• गोरखापत्र अनलाइन
• ३२ साउन २०८१, शुक्रबार

भेटीबाटै भौतिक पूर्वाधार विस्तार

म्याग्दीको बेनी नगरपालिका–९, गलेश्वरमा रहेको गलेश्वरधाम मन्दिरमा भक्तजनले चढाएको भेटी रकमबाटै भौतिक पूर्वाधार विस्तार गर्ने गरिएको छ । मन्दिरमा साउन महिनाका सबै सोमबार, बालाचतुर्दशी र शिवरात्रि जस्ता पर्वमा भक्तजनले चढाउने गरेको भेटी सर्वसाधारणको उपस्थितिमा मुचुल्का उठाएर गणना गर्ने गरिन्छ । भेटी रकम चढाउने सबै स्थान सिसी क्यामराको निगरानीमा रहने गर्दछ । साउनका सोमबार तथा बालाचतुर्दशी तथा महाशिवरात्रिको भोलिपल्ट बिहान सरोकारावाला निकायको उपस्थितिमा कोषका पदाधिकारीले मुचुल्कामा हस्ताक्षर गरेलगत्तै भेटी राखेको दानपेटिका खोलेर सबैले बसेर पैसा गनिन्छ ।