुभयो । उता शुभकालिका गाउँपालिकाभित्रका ८ वडालाई पनि बालविवाह निषेधित वडा घोषणा गर्ने अभियान जारी छ । सेभ द चिल्ड्रेन किर्डाक नेपालको सहयात्रा परियोजना सञ्चालन भइरहेका स्थानीय तहमा बालबिवाह विरुद्धका अभियान प्रभावकारी भइरहेका छन् । जिल्ला समन्वय समिति कालीकोटका प्रमुख धनजित शाहीले आफू अनुगमनका क्रममा ती पालिकामा पुग्दा बालविवाह विरुद्धका गतिविधि व्यापक भइरहेको र त्यसको प्रभाव अन्य पालिकामा समेत परेको पाएको बताउनुभयो । उहाँले सरकारको दिगो विकास लक्षभित्रको विषय बालविवाह न्यूनीकरण अर्थात् अन्त्य भएकाले सबै स्थानीय तहले बालविवाहविरुद्धको अभियान चलाउनुपर्ने बताउनुभयो ।
बराहताल र पञ्चपुरीमा लालपुर्जा वितरण
सुर्खेतको बराहाताल गाउँपालिका वडा नम्बर ५ का एक सय ८४ जनालाई लालपुर्जा वितरण गरिएको छ ।
मिलन केन्द्र बन्दै छ ज्येष्ठ नागरिकको सहारा
ज्येष्ठ नागरिक गङ्गाराम भट्टराई घरमा बसिरहन पट्यार लागेपछि वीरेन्द्रनगर नगरपालिका–८ मा रहेको ज्येष्ठ नागरिक मिलन केन्द्रमा पुगेर भजन कीर्तनमा रमाउनुहुन्छ। सो सेवा केन्द्रमा नियमित हुने भजन कीर्तन, प्रवचन र देउडा गीतमा रमाउन उहाँसँगै अन्य नागरिक पनि त्यहाँ पुग्नुहुन्छ।
नाम्खामा जग्गा वर्गीकरण
नाम्खा गाउँपालिकाले जग्गाको वर्गीकरण सुरु गरेको छ। अन्य पालिकाले जग्गा वर्गीकरण गर्न नसकिरहेको बेला गाउँपालिकास्तरीय समितिले जग्गाको वर्गीकरण गरेको हो। गाउँपालिका अध्यक्ष एवं सङ्घीय भूउपयोग समिति अन्तर्गतको स्थानीय स्तरमा कार्यान्वयन समितिका अध्यक्ष प्रेमबहादुर लामाले पालिकाभित्रको जग्गा वर्गीकरण गर्न थालिएको बताउनुभयो। नाम्खा गाउँपालिकाले जग्गा वर्गीकरण गरेसँगै जग्गासम्बन्धी कारोबार गर्ने बाटोसमेत खुलेको छ। हालसम्म जग्गाको वर्गीकरण गर्न नसकेको भन्दै सबैतिर विरोध भइरहेको बेला नाम्खा गाउँपालिकाले आफ्नो कार्य पूरा गरेको छ।
बालिका बलात्कार आरोपित तीन पक्राउ छजना अझै फरार
बालिका बलात्कार गरेको आरोपितमा तीन जनालाई प्रहरीले पक्राउ गरेको छ ।
विद्युत् विस्तारमा स्थानीय अवरोध
कोहलपुर–सुर्खेत १३२ केभीए विद्युत् प्रसारण लाइन विस्तारमा देखिएको जग्गा विवाद अझै सुल्झिएको छैन। विवाद समाधान नहुँदा तीन वर्षदेखि लाइन विस्तार कार्यमा अवरोध सिर्जना भएको छ। विद्युत् लाइन विस्तार गर्दा बाँकेको वैजनाथस्थित बस्ती प्रभावित हुने भन्दै स्थानीयले अवरोध सिर्जना गरेका हुन्। विस्तृत परियोजना प्रतिवेदन (डिपिआर) अनुसार वैजनाथ गाउँपालिका–१ गाभर र वडा नं. ४ को बानियाभार हुँदै लाइन विस्तार गर्नुपर्ने छ। उक्त लाइन विस्तारले बस्ती र खेतीयोग्य जमिनमा असर पुग्ने भन्दै स्थानीयले विरोध जनाएका छन्।
मिल्किए तेल पेल्ने दन्याडी
सिमकोट गाउँपालिका–२ को ठेहे गाउँकी बाँचपुरी बोहरालाई हिउँद लागेपछि दन्याडीमा तोरी पेल्न फुर्सद हुन्नथ्यो। हातैले तेल पेल्ने परम्परागत काठको भाँडा नै सिमकोट मात्र होइन हुम्ला जिल्लामै तेल पेल्ने रैथाने प्रविधि थियो। यसरी तेल पेल्ने जिम्मा महिलाकै काँधामा हुन्थ्यो। अहिले परिस्थिति फेरियो। जीर्ण अवस्थाका दुई वटा काठका दन्याडी बाँचपुरीको घर करासोमा बेवारिस फालिएका छन्। यहाँका प्रत्येक घरमा पुराना एक दुई दन्याडी जीर्ण अवस्थामा फालिएका पाइन्छन्। बाँचपुरीले भन्नुभयो, “उहिले घर घरमा दन्याडी हुन्थ्यो। हरेक घरका महिला दन्याडीमा तोरी पेल्थे। अहिले फाट्टफुट्ट रूपमा दन्याडीमा तोरी पेलेको देख्न पाइन्छ।”
किसानलाई मकै बाली जोगाउनै मुस्किल
दैलेखका ग्रामीण क्षेत्रमा मकै बाली जोगाउन मुस्किल परेको कृषकको भनाइ छ । जंगली जनावरले बाली पाक्नु अगाडि नै खाएर नष्ट गर्ने समस्याका कारण किसानलाई बाली जोगाउन मुस्किल भएको हो ।
चौरीको खर्कमा पुगेर बालबालिकाको उपचार
स्वास्थ्यकर्मीको टोलीले उच्च पाटनमा रहँदैआएका चौकीको खर्कमा पुगेर बालबालिकालाई खोप लगाउने र अन्य खर्कालुहरुको उपचार गर्ने काम गरेको छ ।
केरुङ हुँदै हुम्लामा खाद्यान्न ल्याइँदै
खाद्य व्यवस्था तथा व्यापार कम्पनी लिमिटेडले काठमाडौंबाट रसुवाको केरुङ नाका हुँदै हुम्लामा खाद्यान्न पठाउने भएको छ ।
घाँस काट्दा लडेर महिलाको निधन
कालिकोटको नरहरिनाथ गाउँपालिकामा एक महिलाको घाँस काट्ने क्रममा भीरबाट लडेर निधन भएको छ । घाँस काट्ने क्रममा वडा नं ५ की ३५ वर्षीया पसु सहकारीको भीरबाट लडेर निधन भएको हो ।
उडान प्रभावित हुँदा कर्णालीमा कहर
नागरिक उड्डयन प्राधिकरणले आन्तरिक उडानमा नयाँ नियम लागु गरेपछि कर्णालीको रारा विमानस्थलमा उडान प्रभावित भएको छ। जिल्लाको विमानस्थलले उडान तालिका अनुसार मात्र उडान भर्नुपर्ने नियम लागु भएसँगै दैनिक उडान प्रभावित भएको हो। नागरिक उड्डयन प्राधिकरण रारा विमानस्थल कार्यालय प्रमुख सन्तोष गौतमका अनुसार बिहान बाक्लो कुहिरो लाग्ने, पानी पर्ने र बादल लाग्ने भएका कारण दुई सातायता दैनिक हवाई सेवा अवरुद्ध हुँदै आएको छ। प्राधिकरणले हवाई उडानका लागि नयाँ नियम लागु गर्दा पनि उडान प्रभावित भएको जानकारी दिएको छ।
प्रदेश निजामतीसम्बन्धी विधेयक प्रदेश सभामा पेस
कर्णाली प्रदेश निजामतीसम्बन्धी विधेयक प्रदेश सभा बैठकमा पेस गरिएको छ । प्रदेश सरकारले ऐन बनाउन प्रदेश निजामती ऐन सेवाको गठन, सञ्चालन र सेवाका सर्त सम्बन्धमा व्यवस्थापन गर्न बनेको विधेयक तयार गरेर प्रदेश सभामा पेस गरेको हो ।
शिक्षा विधेयकको विरोध गर्दै धर्नामा शिक्षकहरू
सङ्घीय शिक्षा विधेयकको विरोध गर्दै नेपाल शिक्षक महासङ्घ राष्ट्रिय समितिले कर्णाली प्रदेशको सामाजिक विकास मन्त्रालयमा धर्ना दिएको छ ।
चार दिन पुग्दा पनि मृतकको पोष्टमार्टम भएन
गत सोमबार मुगुमा भएको जिप दुर्घटनामा ज्यान गुमाएकाको चार दिन बितिसक्दा पनि पोष्टमार्टम हुन सकेको छैन ।
कर्णाली करिडोर मर्मतका लागि एक साता बन्द
कर्णाली करिडोर जोड्ने खुलालु पुलको नजिकै सडक मर्मत कार्य सुरु भएको छ। करिडोर जोड्ने कर्णाली पुलको बायाँ पट्टीको उकालो सडक जीर्ण हँुदा दुर्घटनाको जोखिम बढेको थियो।
लिमीमा नेपाल टेलिकमको फोर जी सेवा
हिमालपारीको गाउँको उपमा पाएको लिमीका तीनै गाउँमा नेपाल टेलिकमको फोर जी सेवा सञ्चालनमा आएको छ ।
रारा विमानस्थलमा उडान प्रभावित
नागरिक उड्डयन प्राधिकरणले आन्तरिकतर्फको उडानका लागि नयाँ नियम लागू गर्दा कर्णालीको रारा विमानस्थलमा उडान प्रभावित हुँदै आएको छ ।
पुर्जा नहुँदा मुआब्जाबाट वञ्चित
भेरीगङ्गा नगरपालिका–८ की कमला सुनारले भेरी–बबई डाइभर्सन बहुउद्देश्यीय आयोजनाको प्रभावित क्षेत्रभित्र परेको घरजग्गाको मुआब्जा अझै पाउनुभएको छैन। पाँच दशकदेखि बसोबास गर्दै आएको कमलाको दुई रोपनी नौ आना जग्गा अधिग्रहणमा परेको छ। मुआब्जा मूल्याङ्कन समितिको सिफारिस अनुसार मुआब्जाबापत १६ लाख रुपिया पाउनुपर्ने हो। उक्त रकम पाए स्थायी बसोबासको विकल्प खोज्ने योजना बनाएको कमलाको परिवारले तीन वर्षदेखि अन्योलमै बिताएको छ। स्थायी जग्गाधनी प्रमाण (लालपुर्जा) नहुँदा कमलाले मुआब्जा पाउनुभएको छैन। उहाँले भन्नुभयो, “आयोजना बन्दैछ, हामी खुसी छौँ तर तीन वर्ष भइसक्दा पनि मुआब्जा पाएका छैनौँ, हामीलाई कि मुआब्जा चाहियो, नभए लालपुर्जा दिनुप-यो।”
सर्पदंश उपचार केन्द्र नहुँदा धामीकै भर
मुगुमा सर्पदंश उपचार केन्द्र नहुँदा विषालु सर्पको टोकाइमा धामीझाँक्रीकै भर पर्नुपर्ने अवस्था छ। जिल्लामा एन्टिस्नेक भेनम, आइसियु र भेन्टिलेटर नहुँदा सर्पदंशका बिरामीको उपचारमा समस्या भएको छ। जलवायु परिवर्तन तथा विभिन्न कारणले तराईमा पाइने विषालु सर्प पहाडतर्फ आउने गरेका छन्। छायानाथ रारा नगरपालिका–१२ का कर्णबहादुर बुढाले सर्पदंश उपचारका लागि जिल्ला अस्पताल मुगुले कुनै तयारी नगरेको बताउनुभयो।
