पालिकाको अन्तिम परिणाम आउने क्रम जारी
मधेस प्रदेशअन्तर्गत जिल्लाका स्थानीय तहको अन्तिम मत परिणाम आउन थालेको छ । अहिलेसम्ममा एक नगरपालिका र चार गाउँपालिकाको मत परिणाम सार्वजनिकभएको निर्वाचन कार्यालयले जनाएको छ । प्रदेशका सप्तरी, धनुषा, सर्लाही, सिरहाका केही स्थानीय तहका प्रमुख÷अध्यक्ष र उपप्रमुख÷उपाध्यक्षका अन्तिम परिणाम घोषणाभएको छ ।
देवघाट गाउँपालिका अध्यक्षमा काँग्रेसका थापा विजयी
तनहुँको देवघाट गाउँपालिकाको अध्यक्षमा नेपाली कांग्रेसका तिलबहादुर थापा र उपाध्यक्षमा माओवादी केन्द्रका भुवनसिंह गुरुङ निर्वाचित हुनु भएको छ ।
अधिकांशमा गठबन्धन विजयी
प्रदेश नम्बर १ का विभिन्न पहाडी जिल्लाका अधिकांश स्थानीय तहको मतगणना कार्य सम्पन्न भई अन्तिम मत परिणाम सार्वजनिक भइसकेको छ । त्यसैगरी प्रदेश १ का तराईका केही स्थानीय तहका मतगणना कार्य पनि सम्पन्न भइसकेको छ ।
भरतपुरमा मतान्तर बढाउँदै दाहाल
भरतपुर महानगरपालिकामा जारी मतगणनामा पाँचदलीय गठबन्धनका उम्मेदवारको मन्तान्तर बढ्दै गएको छ । गठबन्धनबाट प्रमुख पदका उम्मेदवार बन्नुभएकी नेकपा(माओवादी केन्द्र)का रेनु दाहाल र नेकपा (एमाले)का विजय सुवेदीबीचको मतान्तर एक हजार ३९३ पुगेको छ । दाहाल नौ हजार ४४७ मतका साथ अग्रस्थानमा हुनुहुन्छ भने सुवेदी आठ हजार ५४ मतका साथ पछ्याइरहनुभएको छ । यस्तै स्वतन्त्र उम्मेदवार जगन्नाथ पौडेल चार हजार २६५ मतका साथ तेस्रो स्थानमा हुनुहुन्छ । उपप्रमुखमा नेपाली कांग्रेसका चित्रसेन अधिकारीले ११ हजार २६५ र राप्रपाका हिमला गुरुङले छ हजार ५७७ मत प्राप्त गर्नुभएको छ ।
पोखरामा गणना ढिलो भएपछि मतगणनास्थल थप
स्थानीय तह सदस्य निर्वाचन–२०७९ अन्तर्गत कास्कीका पाँच पालिकामध्ये चार गाउँपालिकाको अन्तिम नतिजा सार्वजनिक भएको छ । मादी, रुपा, अन्नपूर्ण र माछापुच्छ्रे गाउँपालिकाको परिणाम सार्वजनिक भइसक्दा पनि पोखरा महानगरको गणना जारी छ ।
मत हाल्न आए, नतिजा नआउँदै गए
कैलालीको घोडाघोडी नगरपालिका–१० का देवबहादुर शाहीलाई आफूले दिएको मत काम लागेको नलागेको सुन्ने उत्कट चाहना थियो । आफूले रोजेको उम्मेदवारले जिते विजय जुलुसमा सामेल हुने र आफ्नै गाउँघरको सिंहदरबार हाँक्ने सरकार हेरेर नै जाने सोच थियो तर त्यो अवसर नपाउँदै उहाँ झोलाझ्याम्टा बोकी सुक्खड बसपार्कबाट सीमा नाका गौरीफन्टातिर लाग्नुभयो ।
कनकाई नगरपालिकाको प्रमुखमा एमाले उम्मेदवार विजयी
झापाको कनकाई नगरपालिकाको प्रमुखमा नेकपा एमालेका राजेन्द्रकुमार पोखरेल पुनः नगरप्रमुख पदमा निर्वाचित हुनुभएको छ । पोखरेलले जम्मा आठ हजार ६७३ मत ल्याउदै बिजयी हुनुभयो ।
उमाकुण्ड गाउँपालिका अध्यक्षमा एमाले र उपाध्यक्षमा काँग्रेसका उम्मेदवार विजयी
जिल्लाको उमाकुण्ड गाउँपालिका अध्यक्षमा नेकपा (एमाले)का उम्मेदवार शेरबहादुर सुनुवार र उपाध्यक्षमा काँग्रेस उम्मेदवार सावित्री सुनुवार विजयी हुनुभएको छ ।
थाहामा गठबन्धनका प्रमुख र उपप्रमुख विजयी
मकवानपुरको थाहा नगरपालिकामा सत्तारुढ गठबन्धनका उम्मेदवार विजयी भएका छन् । प्रमुखमा नेकपा (माओवादी केन्द्र) का विष्णुबहादुर विष्ट र उपप्रमुखमा नेपाली काँग्रेसका भरत गोपाली विजयी हुनुभएको हो ।
मध्यपुर थिमीमा प्रमुख, उपप्रमुखमा गठबन्धनका उम्मेदवार विजयी
भक्तपुरको मध्यपुर थिमी नगरप्रमुखमा नेपाली कांग्रेसका सुरेन्द्र श्रेष्ठ १५ हजार ९८ मतसहित विजयी हुनुभएको छ । उहाँले निकटतम प्रतिद्वन्द्वी नेकपा (एमाले)का मदनसुन्दर श्रेष्ठ चार हजारभन्दा बढी मतले पराजित हुनुभयो ।
राईनासको प्रमुखमा काङ्रेस र उपप्रमुखमा माओवादी केन्द्र निर्वाचित
स्थानीय तह निर्वाचन २०७९ अन्तर्गत लमजुङको राइनास नगरपालिकाको प्रमुखमा नेपाली कांग्रेसका उम्मेदवार खड्गबहादुर गुरुङ निर्वाचित हुनुभएको छ । उहाँले पाँच हजार ८२६ मत ल्याई विजयी हुनुभएको हो ।
काठमाडौंको शंखरापुर नगर प्रमुखमा राप्रपाका नापित, उपप्रमुखमा कांग्रेसका श्रेष्ठ विजयी
काठमाडौंको शंखरापुर नगरपालिका प्रमुखमा राष्ट्रिय प्रजातन्त्र पार्टीका रमेश नापित चार हजार सात सय मतसहित विजयी हुनुभएको छ ।
राक्सिराङ र गढीमा गठबन्धनका अध्यक्ष र उपाध्यक्ष विजयी
मकवानपुरको राक्सिराङ गाउँपालिकाका र मकवानपुरगढी गाउँपालिका सत्तारुढ गठबन्धनका उम्मेदवार विजयी भएका छन्।
तीन सय ३५ स्थानीय तहको परिणाम : कुन दलकाे कति ?
वैशाख ३० गते भएको निर्वाचनमा स्थगन भएका १७ जिल्ला, २८ स्थानीय तहका ४४ मतदानस्थल बाहेकबाट मत परिणाम आउने क्रम जारी रहेको छ।
ताप्लेजुङका अधिकांश स्थानीय तहमा गठबन्धनको जित
ताप्लेजुङका अधिकांश स्थानीय तहमा सत्ता गठबन्धन विजयी भएको छ। जिल्लाका नौमध्ये पाँच स्थानीय तहमा गठबन्धन दुवै मुख्य पद तथा दुई तहमा एक प्रमुख र एक उपप्रमुख पदमा विजयी भएको हो।
काठमाडौं महानगर प्रमुखमा बालेनलाई चार हजार बढी मतको अग्रता
काठमाडौं महानगर प्रमुखमा ११ हजार ४२ मतसहित स्वतन्त्र उम्मेदवार बालेन शाहको अग्रता कायमै रहेको छ। शाहको मत नेकपा (एमाले) का केशव स्थापितले ल्याउनुभएको मतभन्दा चार हजार ८ सयभन्दा बढी छ।
छायाँनाथ रारा नगरपालिकामा कांग्रेस विजयी
हरिकृष्ण ऐडीमुगु, जेठ ३ गते। मुगुको छायाँनाथ रारा नगरपालिकाको प्रमुखमा नेपाली कांग्रेसका विष्णु भाम निर्वाचित हुनुभएको छ। उपप्रमुखमा कांग्रेसकै पदमा ऐश्वर्य मल्ल निर्वाचित हुनुभएको मुख्य निर्वाचन कार्यालयका सूचना अधिकारी प्रकाश थापाले जानकारी दिनुभयो। प्रमुख पदमा उम्मेदवार भामले चार हजार ५९९ मतसहित विजयी हुनुभएको छ। उहाँका प्रतिद्वन्द्वी नेकपा (एमाले)का डम्बर रावलले तीन हजार ८ सय ६० मत ल्याउनुभएको छ। यस्तै, उपप्रमुखमा नेपाली कांग्रेसका मल्लले चार हजार ३२५ मत ल्याएर विजयी हुनुभएको छ। प्रतिद्वन्द्वी एमालेका टोमा लामाले ३ हजार ७३४ मत ल्याउनु भएको छ। कुल १४ वटा वडा रहेको छायाँनाथ रारा नगरपालिकामा कांग्रेसका उम्मेदवार नगर प्रमुख, वडा अध्यक्ष र सदस्य गरेर ३९ जना निर्वाचित भएका छन्।
ललितपुर महानगर प्रमुखमा फराकिलो मतसहित चिरीबाबुको अग्रता
ललितपुर महानगरपालिका प्रमुखमा नेपाली कांग्रेसका चिरीबाबु महर्जन नौ हजार २१६ मतसहित अग्र स्थानमा हुनुहुन्छ। नेकपा (एमाले) का हरिकृष्ण महर्जनले चार हजार २९ मत ल्याउनुभएको छ।
साँगाचोकगढी नगरमा माओवादीका देशबन्धु र समाजवादीकी थापा बिजयी
चित्र मिजारसिन्धुपाल्चोक, जेठ ३ गते । सिन्धुपाल्चोक–चौतारा सा“गाचोकगढी नगरपालिकाको मेयरमा माओवादी केन्द्रका कृष्ण सापकोटा ‘देशबन्ध’ र उपमेयरमा समाजबादीकी सीता थापा बिजयी हुनुभएको छ । सापकोटाले ११ हजार ७२ र उपमेयरमा एकीकृत समाजवादीकी सीता थापाले ९ हजार ७२६ मत ल्याएर निर्वाचित हुनुभएको हो । सो नगरमा माओवादी केन्द्र र एकीकृत समाजवादी गठबन्धन थियो । सापकोटाका निकटतम प्रतिस्पर्धी एमालेका उम्मेद्वार इन्द्र नेपालले ६ हजार ७११ मत र थापाकी निकटतम प्रतिस्पर्धी एमालेकी बालकुमारी सापकोटाले ९ हजार ७२६ मत ल्याउनुभयो । नेपाली कांग्रेसका केशवराज गिरीले ६ हजार २४५ र तुलसी प्रधानले ५ हजार ७६० मत ल्याउनुभयो । माओवादी केन्द्रको गढक्षेत्र चौतारा सा“गाचोकगढी नगर अघिल्लो २०७४ निर्वाचनमा पनि माओवादीकै अमानसिं तामाङ र जानुका पराजुलीले जित्नुभएको थियो ।
तानसेनको प्रमुखमा काँग्रेस र उपप्रमुखमा माओवादी उम्मेदवार विजयी
रेखीराम रानापाल्पा, जेठ ३ गते । पाल्पाको सदरमुकाम तानसेनमा गठबन्धनका उम्मेदवार विजयी भएका छन् । गठबन्धनको तर्फबट तानसेन नगरपालिकाकोे प्रमुखमा सन्तोषलाल श्रेष्ठ र उपप्रमुखमा प्रतिक्षा सिंजाली विजयी हुनुभएको हो । श्रेष्ठले ११ हजार २ सय ७३ र सिंजालीले ११ हजार १ सय ५१ मत ल्याएर विजयी हुनुभएको हो । एमालेबाट नगर प्रमुखको उम्मेदवार बन्नुभएका धनेन्द्रराज घिमिरेले १० हजार ३ सय ९४ र उपप्रमुखका उम्मेदवार शशी श्रेष्ठले १० हजार १ सय ५१ मत ल्याउनुभएको छ । तानसेनमा नेपाली काङ्ग्रेसले वडा नं. १, २, ३, ४, ६, ७, ११ र १२ वडामा जितेको छ । यस्तै माओवादीका उम्मेदवारले तानसेनको वडा नं. ५ र १३ वडा जितेको छ । एमालेले भने वडा नं. ८, ९, १० र १४ जितेको छ । बैशाख ३० गते रातिदेखि सुरु भएको मतगणनाको काम मङ्गलबार बेलुकी मात्रै सकिएको मुख्य निर्वाचन अधिकृतको कार्यालयले जनाएको छ ।
रौतहटको २४ मतदान केन्द्रमा बुधबार पुनः मतदान हुने
सञ्जय कुमार मिश्रगौर, जेठ ३ गते । स्थानिय तह निर्वाचन अन्तर्गत वैशाख ३० गते स्थगित भएको रौतहट जिल्लाको २४ वटा मतदान केन्द्रमा जेठ ४ गते बुधवार पुनः निर्वाचन हुनेभएको छ । रौतहटको ६ वटा पालिकाकोे १० वटा मतदान स्थलको २४ वटा मतदान केन्द्रमा मतदान गराउन निर्वाचन आयोगले आदेश दिइएअनुसार जेठ ४ गते बुधवार निर्वाचन हुने जिल्ला निर्वाचन कार्यालय रौतहटका प्रमुख छोटेलाल दासले बताउनुभयो ।फतुआविजयपुर नपाको स्वास्थ्यचौकी मतदान स्थलको २ वटा मतदान केन्द्र, देवाहीगोनाही नपाको जनप्रिय प्रावि मतदान स्थलको २ मतदान केन्द्र, यमुनामाई गाउँपालिकाको श्री मावि भेडियाहीको मतदान स्थलको २ वटा, श्रीमावि चिकना जेठरहिया मतदान स्थलको ३ मतदान केन्द्रमा मतदान हुँदैछ ।यसैगरी, गढीमाई नपाको आदर्श प्रावि मतदान स्थलको २ मतदान केन्द्र, प्रावि लक्ष्मीपुर मतदान स्थलको २ मतदान केन्द्र, बौद्धीमाई नपाको कंकाली मतदान स्थलको २ मतदान केन्द्र, अजगैवी मतदान स्थलको ३ मतदान केन्द्र, इनरवा प्रावि मतदान स्थलको ३ मतदान केन्द्र र गरुडा नपाको शिवशंकर प्रावि मतदान स्थलको १ वटा मतदान केन्द्र गरी २४ वटा मतदान केन्द्रमा निर्वाचन हुँदैछ ।
-original-thumb.jpg)
धनुषाको १८ मध्ये पाँच पालिकाको मतपरिणाम सार्वजनिक
धर्बेन्द्र झा जनकपुरधाम, जेठ ३ गते । स्थानीय तह निर्वाचन अन्तर्गत धनुषाको १८ वटा पालिकामध्ये मंगलबार दिउँसो सम्ममा चार वटा पालिकाको मत परिणाम सार्वजनिक भएको छ । मतपरिणाम सार्वजनिक भएको पाँच पालिकामध्ये दुईमा नेपाली काँग्रेस, दुईमा नेकपा (एमाले) र एक पालिकामा जनता समाजवादी पार्टीले जित हाँसिल गर्न सफल भएको छ । धनुषाको लक्ष्मिनियाँ गाउँपालिकाको अध्यक्षमा नेपाली काँग्रेसका भोगेन्द्र मिश्रले तीन हजार ७६५ मत ल्याएर निर्वाचित हुनुभएको छ । आफनो निकटतम प्रतिद्धन्दीभन्दा २६८ मत बढी ल्याएर उहाँ निर्वाचित हुनुभएको हो । उहाँका निकटतम प्रतिद्धन्दी जनता समाजवादी पार्टीका शत्रुधन यादवले तीन हजार ४९७ मत प्राप्त गर्नुभएको छ । त्यसैगरी, उपाध्यक्षमा काँग्रेसकै फुलकुमारी यादव तीन हजार ६२८ मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी जनता समाजवादी पार्टीका विमलाकुमारी यादवले तीन हजार ४६० मत प्राप्त गर्नुभएको छ ।धनुषाकै धनौजी गाँउपालिकाको अध्यक्षमा नेपाली काँग्रेसका राजकुमार साह दुई हजार २६२ मत प्राप्त गरी निर्वाचित हुनुभएको छ । उहाँका निकटतम प्रतिद्धन्दी लोकतान्त्रिक समाजवादी पार्टीका जीवेन्द्र झाले दुई हजार १६३ मत प्राप्त गर्नुभएको छ । त्यसैगरी उपाध्यक्षमा काँग्रेसकै रामवती देवीले दुई हजार ४३० मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी लोकतान्त्रिक समाजवादी पार्टीका रंजितादेवी मण्डलले एक हजार ९०१ मत प्राप्त गर्नुभयो । धनुषाको विदेह नगरपालिकाको प्रमुखमा एमालेका बेचन दास चार हजार ४१२ मत प्राप्त गरी निर्वाचित हुनुभएको छ । आफनो प्रतिद्धन्दी नेकपा एकृकित समाजवादीका राजकिशोर रोहिता यादव भन्दा ९८५ मत बढी ल्याएर निर्वाचित हुनुभएको हो । उहाँका निकटतम प्रतिद्धन्दी एकृकित समाजवादीका यादवले तीन हजार ४२७ मत ल्याउनुभएको छ । त्यसैगरी उपप्रमुखमा एमालेकै आशा झा चार हजार ६५९ मत ल्याएर निर्वाचित हुनुभयो । उहाँका निकटतम प्रतिद्धन्दी नेपाली काँग्रेसका सीमादेवी महतोले दुई हजार ७८६ मत प्राप्त गर्नुभयो । धनुषाकै औरही गाँउपालिकाको अध्यक्षमा एमालेका उमाशंकरप्रसाद साहले तीन हजार ३२६ मत प्राप्त गरी निर्वाचित हुनुभएको छ । उहाँ आफनो निकटतम प्रतिद्धन्दी काँग्रेसका उम्मेदवार व्रहमदेव यादवभन्दा ४०३ मत बढी ल्याएर निर्वाचित हुनुभएको हो । उहाँको निकटतम प्रतिद्धवन्दी यादवले दुई हजार ९२३ मत प्राप्त गर्नुभएको छ । त्यसैगरी उपाध्यक्षमा एमालेकै पुनमकुमारी साहले दुई हजार ९९४ मत ल्याएर निर्वाचित हुनुभएको छ । उहाँको निकटतम प्रतिद्धन्दी काँग्रेसका रिंकुकुमारी मण्डलले दुई हजार ७९० मत प्राप्त गर्नुभएको छ । धनुषाको जनकनन्दनी गाँउपालिकाको अध्यक्षमा जनता समाजवादी पार्टीका दिपिनदेव यादव तीन हजार १५७ मत प्राप्त गरी विजयी हुनुभएको छ । उहाँको निकटतम प्रतिद्धन्दी काँग्रेसका सुरेश चौधरीले दुई हजार ७६८ मत प्राप्त गर्नुभएको छ । त्यसैगरी उपाध्यक्षमा काँग्रेसका कमला सहगलले दुई हजार ९९८ मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी जनता समाजवादीका गीता सुढीले दुई हजार ८४० मत प्राप्त गर्नुभएको छ । घोषणा भएका बाहेकका पालिकामा मतगणना जारी रहेको र छिटै मतगणना सम्पन्न गर्ने पक्षमा निर्वाचन आयोग रहेको मधेश प्रदेश निर्वाचन कार्यलयका प्रमुख श्रीधर पन्थीले जानकारी दिनुभयो ।
घिरिङ गाउँपालिकाको अध्यक्ष र उपाध्यक्षमा एमाले विजयी
अमरराज नहर्की तनहुँ, जेठ ३ गते । तनहुँको घिरिङ गाउँपालिकाको अध्यक्ष तथा उपाध्यक्ष दुवै नेकपा (एमाले) ले जितेको छ । गठबन्धनका उम्मेदवारलाई पराजित गर्दै अध्यक्ष र उपाध्यक्ष दुवैमा एमालेले जित हासिल गरेको हो । एमालेका होमबहादुर थापाले ७९७ मतान्तरणले नेपाली काँग्रेसका गङ्गा कुमाललाई पराजित गर्नुभयो । थापाले चार हजार ३३१ मत प्राप्त गर्नुभयो भने कुमालले तीन हजार ५५४ मत प्राप्त गर्नुभएको छ । उपाध्यक्षमा एमालेकै राधादेवी अधिकारी चार हजार चारसय ८१ मत प्राप्त गरी विजयी हुनुभएको छ । काङग्रेस र एकीकृत समाजवादीको गठबन्धनका तर्फबाट उपाध्यक्षका उम्मेदवार पूर्णबहादुर थापाले दुई हजार सातसय ४७ मत प्राप्त गर्नुभएको थियो । घिरिङ गाउँपालिकाको ५ वटा वडामध्ये तीन वटामा एमाले र दुई वटामा काँग्रेसले विजय हासिल गरेको छ । काँग्रेसबाट १ को वडाध्यक्षमा रविचन्द्र घोरासिनी र ५ को अध्यक्षमा विष्णुवीर आले विजय हासिल गर्नुभएको छ । एमालेबाट २ को वडाध्यक्षमा नरबहादुर थापा, ३ को वडाध्यक्षमा तहलसिं थापा र ४ को वडाध्यक्षमा भिमबहादुर कुमालले विजय हासिल गर्नुभएको छ । यसअघि २०७४ को स्थानीय तहमा पनि एमालेले अध्यक्ष र उपाध्यक्ष दुवै पद जितेको थियो ।
दक्षिणकाली नगरप्रमुख र उपप्रमुखमा कांग्रेस विजयी
काठमाडौं, जेठ ३ गते। काठमाडौंको दक्षिणकाली नगरपालिका प्रमुखमा नेपाली कांग्रेसका मोहन बस्नेत सात हजार २०१ मतसहित विजयी हुनुभएको छ। बस्नेतले निकटतम प्रतिद्वन्द्वी नेकपा (एमाले) का श्रीराम आचार्य दुई हजार नौ मतान्तरले पराजित गर्नुभएको छ।राष्ट्रिय प्रजातन्त्र पार्टीका ज्ञान भक्त आचार्यले ७९४, जनता समाजवादी पार्टी, नेपालका चण्डे राज तामाङले १२७, उन्नत लोकतन्त्र पार्टीका उज्वल श्रेष्ठले ४८ र रामप्रसाद तिमिल्सिना जैसीले १७ मत प्राप्त गर्नुभयो।निर्वाचन अधिकृतको कार्यालय अनुसार नगर उपप्रमुखमा पनि कांग्रेसकी बसन्ती तामाङ सात हजार ६२३ मतसहित विजयी हुनुभयो। तामाङका निकटतम प्रतिद्वन्द्वी एमालेकी इन्दिरा न्यौपानेले चार हजार ८३० मत ल्याउनुभयो। उपप्रमुखमा राप्रपाका उर्मिला केसीले ७४२ र जसपाकी सन्जु माया तामाङले ११८ मत प्राप्त गर्नुभयो।दक्षिणकाली नगरपालिका-१ को वडाअध्यक्षमा एमालेका जय थापा मगर, २ मा कांग्रेसका रामचन्द्र क्षेत्री, ३ मा एमालेका प्रचण्डमान सिंह बस्नेत, ४ मा कांग्रेसका पुष्कर खड्का, ५ मा कांग्रेसका श्याम बहादुर खत्री, ६ मा कांग्रेसका शैलेशमान मानन्धर, ७ मा एमालेका हरिप्रसाद तिमल्सेना, ८ मा कांग्रेसका योसकुमार वाईबा र वडा नं. ९ मा कांग्रेसका अमृका बलामी निर्वाचित हुनुभएको छ। दक्षिणकालीमा नौ वडामध्ये छ वडामा कांग्रेस र बाँकी तीनमा एमालेका उम्मेदवार विजयी हुनुभएको छ।
सप्तकोशी नगर प्रमुखमा कांग्रेस र अग्निसाइरको अध्यक्षमा एमाले विजयी
सप्तरीको एक नगरपालिका र एक गाउँपालिकाको मतगणना सम्पन्न भएको छ।
