शान्ता अधिकारी
चितवन, फागुन १ गते। नेकपा (माओवादी केन्द्र) का उपाध्यक्ष एवम् पूर्व सभामुख अग्निप्रसाद सापकोटाले वर्तमान सरकार र माओवादीका लागि चुनौती र अवसर दुवै भएको बताउनुभएको छ।
पार्टी निकट बुद्धिजीवी सङ्गठन चितवनले जनयुद्ध दिवसको अवसरमा आयोजना गरेको जनयुद्ध दिवस र उपलब्धिको समीक्षा विषयक अन्तरक्रिया कार्यक्रमलाई सम्बोधन गर्दै उहाँले त्यस्तो बताउनु भएको हो। उहाँ पार्टीको जिम्मेवारीमा फर्केपछि पहिलो पल्ट सोमबार चितवनमा आयोजित कार्यक्रममा सहभागी हुनुभएको हो।
उहाँले आफू जनयुद्धको महाअभियानमा सामेल हुनुपूर्व २०५२ असोजमा नारायणगढको क्याम्पाचौरमा अन्तिम सम्बोधन गरेको प्रसङ्ग उठाउनुभयो। त्यतिबेला पनि पार्टीका एक किसिमको चुनौती रहेको र वर्तमानमा समयमा अर्को प्रकृतिको चुनौती रहेको उहाँको भनाइको छ।
उहाँले सङ्कट र चुनौती प्रगतिको लागि आउँछन् भन्ने आफ्नो मान्यता रहेको बताउनुभयो। उहाँले भारतीय स्वतन्त्र सेनानी भगतसिंहको भनाइ उल्लेख गर्दै सङ्कट तिमीलाई दुःख दिन मात्र नआएर तागत परीक्षण गर्न आएको हुने बताउनुभएको छ। जनयुद्ध दिवसमा बिदा घोषणाको विषयमा यतिबेला देश विदेशमासमेत चर्चा भइरहेको बताउनुभएको छ। उहाँले यसलाई माओवादीले अवसर र चुनौतीका रूपमा लिनुपर्ने बताउनुभएको हो।
उहाँले भन्नुभयो, ‘बिदा घोषणामा धेरै ठूलो कुरा छ। यसमा बहस र पैरवी हुनुपर्छ। आजैदेखि यस विषयमा सकारात्मक नकारात्मक प्रतिक्रिया आउन थालेका छन् । यो सकारात्मक पाटो हो।’ माओवादी जनयुद्ध दन्त्यकथा जस्तै भएको अवस्थामा जनयुद्धको सम्झनामा बिदा दिने निर्णय दूरगामी महत्त्वको रहेको उहाँको दाबी छ।
उहाँले पार्टीले पटकपटक यस्ता प्रकृतिका मुद्दा उठाउने र समाधान गर्ने काम गर्दै आएको दाबी गर्नुभयो। माओवादीलाई अहिले दिएको अवसरले सङ्घर्षको माग गरेको उहाँको भनाइ छ। तर, कस्तो किसिमको सङ्घर्ष भन्नेबारेमा उहाँले केही बताउनु भएन।
नेपाल बुद्धिजीवी सङ्गठन चितवनका अध्यक्ष प्रा.डा. ईश्वरीप्रसाद ढकालको अध्यक्षतामा सम्पन्न उक्त कार्यक्रममा विनोदखण्ड तिमिल्सिनाले जनयुद्ध दिवस र उपलब्धिको समीक्षाका बारेमा एक अवधारणापत्र प्रस्तुत गर्नुभएको थियो। उहाँले प्रस्तुत गरेको अवधारणापत्रका विषयमा डा. भोजराज अधिकारी, प्रा.डा. भीमराज अधिकारी, पूर्णप्रसाद दवाडी, टेकबहादुर थापा, राजु पौडेल, केदार बराल, खगराज कँडेललगायतले टिप्पणी गर्नुभएको थियो।
