आस्थासाथ डटेर हिँड्छ जगमा सर्वोपकारी बनी
निष्ठासाथ खटेर निर्भय रह्यो भै स्वाभिमानी धनी
जल्ले जीवनमा न सङ्कुचनको सङ्कीर्ण बानी लियो
त्यो आदर्श शहीद प्रज्ज्वलित भो बाली उज्यालो दियो !
निस्वार्थीपनभित्र चित्रित गरी झन् क्रान्तिकारी छवि
भिड्दै गर्दछ नित्य सत्य जनको स्वतन्त्रको पैरवी
जो विश्वास अठोट लिन्छ मनमा डग्दैन कोहीसित
जस्तै दुर्घटना घटोस् समयको बन्दैन ऊ चिन्तित !
खाँटी चिन्तनशीलता मगजमा सत्कर्ममा जोश छ
प्यारो देश, समाज उन्नयनमा लाग्ने दरो होस छ
फाल्नै पर्छ भनी जरा विकृतिका उत्कृष्ट उद्घोष छ
जे छन् घातक चित्तवृत्ति तिनमा प्रत्यक्ष नै रोष छ !
सच्चा जोश र होस, रोषसितको उद्घोष बोक्ने जन
साराको उपकारमा रत रही भोग्ने सही जीवन !
इच्छाशक्ति अपूर्व उच्च दृढता कर्तव्यमा जागृति
झन्डा फर्फर पार्छ दिग्विजयको संसार सिङ्गै जिती !
भै सिद्धान्तविहीन हीनमतिको बन्दैन कस्तै परे
प्राणोत्सर्ग समेत गर्न नहटी उद्देश्यमा डट्छ रे !
उत्साहीपन वीरता अमरता निष्ठा प्रशंसा गरौँ
योद्धा, वीर शहीदको स्मरणमा श्रद्धा र आस्था भरौँ ।
