च्यालेन्ज गल्फमा सन्जय र भुवनको अग्रता
काठमाडौँ, वैशाख ७ गते । सूर्य नेपाल च्यालेन्ज गल्फ प्रतियोगिातको दोस्रो दिन सन्जय लामा र भुवन कुमार रोक्काले अग्रता लिनुभएको छ । पार ६८ को रोयल नेपाल गल्फ क्लबमा मंगलबारदेखि सुरु भएको प्रतियोगितामा बुधबार सन्जयले ६ अन्डर ६२ र भुवनले चार अन्डर ६४ खेल्नुभयो । ३६ होलको समाप्तिसँगै सन्जय र भुवनको कूल आठ अन्डर एक सय २८ स्कोर छ । सन्जयले पहिलो दिन दुई अन्डर ६६ र भुवनले चार अन्डर ६४ खेल्नुभएको थियो । कूल सात अन्डर एक सय २९ स्कोरका साथ सूर्य प्रसाद शर्मा तेस्रो, ६ अन्डर एक सय ३० स्कोरका साथ दीपक मगर चौथो तथा पाँच अन्डर एक सय ३१ को समान स्कोर बनाउन सफल भुवन नगरकोटी र रवि खड्का संयुक्त पाँचौँ स्थानमा हुनुहुन्छ । पहिलो दिन ६ अन्डर खेल्नु भएको रविले दोस्रो दिन एक ओभर ६९ मा चित्त बुझाउनुभयो । यसैगरी एमेच्योरतर्फ सुवास तामाङ शीर्षस्थानमा हुनुहुन्छ । सुवासको कूल तीन अन्डर एक सय ३३ स्कोर छ । एक सय ४२ स्कोर सहित सुरेस तामाङ दोस्रो स्थानमा हुनुहुन्छ । बुधबार ३६ होलको समाप्तिसँगै कूल ११ ओभर एक सय ४७ स्कोरसम्म खेल्ने २६ खेलाडी थप ३६ होलको फाइनल राउन्डमा प्रवेश गरेका छन् । नेपाल प्रोफेसनल गल्फर्स एसोसिएसनले आयोजना गरेको सूर्य नेपाल गल्फ टुर अन्तर्गत बर्षको छैटौँ स्पर्धामा २२ एमेच्योर सहित ५९ गल्फरको सहभागिता रहेको थियो । कूल पाँच लाख ४५ हजार पुरस्कार राशी रहेको चारदिने प्रतियोगितामा प्रोतर्फको विजेताले एक लाख, उपविजेताले ६५ हजार र तेस्रो हुनेले ४६ हजार रुपियाँ पुरस्कार पाउनेछन् । प्रोतर्फ फाइनलमा पुग्ने शीर्ष २१ खेलाडीलाई समेत आकर्षक नगद पुरस्कार प्रदान गरिने बताईएको छ । एमेच्योर तर्फको विजेताले आकर्षक ट्रफी हात पार्नेछन् ।
राष्ट्रिय बक्सिङ : चन्द्रकला र नाङजा सेमिफाइनलमा
काठमाडौँ, वैशाख ७ गते । नेपाल आर्मी क्लबकी चन्द्रकला थापा र एपिएफकी नाङजा बुढामगर वीर गणेशमान सिंह स्मृति राष्ट्रिय बक्सिङ प्रतियोगिताको महिला ५७ केजीमा बुधबार सेमिफाइनलमा प्रवेश गर्नुभएको छ । बसन्तपुर डबलीमा जारी प्रतियोगितामा चन्द्रकलाले स्वस्तिका तिरुवा तथा नाङजाले लुम्बिनी प्रदेशकी जानकी थापामगरलाई पराजित गर्नुभयो । वीर गणेशमान सिंह स्पोर्ट्स कमिटीद्वारा आयोजित प्रतियोगिताको महिला ५१ केजीमा एपिएफकी सन्जुमाया थिङले कर्णाली प्रदेशकी आरती विक तथा नेपाल प्रहरीकी दिवाना शेर्माले गण्डकी प्रदेशकी अस्मिता थापालाई हराउँदै सेमिफाइनलमा स्थान बनाउनुभयो । महिला ६० केजीमा बाग्मती प्रदेशकी शशिकला राईले गण्डकीकी जोशिका श्रेष्ठ तथा आर्मीकी संगिता डंगोलले कर्णालीकी मनीषा मगरको चुनौती समाप्त पार्दै सेमिफाइनल यात्रा तय गर्नुभएको छ । यसैगरी पुरुष ६३ केजीमा प्रहरीका भूपेन्द्र थापामगरले मधेश प्रदेशका रावन अलीलाई पन्छ्याउदै सेमिफाइनलमा पुग्नुभएको छ । सोही स्पर्धामा एपिएफका सोनाम सार्की पनि सेमिफाइनलमा पुग्नुभएको छ । उहाँले गण्डकीका निश्चल गुरुङमाथि जित निकाल्नुभयो । पुरुष ६९ केजीमा प्रहरीका सनिल शाहीले एपिएफका विक्रम चौधरी तथा सुदूरपश्चिम प्रदेशका भरत चन्दले कर्णालीका प्रशान्त लामालाई पाखा लगाउँदै सेमिफाइनल यात्रा तय गर्नुभयो । भूपेन्द्र र सनिल १३औँ दक्षिण एसियाली खेलकुद (साग) का स्वर्णधारी हुनुहुन्छ । पुरुष ५२ केजीमा आर्मीका प्रेम चौधरीले गण्डकीका आकाश राना र प्रहरीका चन्द्रबहादुर थापाले प्रदेश १ का धर्मेन्द्र राई तथा ५७ केजीमा प्रहरीका शम्भु राजवंशीले प्रदेश १ का भुगोल लिम्बू र आर्मीका इन्द्र सुनारले कर्णालीका पारस शाहीलाई निराश पार्दै सेमिफाइनलमा स्थान बनाउनुभयो । पुरुष ७५ केजीमा आर्मीका दिपेश लामाले बाग्मतीका निश्चल विष्ट र मधेसका कोसिश श्रेष्ठले एपिएफका झलक रोक्का तथा ८१ केजीमा आर्मीका दीपक श्रेष्ठले एपिएफका साजन तामाङलाई हराउँदै सेमिफाइनलमा स्थान पक्का गर्नुभयो । पुरुष ९१ केजीमा एपिएफका रविन नेपालले मधेशका विजय राजभण्डारीलाई पाखा लगाउँदै सेमिफाइनलमा पुग्नुभयो । सोही स्पर्धामा गण्डकीका किरन विकले लुम्बिनीका केशर खत्रीवाट वाकओभर पाउदै सेमिफाइनलमा स्थान सुरक्षित गर्नुभयो ।
नवौँ राष्ट्रिय खेलकुदमा ‘एनआरएनए’ छुट्टै टोली
काठमाडौँ, वैशाख ७ गते । गैरआवासीय नेपालीको संस्था (एनआरएनए) ले गण्डकी प्रदेशमा आयोजना हुन लागेको नवौँ राष्ट्रिय खेलकुद प्रतियोगितामा छुट्टै टोलीको रुपमा भाग लिन लागेको छ । राष्ट्रिय खेलकुद परिषद् (राखेप) ले एनआरएनएलाई पनि प्रदेश र विभागीय टोली नेपाल आर्मी, एपएिफ र नेपाल पुलिस क्लब जस्तै छुट्टै टोलीको रुपमा सहभागिताको अवसर दिएको हो । छुट्टै टोलीको रुपमा राष्ट्रिय खेलकुदमा सहभागिताको मौका पाउनु विदेशमा बस्दै आएका नेपाली खेलाडीलाई खुशीको कुरा भएको एनआरएनए अन्तर्गत स्पोर्ट्स एकेडेमीका टेक्निकल डाईरेक्टर स्वयम्भूराज डंगोलले जानकारी दिनुभयो । ‘विदेशमा बसेका खेलाडीलाई मौका दिँदा यसले देशको प्रतिष्ठा बढाउँछ । त्यहाँको नयाँ प्रविधिमा अभ्यास गरिरहेका खेलाडीले पछि अन्तर्राष्ट्रिय प्रतियोगितामा नेपालका लागि पदक दिलाउन सक्ने सम्भावना बढी छ । यसले अन्तमा नेपाललाई नै फाइदा पुग्ने हो,’ डंगोलले गोरखापत्रसँग भन्नुभयो । राखेपसँगको छलफलसँगै एनआरएनएले यसपटक समूह र व्यक्तिगत विधाका विभिन्न १८ वटा खेलमा सहभागिता जनाउन लागेको पनि डंगोलले बताउनुभयो । एनआरएनएलाई यसअघि नेपालगन्जमा आयोजना भएको आठौँ राष्ट्रिय खेलकुददेखि सहभागिताको मौका दिइएको हो । त्यतिबेला पटकपटक प्रतियोगिता सरेका कारण एनआरएनएका १५ जना खेलाडीले तेक्वान्दो, बक्सिङ, पौडी, कराँते, लनटेनिस र ब्याडमिन्टन खेलमा मात्र भाग लिएका थिए । भाग लिएका सबै खेलाडीले पदक जितेका थिए । डंगोलका अनुसार यसपटक एनआरएनएबाट १८ खेलमा दुई सय १५ जना खेलाडीले सहभागिता जनाउने तयारी गरेका छन् । केही खेलका खेलाडीले नेपालमै बसेर अभ्यास र तयारी गरिरहेका छन् । एनआरएनएले आर्चरी, एथ्लेटिक्स, ब्याडमिन्टन, बक्सिङ, चेस, क्रिकेट, फुटबल, जुडो, कराते, लनटेनिस, स्फ्ट टेनिस, पौडी, टेबलटेनिस, भलिबल, तेक्वान्दो, बास्केटबल, उसु र रग्बीमा सहभागिता जनाउने तयारी गरिरहेको छ । केही खेल थपघट हुनसक्ने पनि डंगोलले बताउनुभयो ।चैत ३० गते बसेको मन्त्रिपरिषद् बैठकले नवौँ राष्ट्रिय खेलकुद आगामी जेठ २२ देखि २८ गतेसम्म गर्ने मिति तय गरेको थियो । सोही अनुसार राखेप अहिले नवौँ राष्ट्रिय खेलकुद आयोजनाको तयारीमा जुटेको छ । राखेपले गण्डकी प्रदेशका ११ वटै जिल्लामा कम्तीमा एउटा खेल आयोजना गर्ने गरी तयारी गरेको छ ।नवौँ राष्ट्रिय खेलकुदमा विभिन्न ३८ खेल समावेश गर्ने प्रस्ताव भएको छ । राखेप सदस्य सचिव टंकलाल घिसिङको संयोजकत्वमा हालै बसेको सातवटै प्रदेश खेलकुद परिषद्का सदस्य सचिव, विभागीय टोली एपिएफ, आर्मी र पुलिस तथा नेपाल ओलम्पिक कमिटीका प्रतिनिधिसँगको छलफलमा ३८ खेल समावेस गरिने प्रस्ताव भएको हो । यसलाई शुक्रबार बस्ने राखेपको बोर्ड बैठकले अन्तिम टुंगो लगाउने छ । राखेपले नवौँ राष्ट्रिय खेलकुदका लागि आइतबार मात्र वैशाख ११ गतेसम्म लोगो, मस्कट, गीत रचना र नारा पेश गर्न सार्वजनिक सूचनामार्फत आव्हान गरेको थियो । प्रत्येक दुई वर्षमा आयोजना हुनुपर्ने राष्ट्रिय खेलकुद प्रतियोगिता पछिल्लो पटक आठौँ संस्करण २०७५–०७६ मा नेपालगन्ज (हाल लुम्बिनी प्रदेश) मा भएको थियो । एक वर्षअघि २०७७ फागुन २१ देखि २८ सम्म आयोजना हुने तय भएको राष्ट्रिय खेलकुद कोभिड–१९ (कोरोना महामारी) का कारण स्थगित भएको थियो ।
आर्मीलाई मुख्यमन्त्री कबड्डी उपाधि
कैलाली, वैशाख ७ गते । मुख्यमन्त्री राष्ट्रिय पुरुष कबड्डी प्रतियोगिताको उपाधि विभागीय टोली नेपाल आर्मी क्लबले जितेको छ । धनगढीमा बुधबार भएको फाइनलमा आर्मीले विभागीय टोली नेपाल एपिएफ क्लबलाई ४०–१६ ले हरायो । उपाधिसँगै आर्मीले एक लाख ५० रुपियाँ पुरस्कार पायो । उपविजेता एफिएफले ८० हजारमा रुपियाँ प्राप्त गर्यो । सेमिफाइनलमा पुगेका सुदूरपश्चिम र लुम्बीनी प्रदेशले ४०/४० हजार रुपियाँ पुरस्कार पाए । कैलाली जिल्ला कबड्डी सङ्घको आयोजनामा भएको प्रतियोगिताका विजेता टोली र खेलाडीलाई सुदूरपश्चिम प्रदेश सरकारका सामाजिक विकास मन्त्री गोविन्द बाेहोरा, प्रदेश खेलकुद परिषद्का सदस्यसचिव दीपकबहादुर सिंहलगायतले पुरस्कार प्रदान गर्नुभयो ।
कोपा इटालिया : मिलान डर्वीमा इन्टरको बाजी
काठमाडौँ, वैशाख ७ गते । इन्टर मिलान कोपा इटालिया कपको फाइनलमा प्रवेश गरेको छ । मंगलबार राति भएको मिलान डर्वीमा एसी मिलानलाई ३–० गोलले हराउँदै इन्टर मिलान फाइनलमा पुगेको हो । इन्टरले समग्रमा ३–० गोलकै जित निकाल्यो । यसअघि पहिलो लेग गोलरहित बराबरीमा सकिएको थियो । इन्टरको जितमा लोउटारो मार्टिनेजले दुई तथा रोविन गोसेन्सले एक गोल गर्नुभयो । इन्टरले चौथो मिनेटमा मार्टिनेजको गोलबाट अग्रता लिएको थियो । ४०औँ मिनेटमा मार्टिनेजले जोआक्विन कोरेआको पासमा व्यक्तिगत दोस्रो गोल गर्दै टोलीको अग्रता दोब्बर बनाउनुभयो । त्यसपछि ८२औँ मिनेटमा रोविन गोसेन्सले गोल गर्दै इन्टरलाई सजिलै जिताउनुभयो । अब फाइनलमा इन्टरले युभेन्ट्स र फियोरेन्टिनाबीचको विजेतासँग प्रतिस्पर्धा गर्नेछ । फाइनल खेल मे ११ तारिख हुनेछ । युभेन्ट्स र फियोरेन्टिनाको दोस्रो लेग आज (बुधबार) राति हुनेछ । पहिलो लेगमा युुभेन्ट्स १–० गोलले विजयी भएको थियो । एजेन्सी
युनाइटेडमाथि लिभरपुलको सानदार जित
काठमाडौँ, वैशाख ७ गते । इङ्लिस प्रिमियर लिगको उपाधि होडमा रहेको लिभरपुलले बलियो प्रतिद्वन्दी म्यानचेस्टर युनाइटेडमाथि सानदार जित निकालेको छ । घरेलु मैदानमा मंगलबार राति भएको खेलमा लिभरपुलले युनाइटेडलाई ४–० गोलले हरायो । लिभरपुलको फराकिलो जितमा मोहम्मद सलाहले दुई तथा लुइस डियाज र साडियो मानेले एक एक गोल गर्नुभयो । एकपक्षीय खेलमा लिभरपुलले पाँचौँ मिनेटमा गोलको खाता खोलेको थियो । लुइस डियाजले गोल गर्दै घरेलु टोलीको उत्साह जगाउनुभयो । २२औँ मिनेटमा मोहम्मद सलाहले साडियो मानेको पासमा गोल गर्दै लिभरपुलको अग्रता दोब्बर बनाउनुभयो । दोस्रो हाफमा दुई गोल थपेको लिभरपुलका लागि मानेले ६८औँ र सलाहले ८५औँ मिनेटमा गोल गर्नुभएको थियो । यस जितसँगै लिभरपुलले लिग जित्ने सम्भावना बलियो बनाएको छ । जितसँगै शीर्षस्थानमा उक्लिएको लिभरपुलको ३२ खेलबाट ७६ अंक पुगेको छ । एक खेल कम खेलेको म्यानचेस्टर सिटी ७४ अंक सहित दोस्रो स्थानमा छ । हारसँगै ५४ अंक बनाएको युनाइटेड छैटौँ स्थानमा छ । एजेन्सी
आयोजक विवाइसी महिला गोल्डकपको सेमिफाइनलमा
काठमाडौँ, वैशाख ७ गते । आयोजक वनदेवी युवा क्लब (विवाइसी) कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको सेमिफाइनलमा पुगेको छ । धनगढी रंगशालामा मंगलबार राति भएको खेलमा कालिका स्पोर्ट्स एकेडेमीलाई २–० गोलले हराउँदै विवाइसी अन्तिम चारमा पगेको हो ।विवाइसीको जितमा दुवै गोल चन्द्रा भण्डारीले गर्नुभयो । चन्द्राले चन्द्राले छैटौँ र ८९औँ मिनेटमा गोल गर्नुभएको थियो । उहाँ वमन अफ दि म्याच समेत चुनिनुभयो । सेमिफाइनलमा विवाइसीले नेपाल पुलिस क्लबको सामना गर्नेछ । वैशाख १० गतेसम्म सञ्चालन हुने गोल्डकपमा तीन विभागीय सहित आठ टोलीको सहभागिता रहेको थियो । प्रतियोगिताको विजेता टोलीले उपाधिसहित पाँच लाख र उपविजेताले दुई लाख ५० हजार रुपियाँ पुरस्कार पाउनेछन् । प्रतियोगिताको सर्वोत्कृष्ट खेलाडीलाई ५० हजार र विधागत उत्कृष्ट खेलाडीलाई १० हजार रुपियाँ प्रदान गरिने आयोजकले जनाएको छ ।
वीर गणेशमान बक्सिङ : मिनु क्वार्टरफाइनलमा
काठमाडौँ, वैशाख ६ गते । नेपाल आर्मीकी मिनु गुरुङ वीर गणेशमान सिंह स्मृति राष्ट्रिय बक्सिङ प्रतियोगितामा क्वार्टरफाइनलमा प्रवेश गर्नुभएको छ । बसन्तपुर डबलीमा मंगलबारदेखि सुरु भएको प्रतियोगितामा महिला ५१ केजीमा १३औँ दक्षिण एसियाली खेलकुद (साग) की स्वर्णधारी मिनुले मधेश प्रदेशकी रमिशा श्रेष्ठलाई पराजित गर्नुभयो । सोही स्पर्धामा एपीएफकी सन्जुमाया थिङले प्रदेश १ की सुस्मिता श्रेष्ठलाई हराउनुभयो । महिला ५७ केजीमा बाग्मती प्रदेशकी स्वस्तिका तिरुवाले कर्णाली प्रदेशकी सुशिला थापा तथा प्रदेश १ की सुस्मिता राईले सुदूरपश्चिम प्रदेशकी सन्जिता चौधरीलाई पाखा लगाउँदै क्वार्टरफाइनलमा स्थान बनाउनुभयो । वीर गणेशमान सिंह स्पोर्ट्स कमिटीद्वारा आयोजित प्रतियोगिताको पुरुष ५२ केजीमा गण्डकी प्रदेशका आकाश रानाले लुम्बिनी प्रदेशका सुरज ओली तथा एपीएफका प्रदीप महर्जनले कर्णाली प्रदेशका मोहन गुरुङलाई हराउँदै क्वार्टरफाइनलमा पुग्नुभयो । पुरुष ५७ केजीमा नेपाल प्रहरी क्लबका शम्भु राजवंशीले सुदूरपश्चिमका रामबहादुर थापा तथा एपीएफका पुरन राईले बाग्मती प्रदेशका मार्सल गुरुङलाई पाखा लगाउँदै क्वार्टरफाइनलमा स्थान बनाउनुभयो । पुरुष ६३ केजीमा एपीएफका सोनाम सार्की र लुम्बिनीका अनिल पुनमगरले क्वार्टरफाइनलमा स्थान सुरक्षित गर्नुभयो । सोनामले सुदूरपश्चिमका वीरेन्द्र रावल तथा अनिलले प्रदेश १ का तोविन प्रधानको चुनौती पन्छाउनु भएको थियो । पुरुष ६९ केजीमा एपीएफका विक्रम चौधरीले मधेशका सचिन शाक्य तथा लुम्बिनीका विकास रानामगरले गण्डकीका सुनिल विकलाई निराश पार्दै क्वार्टरफाइनलमा स्थान पक्का गर्नुभयो । पुरुष ७५ केजीमा क्वार्टरफाइनलमा पुग्न सफल आर्मीका दीपेश लामाले लुम्बिनीका गणेश सुनारमाथि जित निकाल्नुभयो । प्रतियोगिताको गणेशमान सिंह फाउन्डेसनका अध्यक्ष प्रकाशमान सिंहले एक कार्यक्रमबीच उद्घाटन गर्नुभएको थियो । उद्घाटन अवसरमा १३औँ सागका स्वर्णधारी मिनुसहित भुपेन्द्र थापामगर, सनिल शाही र मिनु गुरुङलाई नगदसहित सम्मान गरिएको थियो । उहाँहरुलाई नेपाल बक्सिङ संघ एवं आयोजक कमिटीका सदस्य ओमनारायण श्रेष्ठले व्यक्तिगत एक एक लाख रुपियाँ पुरस्कार प्रदान गर्नुभएको हो ।
सूर्य नेपाल च्यालेन्ज गल्फमा रविको अग्रता
काठमाडौँ, वैशाख ६ गते । ‘सूर्य नेपाल च्यालेन्ज’ गल्फ प्रतियोगिातको पहिलो दिन रवि खड्काले अग्रता लिनुभएको छ । पार ६८ को रोयल नेपाल गल्फ क्लबमा मंगलबारदेखि सुरु भएको प्रतियोगितामा रविले ६ अन्डर ६२ खेल्नुभयो । सूर्य नेपाल गल्फ टुर अन्तर्गत बर्षको छैटौँ स्पर्धामा रविले पहिलो नौ होलमा चार अन्डर ३० र पछिल्लो नौ होलमा दुई अन्डर ३२ स्कोर राख्नुभयो । चारअन्डर ६४ स्कोरका साथ दीपक थापा र भुवन कुमार रोका संयुक्त दोस्रो स्थानमा हुनुहुन्छ । तीन अन्डर ६५ स्कोरका साग सूर्यप्रसाद शर्मा र भुवन नगरकोटी चौथो स्थानमा हुनुहुन्छ । दुई अन्डर ६६ स्कोर खेल्नेमा एमेच्योर सुवास तामाङ सहित प्रोहरु सन्जय लामा, निरज तामाङ र राम मगर हुनुहुन्छ । नेपाल प्रोफेसनल गल्फर्स एसोसिएसनले आयोजना गरेको चारदिने प्रतियोगितामा २२ एमेच्योर सहित ५९ गल्फरको सहभागिता रहेको छ । ३६ होलको समाप्तिसँगै शीर्ष २१ खेलाडी थप ३६ होलको फाइनल राउन्डमा प्रवेश गर्नेछन् । कूल पाँच लाख ४५ हजार पुरस्कार राशी रहेको प्रतियोगितामा प्रोतर्फको विजेताले एक लाख, उपविजेताले ६५ हजार र तेस्रो हुनेले ४६ हजार रुपियाँ पुरस्कार पाउनेछन् । प्रोतर्फ फाइनलमा पुग्ने शीर्ष २१ खेलाडीलाई समेत आकर्षक नगद पुरस्कार प्रदान गरिने बताईएको छ । एमेच्योर तर्फको विजेताले आकर्षक ट्रफी हात पार्नेछन् ।
वीर गणेशमान राष्ट्रिय बक्सिङ (फोटो फिचर)
काठमाडौँ, वैशाख ६ गते। सर्वोच्च नेता गणेशमान सिंहको स्मृतिमा ‘गणेशमान सिंह स्मृति राष्ट्रिय बक्सिङ’ प्रतियोगिता मंगलबारदेखि काठमाडौँमा सुरु भएको छ। वैशाख १० गतेसम्म सञ्चालन हुने प्रतियोगिताको नेपाली कांग्रेसका नेता एवं स्वर्गीय गणेशमानका छोरा प्रकाशमान सिंहले उद्घाटन गर्नुभयो। बसन्तपुर डबलीमा सञ्चालित प्रतियोगिताको उद्घाटन गर्दै प्रकाशमानले नेपालमा प्रजातन्त्र ल्याउन महत्वपूर्ण योगदान दिनुभएका गणेशमानको स्मृतिमा बक्सिङसँगै रोडरेस, ब्याडमिन्टन जस्ता खेलकुद प्रतियोगिता आयोजना गर्ने बताउनुभयो। उहाँले गणेशमान सिंह फाउन्डेसनले यस प्रतियोगितालाई सरकार र विभिन्न संस्थाको सहयोगमा आगामी वर्षमा पनि निरन्तरता दिने प्रतिबद्धता जनाउनुभयो। वीर गणेशमान सिंह स्पोर्ट्स कमिटीको आयोजना गरेको प्रतियोगिातमा सात प्रदेश र तीन विभागीय टोलीको सहभागिता रहेको छ। जिल्ला र क्षेत्रीय छनोट प्रतियोगिताबाट छनोट भएर आएका खेलाडीबीच अन्तिममा वसन्तपुर डबलीमा भिडन्त भएको हो। प्रतियोगितामा पुरुषतर्फ ४८, ५७, ६३, ६९, ७५, ८१, ९१ केजी गरी सात वटा तौल समूहमा प्रतिस्पर्धा हुनेछ। यसैगरी महिलातर्फ ४८, ५४–५७, ६०, ६४–६९, ६९–७५ केजी गरी पाँच वटा तौल समूहमा प्रतिस्पर्धा हुनेछ। पहिलो दिन मंगलबार पुरुषतर्फ नौ र महिलातर्फ चार तौल समूहमा प्रतिस्पर्धा भएको छ। प्रतियोगितामा प्रदेश १ बाट सात पुरुष र चार महिला, मधेस प्रदेशबाट सात पुरुष र पाँच महिला, बागमती प्रदेशबाट सात पुरुष र तीन महिला खेलाडीले प्रतिस्पर्धा गर्नेछन्। यसैगरी गण्डकी प्रदेशबाट सात पुरुष र तीन महिला, लुम्बिनी प्रदेशबाट ६ पुरुष र चार महिला, कर्णाली प्रदेशबाट ६ पुरुष र चार महिला, विभागीय टोली त्रिभुवन आर्मी क्लबबाट सात पुरुष र पाँच महिला, एपीएफबाट सात पुरुष र पाँच महिला र नेपाल पुलिस क्लबाट चार पुरुष र दुई महिला खेलाडीले प्रतिस्पर्धा गर्नेछन्। प्रतियोगितामा ६५ पुरुष र ३७ महिला गरी कूल १०२ जना खेलाडी सहभागी छन्। प्रतियोगितामा हरेक तौल समूहका विजेताले २५ हजार रुपियाँ पुरस्कार पाउनेछन्। यसैगरी दोस्रो हुनेले १५ हजार र तेस्रो स्थान हात पार्ने दुई खेलाडीले जनही सात हजार पाँच सय रुपियाँ पुरस्कार पाउनेछन्। यसैगरी उत्कृष्ट पुरुष खेलाडीलाई मोटरसाइकल र उत्कृष्ट महिला खेलाडीलाई स्कुटर प्रदान गरिने प्रतियोगिता संयोजक राजीव श्रेष्ठले जानकारी दिनुभयो। तस्बिर: मनोजरत्न शाही
बार्सिलोनालाई काडिजको झट्का
काठमाडौँ, वैशाख ६ गते । स्पेनिस ला लिगाको उपाधि दावेदार टोली बार्सिलोनालाई रेलिगेसनको दबाबमा रहेको काडिजको नमिठो झट्का लागेको छ । घरेलु मैदानमा सोमबार राति भएको खेलमा बार्सिलोना काडिजसँग १–० गोलले स्तब्ध बन्यो ।काडिजको जितमा लुकास पेरेजले निर्णायक गोल गर्नुभयो । पेरेजले ४८औँ मिनेटमा गरेको गोल बार्सिलोनालाई हराउन प्रयाप्त बन्यो । यस हारसँगै बार्सिलोनाको उपाधि जित्ने सम्भावना कमजोर बनेको छ । दोस्रो स्थानमा रहेको बार्सिलोनाको ६१ खेलबाट ६० अंक छ । शीर्षस्थानमा रहेको रियल म्याड्रिडको ३२ खेलबाट ७५ अंक छ । समान ६० अंक बनाएको सेभिया र एट्लेटिको म्याड्रिड तेस्रो र चौथो स्थानमा छन् । बार्सिलोनालाई हराएको काडिज ३१ अंक जोड्दै १६औँ स्थानमा छ । एजेन्सी
महिला गोल्डकप : सावित्राको ह्याट्रिक प्रेरित एपिएफ सेमिफाइनलमा
धनगढी, वैशाख ६ गते । सावित्रा भण्डारीको ह्याट्रिक प्रेरित विभागीय टोली नेपाल एपिएफ क्लब कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको सेमिफाइनलमा प्रवेश गरेको छ । धनगढी रंगशालामा सोमबार राति भएको खेलमा एपिएफले विराटनगर महानगरपालिकालाई ८–० गोलले हरायो । एपिएफको सानदार जितमा सावित्रा भण्डारीले ह्याट्रिक सहित पाँच गोल गर्नुभयो । अनिता बस्नेत, सविता रानामगर र सरु लिम्बुले एक एक गोल थप्नुभएको थियो । एपिएफसामु निरिह बनेको विराटनगरले गोलगर्न लायक अवसर बनाउन सकेन । सावित्रा वमन अफ दिन म्याच हुनुभयो । सेमिफाइनलमा एपिएफले अर्को विभागीय टोली त्रिभुवन आर्मी क्लबसँग प्रतिस्पर्धा गर्नेछ । धनगढीमा पहिलो पटक फर्डलाइड सहित रातिमा आयोजित प्रतियोगितामा तीन विभागीय सहित आठ टोलीको सहभागिता रहेको छ । प्रतियोगिताको विजेता टोलीलाई पाँच लाख र उपविजेतालाई दुई लाख ५० हजार रुपियाँ पुरस्कार प्रदान गरिने आयोजकले जनाएको छ । यसैगरी सर्वोत्कृष्ट खेलाडीलाई ५० हजार र उत्कृष्ट विधाका खेलाडीलाई जनही १० हजार रुपियाँ प्रदान गरिने बताईएको छ । फाइनल खेल वैशाख १० गते हुनेछ ।
तेक्वान्दो खेलाडीको बिदाइ
काठमाडौँ, वैशाख ५ गते । यही अप्रिल २१ देखि २४ तारिखसम्म दक्षिण कोरियाको गोयाङ सहरमा आयोजना हुने विश्व तेक्वान्दो पुम्से च्याम्पियनसिपमा नेपालका पाँच खेलाडीले प्रतिस्पर्धा गर्ने भएका छन् ।च्याम्पियनसिपमा पुरुष ५० वर्षमुनिको समूहमा रोशन खान, ४० वर्षमुनि समूहमा कमल श्रेष्ठ, ३० वर्षमुनिको समूहमा प्रेमबहादुर लिम्बू र पार्वती गुरुङ तथा जुनियरको १७ वर्षमुनिको समूहमा अब्बास अन्सारीले प्रतिस्पर्धा गर्नुहुनेछ । च्याम्पियनसिपमा सहभागी हुन लागेका कमल र पार्वती १३औँ दक्षिण एसियाली खेलकुद (साग) का स्वर्ण विजेता हुनुहुन्छ । टोलीलाई सोमबार नेपाल तेक्वान्दो संघले बिदाइ गरेको छ । च्याम्पियनसिपमा स्वर्ण जितेमा एक लाख ५० हजार, रजत पदक जितेमा एक लाख र कांस्य पदक जितेमा ५० हजार नगद पुरस्कार प्रदान गरिने पनि संघले जनाएको छ ।
गणेमान सिंह बक्सिङ मंगलबारदेखि
काठमाडौँ, वैशाख ५ गते । सर्वोच्च नेता गणेशमान सिंहको स्मृतिमा गणेशमान सिंह स्मृति राष्ट्रिय बक्सिङ प्रतियोगिता मंगलबारदेखि काठमाडौँमका सुरु हुने भएको छ । वीर गणेशमान सिंह स्पोर्ट्स कमिटीको आयोजनामा हुने प्रतियोगितामा सात प्रदेश र तीन विभागीय टोलीको सहभागिता रहनेछ ।काठमाडौँको बसन्तपुर डबलीमा शनिबारसम्म सञ्चालन हुने प्रतियोगिताको सम्पूर्ण तयारी पूरा भएको प्रतियोगिता संयोजक राजीव श्रेष्ठले जानकारी दिनुभयो । ‘प्रतियोगितामा सहभागिता जनाउन सातै प्रदेशका खेलाडी, प्रशिक्षक र टिम व्यवस्थापक काठमाडौँ आइसकेका छन् । हामी सबै खेलाडी, प्रशिक्षक र अफिसियलको ब्यवस्थापनमा जुटेका छौँ,’ श्रेष्ठले भन्नुभयो । प्रतियोगितामा पुरुषतर्फ ४८, ५७, ६३, ६९, ७५, ८१, ९१ केजी गरी सात वटा तौल समूहमा प्रतिस्पर्धा हुनेछ । यसैगरी महिलातर्फ ४८, ५४-५७, ६०, ६४-६९, ६९-७५ केजी गरी पाँच वटा तौल समूहमा प्रतिस्पर्धा हुनेछ ।प्रतियोगितामा प्रदेश १ बाट सात पुरुष र चार महिला, मधेश प्रदेशबाट सात पुरुष र पाँच महिला, बागमती प्रदेशबाट सात पुरुष र तीन महिला खेलाडीले प्रतिस्पर्धा गर्नेछन् । यसैगरी गण्डकी प्रदेशबाट सात पुरुष र तीन महिला, लुम्बिनी प्रदेशबाट ६ पुरुष र चार महिला, कर्णाली प्रदेशबाट ६ पुरुष र चार महिला, विभागीय टोली त्रिभुवन आर्मी क्लबबाट सात पुरुष र पाँच महिला, एपीएफबाट सात पुरुष र पाँच महिला र नेपाल पुलिस क्लबाट चार पुरुष र दुई महिला खेलाडीले प्रतिस्पर्धा गर्ने छन् । प्रतियोगितामा ६५ पुरुष र ३७ महिला गरी १०२ जना खेलाडीले प्रतिस्पर्धा गर्नेछन् ।प्रतियोगिताका हरेक तौल समूहका विजेताले २५ हजार रुपियाँ पुरस्कार पाउनेछन् । यसैगरी दोस्रो हुनेले १५ हजार र तेस्रो स्थान हात पार्ने दुई खेलाडीले जनही सात हजार पाँच सय रुपैयाँ पुरस्कार पाउनेछन् । यसैगरी उत्कृष्ट पुरुष खेलाडीलाई मोटरसाइकल र उत्कृष्ट महिला खेलाडीलाई स्कुटर प्रदान गरिने पनि प्रतियोगिता संयोजक श्रेष्ठले जानकारी दिनुभयो ।
पीएसजी फ्रेन्च लिगको उपाधि नजिक
काठमाडौँ, वैशाख ५ गते । पेरिस सेन्ट जर्मेन (पीएसजी) फ्रेन्च लिग वान फुटबलको उपाधि नजिक पुगेको छ । घरेलु मैदानमा आइतबार राति भएको खेलमा दोस्रो स्थानको मार्सेलीलाई २-१ गोलले हराउँदै पीएसजी उपाधि नजिक पुगेको हो । पीएसजीलाई जित दिलाउन नेयमार र केलियन एमबाप्पेले गोल गर्नुभयो । मार्सेलीका डुजे कालेटा कारले सान्त्वना गोल फर्काउनुभयो । नेयमारले १२औँ मिनेटमा खाता खोल्नुभएको थियो । ३१औँ मिनेटमा डुजे कालेटा कारले गोल गर्दै मार्सेलीलाई खेलमा फर्काउने प्रयास गर्नुभयो । तर, पहिलो हाफको इन्जुरी समयमा एमबाप्पेले पेनाल्टीमार्फत गोल गर्दै पीएसजीलाई पुनः अग्रता दिलाउनुभयो । त्यसपछि थप गोल नहुँदा पीएसजी विजयी भयो । जितसँगै पीएसजीले शीर्षस्थानमा १५ अंकको अग्रता बनाएको छ । पीएसजीको ३२ खेलबाट ७४ अंक पुगेको छ । पराजित मार्सेली ५९ अंक सहित दोस्रो स्थानमा छ । एजेन्सी
सूर्य गल्फमा अनुभव साट्दै बेलायती गल्फर
काठमाडौँ, वैशाख ५ गते । सूर्य नेपाल गल्फ टुर अन्तर्गत बर्षको छैटौँ स्पर्धा ‘सूर्य नेपाल च्यालेन्ज’ मंगलबार देखि पार ६८ को रोयल नेपाल गल्फ क्लबमा सुरु हुँदैछ । नेपालकै पूरानो गल्फ कोर्समा सञ्चालन हुने चार दिने प्रतियोगितामा सात जना नेपाली मूलका बेलायती गल्फरको समेत सहभागिता रहने सोमबार आयोजित पत्रकार सम्मेलनमा आयोजक नेपाल प्रोफेसनल गल्फर्स एसोसिएसनका महासचिव दीपक आचार्यले जानकारी दिनुभयो । ‘घरेलु गल्फ टुरका कारण पछिल्लो समय नेपाली गल्फरको स्तर बढेको छ । अधिकांश खेलाडीले अन्डर पार स्कोर खेल्न थालेका छन् । यही मेसोमा वेलायतमा रहेका राम्रा एमेच्योर खेलाडीलाई प्रतियोगिातमा सहभागिताको मौका दिईएको हो,’ आचार्यले भन्नुभयो । उहाँका अनुसार पाँच ह्यान्डीक्याप मुनिका सात जना बेलायती गल्फरले नेपाली गल्फरसँग प्रतिस्पर्धा गर्नेछन् । बेलायतका खेलाडीहरुमा महेन्द्र फगामी, विष्णु थापा, राजु तामाङ, समक लिम्बु, गजेन्द्र गुरुङ, भक्त शेरचन र देव राना हुनुहुन्छ । यी मध्ये गजेन्द्र शुन्य ह्यान्डीक्याप खेलाडी हुनुहुन्छ । चारदिने प्रतियोगितामा ३६ प्रो र २० एमेच्योर गरी ५६ खेलाडीको सहभागिता रहनेछ । कूल पाँच लाख ४५ हजार पुरस्कार राशी रहेको प्रतियोगितामा प्रोतर्फको विजेताले एक लाख, उपविजेताले ६५ हजार र तेस्रो हुनेले ४६ हजार रुपियाँ पुरस्कार पाउनेछन् । कूल ७२ होलको स्पर्धामा ३६ होलको समाप्तिसँगै २१ जना शीर्ष खेलाडी थप ३६ होलको फाइनलका लागि छनोट हुनेछन् । प्रोतर्फ फाइनलमा पुग्ने शीर्ष २१ खेलाडीलाई समेत आकर्षक नगद पुरस्कार प्रदान गरिने बताईएको छ । एमेच्योर तर्फको विजेताले आकर्षक ट्रफी हात पार्नेछन् । प्रोतर्फ भुवन नगरकोटी, घरेलु प्रो जयराम श्रेष्ठ, सन्जय लामा, रवि खड्का र राम थापामगरलाई उपाधि दावेदार मानिएको छ । एमेच्योरतर्फ १३औँ दक्षिण एसियाली खेलकुद (साग) का दोहोरो स्वर्ण विजेता सुवास तामाङ मुख्य दावेदार भएको एसोसिएसनले जनाएको छ ।
विश्व तेक्वान्दो च्याम्पियनसिपमा नोर्बु निर्णायक
काठमाडौं, बैशाख ५ गते । नेपालका निर्णाक नोर्बु लामाले सोमबारदेखि दक्षिण कोरियामा सुरु भएको विश्व तेक्वान्दो च्याम्पियनसिपमा निर्णायकको भूमिका निर्वाह गर्दै हुनुहुन्छ ।नेपालका तेक्वान्दो सहायक प्रशिक्षक नोर्बुले पुम्से विधामा निर्णायकको भूमिका निर्वाह गर्न लागेका हुन् । उक्त प्रतियोगिता पुम्सेकै विश्व च्याम्पियनसिप भएको बताइएको छ ।नोर्बुले सन् २०२०, २०२१ र २०२२ मा एसियाली खुला, २०२२ मा विश्व तेक्वान्दो मुजु प्रतियोगितामा निर्णायकको भूमिका निर्वाह गरिसक्नुभएको छ । उहाँले अनलाइन अन्तर्राष्ट्रिय प्रतियोगितामा पनि निर्णायकको जिम्मेवारी सम्हाल्नु भएको छ ।
ला लिगामा रियलको कठिन जित
काठमाडौँ, वैशाख ५ गते । स्पेनिस ला लिगाको उपाधि दौडमा रहेको रियल म्याड्रिडले सेभियामाथि कठिन जित निकालेको छ । आइतबार राति भएको खेलमा रियलले सेभियालाई उसैको मैदानमा ३–२ गोलले हरायो । रियलको कठिन पूनरागमन जितमा रोड्रिगो, नाचो फर्नान्डेस र कप्तान करिम बेन्जेमाले गोल गर्नुभयो । घरेलु टोली सेभियाका इभान राकिटिक र एरिक लमेलाले गोल गर्नुभएको थियो । प्रतिस्पर्धात्मक खेलमा २१औँ मिनेटमा इभान राकिटिकले फ्रिकिकमा गोल गर्दै सेभियालाई सुरुवाती अग्रता दिलाउनुभयो । २५औँ मिनेटमा एरिक लमेलाले जेसस कोरोनाको पासमा गोल गर्दै सेभियाको अग्रता दोब्बर बनाउनुभयो । सेभियाको लगातार दुई गोलपछि जोसिएको रियलले दोस्रो हाफमा सानदार पूनरागमन गरेको थियो । ५०औँ मिनेटमा रोड्रिगोले ड्यानी कार्भाजलको पासमा गोल गर्दै रियललाई खेलमा फर्काएने प्रयास गर्नुभयो । ८२औँ मिनेटमा नाचो फर्नान्डेसले कार्भाजलकै पासमा गोल गर्दै खेललाई बराबरीमा ल्याउनुभयो । इन्जुरी समयमा कप्तान बेन्जेमाले रोड्रिगोको पासमा गोल गर्दै रियललाई महत्वपूर्ण जित दिलाउनुभयो । जारी लिगमा बेन्जेमाको यो २५औँ गोल हो । २८ खेलमा ११ असिस्ट समेत दिनुभएका बेन्जेमा सर्वाधिक गोल कर्ताको शीर्षसुचीमा हुनुहुन्छ । यस जितसँगै शीर्षस्थानमा रहेको रियलले ३२ खेलबाट ७५ अंक बनाएको छ । रियल दोस्रो स्थानको बार्सिलोना र सेभियाभन्दा १५ अंकले अगाडि छ । दुई खेल कम खेलेको बार्सिलोना र ३२ खेल सकेको पराजित सेभियाको समान ६० अंक छ । रियलसँगको हारसँगै सेभियाले दोस्रो स्थानमा उक्लने मौका गुमाएको हो । एजेन्सी
चेल्सी एफए कपको फाइनलमा
काठमाडौँ, वैशाख ५ गते । चेल्सी एफए कप फुटबलको फाइनलमा प्रवेश गरेको छ । लन्डन स्थित वेम्वली स्टेडियममा आइतबार राति भएको खेलमा क्रिस्टल प्यालेसलाई २–० गोलले हराउँदै चेल्सीले फाइनलमा स्थान बनाएको हो ।चेल्सीको जितमा रुवेन लफटस चिक र मासन माउन्टले गोल गर्नुभयो । बल पोसेसनमा अब्बल देखिएको चेल्सीलाई गोल गर्न दोस्रो हाफको अन्तिमसम्म कुर्नुपरेको थियो ।रुवेनले ६५औँ मिनेटमा गोल गर्दै चेल्सीको उत्साह जगाउनुभयो । त्यसपछि ७६औँ मिनेटमा मासन माउन्टले गोल गर्दै चेल्सीको फाइनल यात्रा पक्का बनाउनुभएको थियो । उपाधिका लागि चेल्सीले लिभरपुलसँग प्रतिस्पर्धा गर्नेछ । लिभरपुलले शनिबार राति म्यानचेस्टर सिटीलाई ३–२ गोलले हराउँदै फाइनल यात्रा तय गरेको थियो । चेल्सी र लिभरपुलको फाइनल भिडन्त मे १४ तारिख हुनेछ । एजेन्सी
आर्मी महिला गोल्डकपको सेमिफाइनलमा
धनगढी, वैशाख ५ गते । विभागीय टोली त्रिभुवन आर्मी क्लब कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको सेमिफाइनलमा प्रवेश गरेको छ । धनगढी रंगशालामा आइतबार राति भएको खेलमा आर्मीले बागमती युवा क्लबलाई ७–० गोलले हरायो । पहिलो हाफमा चार गोल गरेको आर्मीले दोस्रो हाफमा तीन गोल थपेको थियो । आर्मीको फराकिलो जितमा कुसुम खतिवडा र अमिषा कार्कीले समान दुई तथा इन्दिरा राई र दीपा शाहीले एक गोल गर्नुभयो । अर्को गोल आर्मीले वागमतीबाट आत्मघाती उपहार पाएको थियो । खेलभर आर्मीको दबाब झेलेको बागमतीले गोल गर्न लायक अवसर बनाउन सकेन । अव सेमिफाइनलमा आर्मीले एपीएफ र विराटनगर महानगरपालिका बीचको विजेतासँग प्रतिस्पर्धा गर्नेछ । वैशाख १० गतेसम्म सञ्चालन हुने प्रतियोगितामा तीन विभागीय सहित आठ टोलीको सहभागिता रहेको छ । प्रतियोगिताको विजेता टोलीलाई पाँच लाख र उपविजेतालाई दुई लाख ५० हजार रुपियाँ पुरस्कार प्रदान गरिने आयोजकले नाएको छ । यसैगरी सर्वोत्कृष्ट खेलाडीलाई ५० हजार र उत्कृष्ट विधाका खेलाडीलाई जनही १० हजार रुपियाँ प्रदान गरिने बताईएको छ ।
नेपालले अफगानिस्तानसँग मैत्रीपूर्ण फुटबल खेल्ने
काठमाडौँ, वैशाख ४ गते । नेपाली राष्ट्रिय फुटबल टोलीले अफगानिस्तानसँग दुई वटा मैत्रीपूर्ण फुटबल खेल्ने भएको छ । अखिल नेपाल फुटबल संघ (एन्फा) का अनुसार नेपालले जेठ ११ र १५ गते कतारको दोहामा अफगानिस्तानसँग फुटबल खेल्न लागेको हो । एएफसी एसिया कप छनोट तेस्रो चरणको तयारीमा रहेको नेपालले त्यसैको तयारीका लागि अफगानिस्तानसँग दुई वटा अन्तर्राष्ट्रिय मैत्रीपूर्ण खेल खेल्न लागेको नेपाली टोलीका म्यानेजर मधुसुदन उपाध्यायले जानकारी दिनुभयो । नेपाली टोलीले अहिले एएफसी एसिया कप छनोट खेलको बन्द प्रशिक्षण सुरु गरिसकेको छ । टोलीका प्रशिक्षक अब्दुल्लाह अल्मुताइरीले २५ सदस्सीय खेलाडी छनोट गरी तयारी सुरु गर्नुभएको हो । एएफसी एसिया कप छनोटमा नेपाल समूह ‘ए’ मा रहेको छ । तुलनात्मक रुपमा नेपालका लागि यो कठिन समूह हो । यस समूहमा नेपालसँगै कुवेत, जोर्डन र इन्डोनेसिया रहेको छ । छनोट खेल जुन ८ देखि १४ तारिखसम्म कुवेतमा हुनेछ । समूहको शीर्ष टोली र पाँच समूहको उत्कृष्ट उपविजेता टोली सन् २०२३ मा चीनमा आयोजना हुने एसिया कपमा छनोट हुनेछ ।
नवौँ राष्ट्रिय खेलकुद समयमै : सदस्य सचिव घिसिङ
काठमाडौँ, वैशाख ४ गते । राष्ट्रिय खेलकुद परिषद् (राखेप) का सदस्य सचिव टंकलाल घिसिङ नवौँ राष्ट्रिय खेलकुद प्रतियोगिता निर्धारित समयमै आयोजना हुने बताउनुभएको छ । आइतबार प्रदेश खेलकुद विकास समितिका सदस्य सचिव, तीन विभागीय टोलीका प्रतिनिधि, नेपाल ओलम्पिक कमिटीका प्रतिनिधिको उपस्थितिमा भएको नवौँ राष्ट्रिय खेलकुद समन्वय समितिको पहिलो बैठकलाई सम्बोधन गर्दै सदस्य सचिव घिसिङले उक्त कुरा बताउनुभएको हो ।गत साता बसेको मन्त्रीपरिषद्को बैठकले नवौँ राष्ट्रिय खेलकुद जेठ २२ देखि २८ गतेसम्म गण्डकी प्रदेशमा आयोजना गर्ने निर्णय गरेको थियो । ‘राष्ट्रिय खेलकुद निर्धारित समयमै हुन्छ । हुन्छ कि हुँदैन भन्ने संशय नराख्नु होला । प्रतियोगितालाई सफलतापूर्वक सम्पन्न गर्न आआफ्नो स्तरबाट तयारी अगाडि बढाउन आग्रह गर्छु,’ घिसिङले भन्नुभयो । प्रतियोगिता र पूर्वाधारको व्यस्थापन र समन्वय गर्न आवश्यक रहेकोले सरोकारवालासँग पहिलो बैठक बोलाईएको पनि घिसिङले बताउनुभयो । बैठकले राखेपको छिट्ट बस्न लागेको बोर्र्ड बैठकका लागि एजेन्डा तय गर्न सहज भएको पनि घिसिङले बताउनुभयो । ‘नवौँ राष्ट्रिय खेलकुदका लागि बजेट निर्माण कमिटी र निर्देशिका तयार गर्ने कमिटी पनि गठन भइसकेको छ । राखेप खेलाडीको नगद पुरस्कार, कीर्तिमानधारीको नगद पुरस्कार, खेलाडीको भत्ता वृद्धि गर्ने विषयमा पनि पहल भइरहेको छ,’ उहाँले भन्नुभयो । बैठकमा सहभागी प्रदेशका सदस्य सचिवहरुले कर्मचारी व्यवस्थापन गरिदिनु पर्ने, पूर्वाधारको मर्मत सम्भार गर्नु पर्ने, छनोट प्रतियोगिताको विधि, प्रतियोगिता र पूर्वाधारमा समन्वय, आयोजक प्रदेशलाई १-२ खेल थप्न पाउने प्रावधान बनाउनु पर्ने, एनआरएनलाई पनि समावेश गर्न पहल गर्नु पर्ने, ऐनमा भएका जटीलतालाई फुकाउनु पर्ने, खरिदलगायतका कुरा निर्देशिकामा स्पष्ट हुनु पर्ने, गण्डकी प्रदेशका सबै जिल्लाले अपनत्व गर्ने गरी सबै जिल्लामा प्रतियोगिता सञ्चालन गर्नु पर्नेलगायतका विषयमा धारणा राख्नुभएको थियो । राखेपअन्तर्गत तालिम तथा प्रशिक्षण विभागका उपनिर्देशक हिमालराज दाहालले राष्ट्रिय खेलकुदको महत्व, सहभागी हुने टिम, खेल संख्या, खेलाडीलगायत सहभागी संख्या, नवौं राष्ट्रिय खेलकुदको स्वरुपलगायतका विषयमा प्रकाश पार्नुभएको थियो । बैठकमा ६ प्रदशेका सदस्य सचिव, नेपाल ओलम्पिक कमिटी, नेपाल प्रहरी, नेपाली सेना र एपीएफका प्रतिनिधिको उपस्थिति रहेको थियो । मधेस प्रदेशमा सदस्यसचिव नियुक्त भइ नसकेकाले महिला, बालवालिका तथा युवा तथा खेलकुद मन्त्रालयका महाशाखा प्रमुख ठूलोबाबु दाहाल बैठकमा उपस्थित हुनुहुन्थ्यो ।
रग्बीमा गोर्खाली क्लब र बडिमालिका च्याम्पियन
काठमाडौँ, वैशाख ४ गते । यू–२० राष्ट्रिय रग्बी प्रतियोगिताको उपाधि गोर्खाली रग्बी क्लब र बडिमालिका रग्बी क्लबले जितेको छ । चितवनको भरतपुरमा भएको प्रतियोगितामा गोर्खाली पुरुषतर्फ र बडिमालिका महिलातर्फ च्याम्पियन बनेको हो ।फाइनलमा गोर्खालीले मकवानपुर रग्वी क्लबलाई ५–३ ले हरायो । महिलातर्फ बडिमालिकाले हिमालयन रग्बी क्लबलाई १०–० ले स्तब्ध बनायो । पुरुषतर्फ गोर्खालीका रोहन डंगोल र महिलामा बडिमालिकाकी अर्पना थापा उत्कृष्ट खेलाडी चुनिनुभयो ।
महिला गोल्डकप : नेपाल पुलिसको विजयी सुरुवात
धनगढी, वैशाख ४ गते। विभागीय टोली नेपाल पुलिस क्लबले प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिता विजयी सुरुवात गरेको छ। कैलालीको धनगढी रंगशालामा शनिबारदेखि सुरु भएको प्रतियोगिताको उद्घाटन खेलमा पुलिसले चन्द्रपुर नगरपालिका रौतहटलाई १-० गोलले हरायो। पुलिसको जितमा रेखा पौडेलले निर्णायक गोल गर्नुभयो। रेखाले ५१औँ मिनेटमा गरेको गोल पुलिसको जितमा पर्याप्त बन्यो। धनगढीमा पहिलो पटक फर्डलाइटमा रात्रिकालीन प्रतियोगिता आयोजना गरिएको हो। वैशाख १० गतेसम्म सञ्चालन हुने प्रतियोगितामा तीन विभागीयसहित आठ टोलीको सहभागिता छ। गोल्डकपको विजेताले पाँच लाख, उपविजेताले दुई लाख ५० हजार रुपियाँ पुरस्कार पाउनेछ। यसैगरी प्रत्येक खेलको ‘वमन अफ दि म्याच’लाई पाँच हजार, प्रतियोगिताको सर्वोत्कृष्ट खेलाडीलाई ५० हजार र विधागततर्फका उत्कृष्ट खेलाडीलाई जनही १० हजार रुपियाँ पुरस्कार प्रदान गरिने आयोजकले जनाएको छ। प्रतियोगिताको मुख्यमन्त्री त्रिलोचन भट्टले उद्घाटन गर्नुभएको थियो।