चिस्यान केन्द्र नहुँदा समस्या
जिल्लामा चिस्यान केन्द्रको व्यवस्था नहुँदा कृषकलाई स्याउ भण्डारण गर्न समस्या भएको छ । कृषकले स्याउ उत्पादन गरेर राम्रो आम्दानी गर्दै चिस्यान केन्द्र नहुँदा उत्पादित स्याउ सस्तो मूल्यमा एकै पटक बिक्री गर्न बाध्य भएका हुन् । छायानाथ रारा नगरपालिका–४, ताल्च रितु नर्सरी फार्मका सञ्चालक किसान मणिचन्द्र भामले जिल्लाकै कृषि क्षेत्र हेर्ने जिल्लाको कृषि विकास कार्यालय र प्रधानमन्त्री कृषि आधुनिकीकरणले स्याउ भण्डारण र सङ्कलनसम्बन्धी तालिमसमेत नदिएको किसानको गुनासो छ । भण्डारण व्यवस्थित हुन सके बेमौसममा पनि स्याउ बिक्री गर्न सकिने उहाँको अपेक्षा छ ।
देउडा महोत्सव सम्पन्न
ठकुरी समुदायले मनाउने गौरा (दुवाटु) को अवसरमा आयोजित जिल्लास्तरीय देउडा महोत्सव सम्पन्न भएको छ । महोत्सवको अवसरमा महिला तथा पुरुषले प्रतिस्पर्धाबिनै देउडा गीत गाएर सम्पन्न भएको हो । खार्पुनाथ गाउँपालिका–५ को आयोजनामा देउडा महोत्सव आयोजना गरिएको वडाध्यक्ष भरतजङ्ग शाहीले बताउनुभयो ।
तरकारी बोेकेको जीप दुर्घटना हुँदा दुईको मुत्यु
दुर्घटनामा परी दाङको तुलसिपुर १८ बस्ने वर्ष २६ का जीप चालक भक्त बहादुर घर्ती र सोही ठाउँ निवासी गाडी धनी वर्ष ५० का गणेश बुढाको दुर्घटनामा मृत्यु भएको जिल्ला प्रहरी कार्यालय सल्यानले जनाएको छ ।
च्याछरा झरना घुम्न आउने पर्यटक बढे
नाम्खा गाउँपालिका– २ को च्याछरा झरनामा घुम्न जाने आन्तरिक तथा बाह्य पर्यटकको सङ्ख्या बृद्धि भएको छ । जिल्लाकै लामो झरना भएको र आउजाउ गर्न समेत सहज भएको कारण उक्त झरना घुम्न जाने पर्यटक सङ्ख्यामा बृद्धि भएको हो ।
बलात्कार गरेको आरोपमा पक्राउ
सुर्खेतमा १३ वर्षीया बालिका बलात्कारको आरोपमा चार जनालाई प्रहरीले पक्राउ गरेको छ । पक्राउ पर्नेमा तीन जना १८ वर्षभन्दा कम उमेरका रहेका छन् । एक जना १९ वर्षीय पुरुष छन् ।
सल्यानमा जिप दुर्घटना हुँदा दुईको मृत्यु एक घाइते
सल्यानमा जिप दुर्घटना हुँदा दुई जनाको मृत्यु भएको छ भने एक जना घाइते भएको छन् । कपुरकोट गाउँपालिका ३ चोर खोला बिहान ६ बजे राप्ती राजमार्गमा रोल्पाबाट दाङ तर्फ तरकारी बोकी जाँदै गरेको रा १ च. १०२५ नं. को जिप दुर्घटनामा परेको हो । दुर्घटनामा परी दुई जनाको मृत्यु, एक जना गम्भीर घाइते भएको प्रहरीले जनाएको छ ।
भित्तामा सम्पदा चित्र
कर्णाली प्रदेशको राजधानी सुर्खेतको वीरेन्द्रनगर बजार क्षेत्रका खाली भित्तामा कर्णालीका संस्कृति र सम्पदाका चित्र बनाउन थालिएको छ । नेपाल कमर्सियल आर्टिस्ट सङ्घमा आबद्ध सुर्खेतका कलाकारले । ‘संस्कृति र सम्पदाको सहर, हाम्रो वीरेन्द्रनगर’ नारासहित यो अभियान थालेका हुन् ।
मूल्य नपाउँदा गोदाममै कागती
रुकुमपश्चिममा उत्पादित कागतीले बजार नपाउँदा किसान चिन्तित बनेका छन् । रुकुमपश्चिमको त्रिवेणी गाउँपालिका–१ मा मात्रै करिब ४० क्विन्टल कागती उत्पादन हुने गरेको छ । त्रिवेणी गाउँपालिका–१, रुघाका किसान पदमबहादुर मल्लको छ सय बोट कागती छन् । बिक्रीका लागि आठ क्विन्टल टिपिए पनि उचित मूल्य र बजार नपाउँदा घरमै थन्काएर राखिएको छ ।
ओझेलमा बयाल झरना
जिल्लाको पचालझरना गाउँपालिका–७ र ८ को सिमाना पर्ने बयाल झरना ओझेलमा परेको छ। झरना हेर्न छिमेकी ठाउँबाट आउने गरेका छन्। तथापि यसको उचित प्रचारप्रसार हुन सकेको छैन। स्थानीय कृष्णबहादुर बमले झरनाका बारेमा पर्याप्त प्रचार हुन नसकेको बताउनुभयो।
जुम्ला विमानस्थल विस्तार गरिने
जुम्ला विमानस्थल विस्तार गरिनेभएको छ । नेपाल नागरिक उड्डयन प्राधिकरण कर्पोरेट योजना तथा अनुगमन विभागले नेपाल नागरिक उड्डयन प्राधिकरण जुम्लालाई विमानस्थल विस्तारका लागि ४ करोड ४२ लाख ४७ हजार ७ सय ८७ रुपियाँ ६१ पैसा स्वीकृत गरी आर्थिक वर्ष २०८०/८१ को कार्यक्रम पठाएको छ ।
हिंसापीडित महिलाको रहस्यमय मृत्यु
घरेलु हिंसा भोग्दै आएकी एक महिलाको मृत्यु भएको छ । श्रीमानबाट पीडित सान्नी त्रिवेणी गाउँपालिका वडा नम्बर १ लुसा माइती घर भएकी गीता जैसीको संरक्षण गरिएको ठाउँमै रहस्यमय मृत्यु भएको हो ।
जुम्लामा धार्मिक पर्यटकीय मेला सुरु
जुम्लामा मष्टो परम्पराको धार्मिक मेला सुरु भएको छ । ऐतिहासिक धार्मिक महत्त्व राख्ने यी मेला सुरु भएपछि अहिले यस क्षेत्रमा भिडभाड बढेको छ । जानकारहरूका अनुसार जनैपूर्णिमाका दिनबाट कर्णालीमा सुरु हुने मेला सुरु भएपछि गाउँमा चहलपहल बढेको हो ।
हुम्लाको यारीमा पालले बेरिएकाे प्रहरी चौकी
नाम्खा गाउँपालिका– ५ को यारी प्रहरी चौकीको कार्यालय रहेको भवनलाई पालले छोपेर कार्यालय सञ्चालन गर्नुपर्ने बाध्यता छ । माटोले छापेको भवनमा पानी पर्दा चुहिने समस्या भएको कारण प्रहरीले पालले छोपेर प्रहरी बस्ने र कार्यालय सञ्चालन गर्नु परि रहेको हो ।
प्रदेश सरकार गठनपछि विद्यालय भवन निर्माणमा तीव्रता
कर्णाली प्रदेश स्थापना भएदेखि हालसम्म कर्णालीको विभिन्न जिल्लामा साढे पाँच सय वटा विद्यालय भवन निर्माण गरिएका छन् । कर्णाली प्रदेश सरकारको विद्यालय भौतिक सुधार कार्यक्रम अन्तर्गत आर्थिक वर्ष २०७५/७६ देखि हालसम्म १० जिल्लामा गरी ५६६ वटा विद्यालयका दुई हजार ४५ वटा कक्षाकोठा निर्माण गरिएका हुन् ।
मुगुमा धार्मिक मेला सुरु
मुगुमा धार्मिक मेला सुरु भएको छ । ऐतिहासिक धार्मिक महत्त्व राख्ने गुरादेब, बिजयगुरादेब लगायतका मेलाहरू सुरु भएको हो ।
हुम्लाको प्रदेश अधिवेशन प्रतिनिधि निर्विरोध चयन
नेपाल कम्युनिष्ट पार्टी (एमाले) हुम्लाको कर्णाली प्रदेश अधिवेशनका लागि प्रदेश प्रतिनिधि निर्विरोध चयन हुनुभएको छ । गाउँपालिकास्तर कमिटीको भेलाबाट ती प्रतिनिधि छनौट हुनु भएको हो ।
तीन सयभन्दा बढीले गरे कैलाशको दूरदर्शन
नाम्खा गाउँपालिका–६ हिमालपारिको गाउँ लिमीको लाप्चा क्षेत्रबाट मानसरोवर कैलाशको दूरदर्शन गर्ने आन्तरिक तथा बाह्य पर्यटकको सङ्ख्या तीन सयभन्दा बढी पुगेको छ ।
मुगुको गमगढीमा भीषण आगलागी
जिल्ला सदरमुकाम गमगढी बजारमा शुक्रबार राती अन्दाजी १२ बजे भीषण आगलागी भएको छ। मुगुको छायाँनाथ रारा नगरपालिका वडा नं. २ मा पर्ने गमगढी बजारको कालीकामालीका मन्दिरको पश्चिमी क्षेत्र तिर आठ घर जलेर नष्ट भएका छन्।
देउडा गायक सम्मानित
छ जना चर्चित देउडा गायक छ सम्मानित हुनुभएको छ। जिल्लामा देउडा गायन क्षेत्रमा योगदान पु-याएको भन्दै सर्केगार्ड गाउँपालिका–७ को सूर्यतारा आधारभूत विद्यालयले एक कार्यक्रम आयोजना गरी उहाँहरूको सम्मान गरेको हो। विद्यालयका प्रधानाध्यापक गोरबहादुर ऐडीले देउडाको संरक्षण र प्रवर्धनमा महत्वपूर्ण योगदान पु-याउनुभएका जिल्लाबाहिर र भित्रका छ जना देउडा गायकलाई सम्मान गरिएको बताउनुभयो। सांसद छिरिङडम्डुल लामाले भानुभक्त जैसी, अदानसिंह कार्की, औसे कामी, जगदीश रावल, जसबहादुर शाही र अछामकी पानसरा थापालाई नगदसहित सम्मान प्रदान गर्नुभयो। सम्मानित भएपछि देउडा गायक भानुभक्त जैसीले यस क्षेत्रको प्रवर्धनमा लाग्न थप हौसला प्रदान गरेको बताउनुभयो। कलाकारबिच चार घण्टासम्म देउडा गाउने कार्यव्रmम भएको थियो ।
बनेन कभर्ड हल
१० औँ राष्ट्रिय खेलकुद प्रतियोगितालाई लक्ष्य गरी निर्माण गर्न लागिएको कालीकोट र जाजरकोटको कभर्ड हल निर्माण कार्य बजेट अपुग हुँदा अघि बढ्न सकेको छैन। तीन वर्षअघि विस्तृत परियोजना प्रतिवेदन (डिपिआर) तयार भएको कालीकोटस्थित कभर्ड हल निर्माणका लागि आर्थिक वर्ष २०८०/८१ मा कभर्ड हल निर्माणका लागि प्रदेश सरकारले ५० लाख र सङ्घीय सरकारले ६० लाख बजेट विनियोजन गरेको छ। १४ करोड रुपियाँ लागत अनुमान रहेको परियोजनाको डिपिआर आव २०७७/७८ मा तयार गरिएको थियो।
किसानलाई स्याउ टिप्ने चटारो
वर्षभरिमा एक पटक उत्पादन हुने स्याउ टिप्न जिल्लाका कृषकलाई हिजोआज भ्याइनभ्याइ छ । मुगुको छायानाथ रारा नगरपालिका–४ का युवा कृषक मणिचन्द्र भामको स्याउ बगैँचामा पुग्ने जोकोही पनि रमाउँछन् । उहाँको बगैँचा टाढैबाट पनि राताम्मे देखिन्छ । “गत वर्षभन्दा यो वर्ष स्याउ राम्रो फलेको र दाना पनि ठुला छन्,” उहाँले भन्नुभयो, “यो वर्ष गुणस्तरीय दाना फलेकाले स्याउले राम्रो रङ लिएको छ ।”
भीरबाट लडेर एकको मृत्यु
जाजरकोटमा भीरबाट लडेर एक जनाको मृत्यु भएको छ । बारेकोट गाउँपालिका –८ पटाङ्ग्रीका ४८ बर्षीय राजेन्द्र सिंहको भीरबाट लडेर मृत्यु भएको हो ।
बिष्फोटक पदार्थसहित एक पक्राउ
जिल्ला प्रहरी कार्यालय रुकुमपश्चिले अवैध भरुवा बन्दुक र बिष्फोटक पदार्थसहित एक जनालाई पक्राउ गरेको छ । प्रहरीले मुसीकोट नगरपालिका वडा ६ मैलचौरका ३६ वर्षीय झकेन्द्र भण्डारीलाई बिहीबार बेलुका पक्राउ गरेको जनाएको छ ।
रैथाने मकै, कोदो र केराबाट पाउरोटी
वीरेन्द्रनगरमा अर्गानिक तथा रैथाने बालीबाट पाउरोटी बनाउने गरिएको छ । अर्गानिक स्वस्थकर बेकरी परिकार खुवाउन रैथाने बालीबाट पाउरोटी बनाउन लागिएको हो ।
प्रयोगमा आएन प्रयोगशाला
प्रदेश सरकारले सल्यानको कपुरकोट–३ र पूर्वी सुर्खेतको भेरीगङ्गा नगरपालिकाको हर्रेमा दुई वर्षअघि विषादी परीक्षण प्रयोगशाला स्थापना गरे पनि सञ्चालनमा ल्याउन सकेको छैन । विषादी परीक्षण मेसिन खरिद गरी ल्याउन नसक्दा कार्यालय सञ्चालनमा नआएको बताइएको छ । सो कार्यालयमा प्रदेशको एकीकृत प्रयोगशालाबाट दुई जना कर्मचारी खटाइएको छ ।
