गाजा, भदौ ६ गते । इजरायली सेनाले गाजा शहरमा शुक्रबार गरेको आक्रमणमा कम्तिमा १३ जना प्यालेस्टिनीको मृत्यु हुनुका साथै अन्य धेरै घाइते भएको जनाइएको छ । प्यालेस्टिनी समाचार एजेन्सी (वफा)का अनुसार मध्य गाजा सहरको जाला स्ट्रिटमा इजरायली हवाई आक्रमणले विस्थापितको शिविरमा प्रहार गर्दा एउटै परिवारका पाँच जना सदस्यको मृत्यु हुनुका साथै अन्य घाइते भएका छन् ।
इजरायली सेनाले शेख रादवानस्थित एक विद्यालयमा प्रहार गर्दा पाँच जना सर्वसाधारणको ज्यान जानुका साथै अन्य धेरै घाइते भएको जनाइएको छ । अगस्ट ११ देखि, इजरायले गाजामा निरन्तर आक्रमण गर्दा सामूहिक विस्थापन हुनुका साथै घर ध्वस्त भएको प्यालेस्टिनी अधिकारीले बताएका छन् । रासस/क्यूएनए
