काठमाडौँ, मङ्सिर २७ गते । नेपाल प्रिमियर लिग (एनपिएल) को उपाधिसँगै लुम्बिनी लायन्सका कप्तान रोहित पौडेल सर्वाधिक भाग्यमानी खेलाडी हुनुभयो ।
टोलीलाई उपाधि जिताउन महत्वपूर्ण भूमिका निर्वाह गर्नुभएका रोहितले सर्वोत्कृष्ट खेलाडीको उपाधिसहित ६३ लाख रुपियाँ बराबरको ओमोडा कार र सर्वाधिक रन कर्ताको पुस्कार स्वरुप पल्सर मोटरसाइकल पुरस्कार पाउनुभयो ।
रोहितले यस सिजन २७६ रन बनाउनुका साथै फाइनलमा उपाधि जिताउन ह्याट्रिक विकेट समेत लिनुभयो ।‘‘उपाधिका लागि खेल्दा सबै पुरस्कार पाउन सफल भएँ । कार जित्छु जस्तो लागेको थिएन, खुशीको सिमा छैन । टोलीका सबै खेलाडीले राम्रो गर्दा ट्रफी जित्न सक्यौँ । गत सिजन पनि ब्यक्तिगत रुपमा राम्रो प्रदर्शन गरेको थिएँ । तर टोलीको खेलाडीको तालमेल मिलेको थिएन ।’’
रोहितले यसपटक चौथो खेलसम्म नतिजा सोचेजस्तो नभएको पनि बताउनुभयो । टोलीले उपाधि जितेपछि उहाँले भन्नुभयो, ‘‘तर विस्तारै स्वदेशी र विदेशी खेलाडीबिच तालमेल मिल्यो । टोलीको रुपमा सबैले राम्रो खेल्यौँ । आज स्पिनर बलरहरुको भूमिका राम्रो रह्यो । ८५ रनमा समेट्न सकिएका भन्ने सोचेको थिएनौँ । एक सय ४० रनमा रोक्न सकिएका भन्ने थियो । तर नसोचेको भयो । उपाधिसँगै ब्यक्तिगत रुपमा कार र बाइक पाउँदा सबै थोक पाएँ जस्तो लागेको छ । आज मेरो दिन रहेछ । शेर मल्ल जस्ता राम्रा खेलाडी एनपिएलले दिएको छ । अबको ध्यान टी-२० विश्वकपमा दिनेछु ।’’
कार पाएपछि रोहितले बा-आमा र परिवारलाई राखेर मैदानमै कुदाउनुभएको थियो । रोहितकै कप्तानीमा नेपालले अब आइसिसी टी-२० विश्वकप खेल्नेछ ।
त्रिवि मैदानमा शनिबार भएको एकपक्षीय फाइनलमा लुम्बिनीले साविक उपविजेता सुदूरपश्चिम रोयल्सलाई ६ विकेटले हराउँदै उपाधि जितेको हो । जितका लागि ८६ रनको सामान्य लक्ष्य पछ्याएको लुम्बिनीले मात्र नौ ओभरमा खेल सकेको थियो । सुदूरपश्चिकको उपाधि चुम्ने सपनालाई लुम्बिनीले ४३ मिनेटमै चक्नाचुर बनाईदियो ।
यस्तै लगातार हारपछि सुदूरपश्चिमका प्रशिक्षक जगत टमटाले सुरुवाती दिनदेखि उत्कृष्ट खेल खेलेपनि फाइनलमा आफुहरुको दिन नरहेको बताउनुभयो ।
‘‘एक सय ४०/५० को लक्ष्य दिन सकेको भए खेल अर्कै हुनेथियो । आज ब्याट्सम्यानले राम्रो गर्न सकेनन् । ८५ रनमा अलआउट हुनु भनेको लुम्बिनीको स्पिनर हावी भयो । रोहितको ह्याट्रिक विकेटले पनि हामीलाई कमजोर बनाउन सफल भयो । विनोद भण्डारी सुरुमै आउट भएपछि दबाब झेल्यौँ । अघिल्लो सिजनकै नियती दोहोरियो । सुरुमा चलेका विदेशी खेलाडी बिचमै फर्किनु हारको अर्को कारण रह्यो,’’ टमटाले भन्नुभयो ।
सन्दीप उत्कृष्ट बलर र शेर उदीयमान
प्रतियोगितामा विराटनगर किङ्स कप्तान सन्दीप लामिछाने उत्कृष्ट बलर बन्नुभयो । कूल १७ विकेट लिनुभएका सन्दीपको नेतृत्वमा विराटनगर क्वालिफायर थियो । उहाँले पनि मोटरसाइकल पुरस्कार पाउनुभयो ।
यस्तै उदीयमान खेलाडी लुम्बिनी लायन्सका शेर मल्ल बन्नुभयो । खेलभर १७ विकेट लिनुभएका उहाँले पनि मोटर साइकल पुरस्कार पाउनुभयो ।
प्रतियोगिताको अर्का सर्वोत्कृष्ट खेलाडी लुम्बिनी लायन्सका नामिबियन पेस बलर रुवेन ट्रम्पलम्यान घोषित हुनुभयो । कूल १५ विकेट लिनुभएका उहाँले पाँच लाख रुपियाँ पाउनुभयो । एनपिएलको च्याम्पियन लुम्बिनीले उपाधिसहित एक करोड १० लाख रुपियाँ पुरस्कार पाएको छ ।
यस्तै उपविजेता सुदूरपश्चिमले ५१ लाख रुपियाँ पाएको छ । तेस्रो भएको विराटनगरले २५ लाख र चौथो स्थानमा रहेको काठमान्डु गोर्खाजले १५ लाख रुपियाँ पुरस्कार प्राप्त गरेको छ ।
सँधै दर्शकको खचाखच
मङ्सिर १ गतेदेखि सुरु भएको एनपिएलमा आठ वटा फ्रेन्चाइज टोलीको सहभागिता रहेको थियो । १० हजार क्षमताको कीर्तिपुरको फर्डलाइटसहितको नयाँ प्यारापिटमा सँधै दर्शकको खचाखच रह्यो ।
यस एनपिएलबाट ४२ करोड रुपियाँ आम्दानी गर्ने योजना बनाएको आयोजक नेपाल क्रिकेट सङ्घ (क्यान)ले दर्शक टिकटबाट मात्र १२ करोड उठाउले लक्ष्य राखेको थियो । दर्शकको आगमनले क्यानलाई सोचेकोभन्दा बढी आम्दानी भएको देखाएको छ ।
