पर्वतमा मतगणना जारी, कांग्रेसको अग्रता
प्रतिनिधि सभा तथा प्रदेश सभा निर्वाचनअन्तर्गत पर्वतको मतगणनामा जारी छ । पछिल्लो मतपरिणाम अनुसार गठबन्धनबाट उम्मेदवार बनेका नेपाली कांग्रेसका अर्जुन प्रसाद जोशीको अग्रता रहेको छ ।
लमजुङमा एमालेको अग्रता
लमजुङमा प्रतिनिधि सभा सदस्यमा नेकपा एमालेका पृथ्वीसुब्बा गुरुङकै अग्रता कायम छ । १७ हजार ९ सय २८ मतगणना गर्दा एमालेका गुरुङले ९ हजार १ सय ९ मत ल्याएका छन् । सत्ता गठबन्धनका उम्मेदवार नेकपा (माओवादी) केन्द्रका देवप्रसाद गुरुङले ७ हजार २०० मत पाएका छन् ।
म्याग्दीमा कांग्रेसका गर्बुजाकाे अग्रता
म्याग्दीको प्रतिनिधि सभा सदस्य पदमा सत्ता गठबन्धनका साझा उम्मेदवार नेपाली कांग्रेसका खमबहादुर गर्बुजाले ३ हजार ८ सय ७ मत प्राप्त गरी अग्रता हासिल गर्नुभएको छ ।
मनाङबाट प्रतिनिधि सभामा कांग्रेसका गुरुङ निर्वाचित
हिमाली जिल्ला मनाङबाट प्रतिनिधि सभा सदस्यमा नेपाली कांग्रेसका टेकबहादुर गुरुङ निर्वाचित हुनुभएको छ ।
मनाङ प्रदेशसभा (क) मा कांग्रेसबाट गुरुङ निर्वाचित
हिमाली जिल्ला मनाङको प्रदेश सभा (क) मा नेपाली कांग्रेसका मुनिन्द्रजङ गुरुङ निर्वाचित हुनुभएको छ ।
गोरखा क्षेत्र नम्बर दुईको मतगणना सुरु
गोरखा क्षेत्र नम्बर २ को मतगणना सुरु भएको छ। सोमबार साँझ सवा सात बजेबाट गणना सुरु भएको निर्वाचन अधिकृत नारदप्रसाद भट्टराईले जानकारी दिनुभयो।
लमजुङमा एमालेका गुरुङको अग्रता
तिनिधि सभा तथा प्रदेश सभा निर्वाचन २०७९ को मतगणनाको क्रममा प्रतिनिधि सभा सदस्यतर्फ नेकपा (एमाले) ले अग्रता लिएको छ ।
स्याङ्जा–२ मा कांग्रेसले बुथ कब्जा गरेको एमालेको आरोप
स्याङ्जा क्षेत्र नं. २ का चार बुथमा धाँधली गरी बुथ कव्जा भएको नेकपा एमालेले आरोप लगाएको छ । चापाकोट नगरपालिका वडा नम्वर ३, ४ र ५ को दिसिङकोट, राममन्दिर, दिनदलाय चिठ्ठी पोखरी बुथमा नेपाली कांग्रेसले धाँधली गरेको भन्दै एमालेले पुनः मतदानको माग गरेको छ ।
स्याङ्जा–१ मा कांग्रेसको प्रारम्भिक अग्रता
स्याङ्जाको क्षेत्र नम्बर १ मा नेपाली कांग्रेसका उम्मेदवार राजु थापाले प्रारम्भिक अग्रता लिनु भएको छ । एक हजार ५८९ मत गणना हुँदा थापाले ७२६ मत हात पार्दा नेकपा एमालेका नारायण मरासिनीले ५६६ मत हात पार्नु भएको हो ।
मुस्ताङमा कांग्रेसको जित, भत्कियो एमालेको गढ
हिमालपारिको जिल्ला मुस्ताङमा प्रतिनिधिसभा तथा प्रदेशसभाको तीन स्थानमै नेपाली कांग्रेसका उम्मेदवार विजयी भएका छन् ।
तनहुँ–१ मा वरिष्ठ नेता पौडेललाई अग्रता
तनहुँ–१ को प्रतिनिधि सभा सदस्यको सुरुवाती मतगणनामा नेपाली कांग्रेसका वरिष्ठ नेता रामचन्द्र पौडेलले अग्रता कायम गर्नुभएको छ ।
तनहुँ–२ मा कांग्रेस उम्मेदवार भण्डारीको अग्रता
प्रतिनिधि सभातर्फ तनहुँको दुवै निर्वाचन क्षेत्रमा मतगणना सुरु भएको छ मतपत्र मिलाउने काम पूरा भई ४ः१५ बाट तनहुँ –१ को मतगणना सुरु भएको मुख्य निर्वाचन अधिकृतको कार्यालयले जनाएको छ ।
बागलुङका दुई वटै निर्वाचन क्षेत्रमा मतगणना सुरु
प्रतिनिधि सभाअन्तर्गत बागलुङका दुई वटै निर्वाचन क्षेत्रमा मतगणना सुरु भएको छ । बागलुङ निर्वाचन क्षेत्र नं. १ को जिल्ला समन्वय समितिको हल र निर्वाचन क्षेत्र नं. २ को बुर्तिवाङ बजारस्थित नयाँ सहरी आयोजनाको कार्यालयमा मतगणना सुरु भएको हो ।
उत्तरी गोरखाको मतपेटिका हेलिकप्टरमार्फत ल्याइयो
हेलिकप्टर मार्फत उत्तरी गोरखाको मतपेटिका ढुवानी गरिएको छ । सोमबार अपराह्न नेपाली सेनाको हेलिकप्टर मार्फत मतपेटिका सदरमुकाम ल्याइएको गोरखाका प्रमुख जिल्ला अधिकारी शंकरहरि आर्चायले जानकारी दिनुभयो ।
मनाङमा एमालेको अग्रता
प्रतिनिधि सभा तथा प्रदेश सभा निर्वाचन २०७९ को मतगणनामा हिमाली जिल्ला मनाङमा एमालेको अग्रता छ । प्रतिनिधि सभा र प्रदेश सभा ‘१’ तर्फ नेकपा एमालेको अग्रता रहेको मुख्य निर्वाचन अधिकृतको कार्यालयले जनाएको हो ।
पूर्वी नवलपरासी २ को मतगणना सुरु, काँग्रेसको अग्रता
पूर्वी नवलपरासीको निर्वाचन क्षेत्र नं. २ मा प्रतिनिधिसभा सदस्यको लागि मतगणना सुरु भएको छ । यहाँ नेपाली काँग्रेसका विष्णु कार्कीले अग्रता लिनुभएको छ ।
मुस्ताङ प्रदेशसभा (क) मा कांग्रेसका गुरुङ विजयी
मुस्ताङको प्रदेशसभा (क) मा गठबन्धनको तर्फबाट नेपाली कांग्रेसका नम्डु गुरुङ विजयी हुनुभएको छ ।
कास्की क्षेत्र नं १ र ३ मा मतगणना सुरु
कास्की निर्वाचन क्षेत्र नं ३ को मतगणना सुरु भएको छ । सर्वदलीय सहमतिका आधारमा आज दिउँसो २ बजेबाट मतगणना सुरु भएको हो ।
स्याङ्जा क्षेत्र १ मा मतगणना सुरु
दुई निर्वाचन क्षेत्र रहेको स्याङ्जाको क्षेत्र नं १ मा मतगणना सुरु भएको छ । दिउँसो सवा १ बजेदेखि मतगणना सुरु गर्ने सर्वदलीय तथा सर्वपक्षीय बैठकले निर्णय गरे पनि तयारी नपुग्दा ढिलाइ भएको हो ।
लमजुङमा मतगणना सुरु
लमजुङमा प्रतिनिधि सभा तथा प्रदेश सभा निर्वाचन २०७९ को मतगणना सुरु भएको छ । बेसीशहरस्थित जिल्ला समन्वय समितिको सभाहलमा मतगणना सुरु भएको मुख्य निर्वाचन अधिकृत शिवप्रसाद खनालले बताउनुभयो । उहाँका अनुसार लमजुङमा ८० हजार ९ सय ९१ मत खसेको छ । यो ६० दशमलब ६४ प्रतिशत मत हो ।
विजयी सुरुआतसँगै चर्चामा योगेश
यस पटकको प्रतिनिधिसभाको निर्वाचनमा विजयी सुरुआत गरेको नेपाली कांगेसको उम्मेदवार हुनुहुन्छ, योगेश गौचन थकाली । उहाँले नेकपा (एमाले)का उम्मेदवार प्रेमप्रसाद तुलाचनलाई पराजित गर्दै सङ्घीय संसद्को यात्रा तय गर्नुभएको हो ।
तनहुँ-१ मा २ बजेबाट मतगणना सुरु हुने
अमरराज नहर्कीतनहुँ, मङ्सिर ५ गते । तनहुँमा मतगणनाका लागि सर्वपक्षीय बैठक सकिएको छ । बैठकले आज दिउँसो २ बजेबाट मतगणना गर्ने सहमति गरेको जिल्ला निर्वाचन कार्यालय तनहुँमा प्रमुख हरिप्रसाद ढकालले जानकारी दिनुभयो । आइतबार मध्यरातसम्म मतपेटिका ल्याउन समय लागेकोले आज बिहान मात्रै सर्वपक्षीय बैठक बसेको उहाँले बताउनुभयो । तनहुँ–१ को मतगणना दिउँसो २ बजे सुरु गरिने भएपनि तनहुँ-२ को मतगणना भने दिउँसो १२ः३० बजेबाट सुरु गरिने ढकालले जानकारी दिनुभयो । यसपटक तनहुँमामा ५५ प्रतिशत मत खसेको छ । जिल्लामा दुई लाख ४८ हजार ४९५ मतदाता मध्ये सो प्रतिशतमा मत खसेको ढकाल बताउनुहुन्छ । २ प्रतिनिधिसभा सदस्य र ४ प्रदेशसभा सदस्य निर्वाचनका लागि तनहुँबाट विभिन्न राजनीतिक दल तथा स्वतन्त्र गरी ५७ जनाले उम्मेदवारी मनोनयन दर्ता गरी चुनावी मैदानमा उत्रिएको मुख्य निर्वाचन अधिकृतको कार्यालयले जनाएको छ । मतगणना स्थल सुरक्षाको लागि तारजाली र सिसी क्यामराजिल्लामा सुरक्षा चुनौतीलाई मध्यनजर गर्दै मतगणना स्थलमा तारजाली राख्नुका साथै सिसी क्यामेरा सहितको अन्य सुरक्षा प्रबन्ध मिलाइएको छ । जिल्ला समन्वय समितिको सभाहलभित्र तयार पारिएको मतगणनास्थलमा तारजाली र मतपेटिका राख्ने ठाउँमा सिसिटिभी क्यामरा जडान गर्नुका साथै बत्ती गएको समयमा बत्तीको व्याकअपको व्यवस्थासमेत गरिएको छ । मतगणना स्थलमा दलका उम्मेदवार/प्रतिनिधिलाई बस्ने व्यवस्था तारजालीभन्दा बाहिर बनाइएको छ । मतगणनाका लागि चारवटा कोठा व्यवस्थापन गरिएको जिल्ला न्यायाधीश एवं मुख्य निर्वाचन अधिकृत दलबहादुर केसीले जानकारी दिनुभयो । यसका अतिरिक्त मतगणना स्थल जिल्ला समन्वय समितिको भवनलाई नेपाल प्रहरी, सशस्त्र प्रहरी र नेपाली सेनाले समेत सुरक्षा मिलाइएको छ । प्रमुख जिल्ला अधिकारी विश्व प्रकाश अर्यालले मतगणना हुने बेला सुरक्षा चुनौती थपिने भन्दै सुरक्षाका सबैखाले मापदण्ड अपनाइएको बताउनुभयो । "मतगणना निकै संवेदनशील हुने भएकाले मतपेटिकालाई सुरक्षित राख्नुपर्छ, कुनै पनि घटना हुन नदिनु हाम्रो कर्तव्य हो", प्रजिअ अर्यालले भन्नुभयो ।
स्याङ्जामा सबा १ बजेबाट मतगणना हुने
दुई निर्वाचन क्षेत्र रहेको स्याङजाको क्षेत्र नं १ मा दिउँसो सबा १ बजेबाट मतगणना हुने छ । सर्वदलीय तथा सर्वपक्षीय बैठकले मतगणना गर्ने समय तय भएको हो । मतगणना एकै पटक प्रत्यक्ष र समानुपातिक गणना हुने मुख्य निर्वाचन अधिकृतको कार्यालयले जनाएको छ ।
मुस्ताङबाट कांग्रेसले खाता खोल्यो, गौचन विजयी
नेपाली कांग्रेसका प्रतिनिधिसभा सदस्य उम्मेदवार २९ वर्षीय योगेश गौचन थकाली मुस्ताङबाट विजयी हुनुभएको छ । यो विजयीसँगै नेपाली कांग्रेसले जितको खाता खोलेको हो ।