अर्घाखाँचीमा टोपबहादुर रायमाझीको अग्रता
प्रारम्भिक मतअनुसार प्रतिनिधि सभामा नेकपा (एमाले) का टोपबहादुर रायमाझीले प्रारम्भिक अग्रता लिनुभएको छ । २०६९ मत गणना गर्दा रायमाझीलाई ११८६ र नेपाली कांग्रेसकी उम्मेदवार पुष्पा भुसालले ७४७ मत प्राप्त गर्नुभएको छ ।
ललितपुर-३ मा मतगणना जारी (फोटो फिचर)
ललितपुरको क्षेत्र नं ३ को मतगणना जावलाखेलस्थित स्थानिय विकास प्रशिक्षण प्रतिष्ठाको हलमा भइरहेको छ ।
पाँच सय मत गणना हुँदा प्रधानमन्त्री देउवालाई २३९ मत
डडेलधुरामा प्रतिनिधिसभा सदस्यतर्फ पाँच सय मत गणना हुँदा नेपाली कांग्रेसका उम्मेदवार प्रधानमन्त्री शेरबहादुर देउवाले २३९ मत प्राप्त गर्नुभएको छ।
बागलुङका दुई वटै निर्वाचन क्षेत्रमा मतगणना सुरु
प्रतिनिधि सभाअन्तर्गत बागलुङका दुई वटै निर्वाचन क्षेत्रमा मतगणना सुरु भएको छ । बागलुङ निर्वाचन क्षेत्र नं. १ को जिल्ला समन्वय समितिको हल र निर्वाचन क्षेत्र नं. २ को बुर्तिवाङ बजारस्थित नयाँ सहरी आयोजनाको कार्यालयमा मतगणना सुरु भएको हो ।
पाल्पा क्षेत्र नं. २ मा मतगणना सुरु
पाल्पा क्षेत्र नं २ को मतगणना सुरु भएको छ । दलका प्रतिनिधि तथा उम्मेदवारको बैठकपछि मतगणनाको कार्य सुरु भएको हो ।
कैलाली क्षेत्र नं ३ मा नागरिक उन्मुक्ति पार्टीलाई अग्रता
कैलाली क्षेत्र नं ३ मा मतगणना कार्य दिउँसोबाट सुरु भएको छ । बिहान सर्वदलीय बैठक बसी प्रत्यक्षतर्फ प्रतिनिधि सभा सदस्यको मतगणना सुरु भएको हो। मतगणनाको सुरुवाती अग्रता नागरिक उन्मुक्ति पार्टीले लिएको छ ।
उत्तरी गोरखाको मतपेटिका हेलिकप्टरमार्फत ल्याइयो
हेलिकप्टर मार्फत उत्तरी गोरखाको मतपेटिका ढुवानी गरिएको छ । सोमबार अपराह्न नेपाली सेनाको हेलिकप्टर मार्फत मतपेटिका सदरमुकाम ल्याइएको गोरखाका प्रमुख जिल्ला अधिकारी शंकरहरि आर्चायले जानकारी दिनुभयो ।
ललितपुर–३ मा तोसिमा अगाडि
ललितपुर क्षेत्र नम्बर ३ मा राष्ट्रिय स्वतन्त्र पार्टीका डा. तोसिमा कार्कीले अग्रता लिनुभएको छ ।
डडेल्धुरामा प्रधानमन्त्री देउवालाई अग्रता
डडेल्धुरा जिल्लाको प्रतिनिधिसभा सदस्यमा प्रधानमन्त्री एवम् नेपाली कांग्रेसका सभापति शेरबहादुर देउवाले सुरुमै अग्रता लिनुभएको छ । देउवा गठबन्धनबाट साझा उम्मेदवार हुनुहुन्छ ।
जुम्लामा मतगणना सुरु
जुम्लामा मत गणना सुरु गरिएको छ । मुख्य निर्वाचन अधिकृत विष्णु प्रसाद गौतमका अनुसार प्रतिनिधिसभाको मत गणना सुरु भएको छ भने प्रदेशसभाको मत गणनाको तयारी भइरहेको छ ।
भक्तपुर–१ मा राप्रपा, २ मा कांग्रेस अगाडि
क्तपुर क्षेत्र नं २ को मतगणनामा नेपाली कांग्रेसको अग्रता कायमै छ । मध्यपुरथिमि नगरपालिकाको बोडेस्थित नेपाल कृषि विकास बैङ्कको तालिम केन्द्रमा जारी मतगणनामा १० हजार मतगणना हुँदा प्रतिनिधिसभातर्फ कांग्रेसले नेकपा (एमाले) का उम्मेदवारलाई पछाडि पार्दै अग्रता कायमै राखेको हो ।
मनाङमा एमालेको अग्रता
प्रतिनिधि सभा तथा प्रदेश सभा निर्वाचन २०७९ को मतगणनामा हिमाली जिल्ला मनाङमा एमालेको अग्रता छ । प्रतिनिधि सभा र प्रदेश सभा ‘१’ तर्फ नेकपा एमालेको अग्रता रहेको मुख्य निर्वाचन अधिकृतको कार्यालयले जनाएको हो ।
काठमाडौं–१ मा राप्रपाका रविन्द्र मिश्रको अग्रता
काठमाडौं क्षेत्र नं. १ को प्रारम्भिक मतगणना अनुसार राष्ट्रिय प्रजातन्त्र पार्टीका रविन्द्र मिश्रको अग्रता देखिएको छ ।
सिन्धुलीमा अझै सुरु भएन मतगणना
सिन्धुलीमा प्रतिनिधिसभा र प्रदेशसभा निर्वाचनको मतगणना सोमबार बेलुका ४ बजेसम्म पनि सुरु हुन सकेको छैन ।
दाङ –२ मा रेखा शर्माको अग्रता
दाङ निर्वाचन क्षेत्र नम्बर २ मा हँसिया हथौडा चिन्ह लिनुभएका नेकपा (माओवादी केन्द्र)का उम्मेदवार रेखा शर्माले अग्रता कायम गर्नुभएको छ । २७८० मत गन्दा उहाँले एक हजार ४५० मत प्राप्त गर्नुभएको हो ।
काठमाडौंको तीन क्षेत्रमा राष्ट्रिय स्वतन्त्र पार्टी अगाडि
काठमाडौंमा प्रतिनिधि सभाका १० निर्वाचन क्षेत्रको मतगणना भइरहेको छ । गणना भएकामध्ये तीन स्थानमा राष्ट्रिय स्वतन्त्र पार्टी अगाडि छ ।
इलाम क्षेत्र नं. १ काे मतगणना सुरु
प्रेम अधिकारी पशुपतिनगर, मंसिर ५ गते । इलाम निर्वाचन क्षेत्र नं. १ को मतगणना सुरु भएको छ । सूर्योदय नगरपालिका–१ गोर्खेको सिहंदेवी मावि केन्द्रमा विवादित ९७ मत गणना हुने सर्वदलीय सहमति भएपछि मत गणना सुरु भएको हो । यसअघि प्रदेशसभाको मतपेटिकामा प्रतिनिधिसभाको मतपत्र खसेको पाइएपछि गणना सुचारु हुन सकेको थिएन । सर्वदलीय बैठकबाट ९७ मत प्रतिनिधिसभाको भएमा प्रतिनिधिसभाकै मान्यता पाउने र प्रदेशसभाको भए प्रदेशसभा नै जोड्ने सहमति भएको थियो । प्रतिनिधिसभा निर्वचन क्षेत्र नं १ मा १ लाख ९ हजार ५ सय ३७ मतदातामध्ये ५९ हजार १ सय ३६ मत खसेको छ । खसेको मत ५३ दशमलव ९९ हुन आउँछ । इलाम १ मा गठबन्धनबाट पूर्व प्रधानमन्त्री झलनाथ खनाल र एमाले जिल्ला अध्यक्ष महेश बस्नेतबीच मुख्य प्रतिस्पर्धा हुँदैछ ।
तीन मतदान केन्द्रको मतपेटिका हेलिकप्टरबाट ढुवानी
जिल्लाको भोटखोला गाउँपालिकाको ३ मतदान केन्द्रको मतपेटिका हेलिकप्टरबाट ल्याइएको छ ।
पाँचथरमा ७ बजेबाट मतगणना हुने
नारायण तुम्बापो फिदिम, मङ्सिर ५ गते । पाँचथरमा आइतबार सम्पन्न निर्वाचनको सबै मतपेटिका सोमबार बिहान ३ बजेसम्ममै सङ्कलन भएपनि मतगणना भने साँझ ७ बजेबाट मात्र सुरु हुने भएको छ। यहाँको कुम्मायक गाउँपालिका–४ स्थित सिद्ध माध्यमिक विद्यालय तिङ्देन मतदान केन्द्रमा भएको मतपत्रको विषयमा विवाद उत्पन्न भएपछि गणनामा ढिलाइ भएको हो । मतदान केन्द्रमा खटिएका कर्मचारीको असावधानीका कारण २१ थान मतपत्र प्रदेशसभा तर्फको वितरण हुनुपर्नेमा प्रतिनिधिसभातर्फको पर्न गई सोही मत्रपत्रमा मतदाताले सङ्केत गरेर मतदान गरेको पाइएपछि विवाद भएको थियो । यस सम्बन्धमा निर्वाचन आयोगको राय माग गर्न पत्राचार गर्ने र त्यसपछि प्राप्त हुने आयोगको निर्णय मान्ने सर्वदलीय बैठकको निर्णयपछि अन्य क्षेत्रको मत गणना सुरु गर्ने सहमति भएको छ । मतगणना धाँधलीरहितले सम्पन्न गर्न गराउन फिदिमको मतगणना स्थल परिसरमा उच्च सर्तकताकासाथ सुरक्षाकर्मी खटाइएको प्रमुख जिल्ला अधिकारी गणेश गैरेले बताउनुभयो । मुख्य निर्वाचन अधिकृतद्वारा प्रदान गरिएको प्रवेश अनुमति पत्र पाएकालाई मात्र मतगणना स्थलमा जान पाउने व्यवस्था गरिएको छ । मतगणना कक्षमा तार जाली र सिसी क्यामराकोसमेत व्यवस्था गरिएको छ । प्रत्यक्षतर्फको तीन दिन भित्रमा मतगणना सम्पन्न गर्ने योजना रहेको सूचना अधिकारी सिजापतिले बताउनुभयो। त्यसपछि समानुपातिकको पनि तीन दिनमै परिणाम सार्वजनिक गर्नेगरी गणना थालिने उहाँले जानकारी दिनुभयो । जिल्ला निर्वाचन कार्यालय प्रमुख कुमारप्रसाद भट्टराईका अनुसार पाँचथरमा ५४ प्रतिशत मतदान छन् । जिल्लामा कुल एक लाख ३८ हजार ९३२ मतदाता रहेकामा ७४ हजार ८ सय ९८ जनाले मतदान गरेका छन् । जसमा ३९ हजार ६३७ पुरुष र ३५ हजार २६१ महिला रहेका छन् । यो पटक गत स्थानीय तह निर्वाचनको तुलनामा ११ प्रतिशतले कम मतदान भएको पाइएको छ । निर्वाचनप्रति मतदाताको उत्साह नदेखिनुमा मुख्यगरी राजनीतिक दलप्रति नागरिकको वितृष्णा प्रकट भएको सङ्केत मिल्ने यहाँका नागरिक समाज अगुवाको विश्लेषण छ । एक सङ्घ तथा दुई प्रदेशसभा निर्वाचन क्षेत्र रहेको जिल्लाको जम्मा १०२ मतदान स्थल अन्तरगतका १७७ मतदान केन्द्रमा मतदान भएको थियो । निर्धारित मतदान सम्पन्नपछि जिल्लाको विभिन्न ठाउँबाट थालिएको मतपेटिका सङ्कलन गर्न दुर्गमताका कारण सोमबार बिहानको ३ बजेसम्म समय लागेको थियो । निर्वाचन कार्यक्रम भइरहेको अवस्थामा फिदिम नगरपालिका–४, सुखबोध माध्यमिक विद्यालय मतदान केन्द्र क्षेत्रमा दुई पटकसम्म अज्ञात समूहद्वारा सुतली बम विस्फोट गराइएको थियो । निर्वाचन बिथोल्ने प्रयास स्वरूप विस्फोट गराइए पनि मतदान कार्य अवरुद्ध हुन नदिइएको प्रमुख जिल्ला अधिकारी गणेश गैरेले बताउनुभयो । जिल्लाको अन्य ठाउँमा शान्तिपूर्णे निर्वाचन सम्पन्न भएको पाइएको छ ।
पूर्वी नवलपरासी २ को मतगणना सुरु, काँग्रेसको अग्रता
पूर्वी नवलपरासीको निर्वाचन क्षेत्र नं. २ मा प्रतिनिधिसभा सदस्यको लागि मतगणना सुरु भएको छ । यहाँ नेपाली काँग्रेसका विष्णु कार्कीले अग्रता लिनुभएको छ ।
मुस्ताङ प्रदेशसभा (क) मा कांग्रेसका गुरुङ विजयी
मुस्ताङको प्रदेशसभा (क) मा गठबन्धनको तर्फबाट नेपाली कांग्रेसका नम्डु गुरुङ विजयी हुनुभएको छ ।
सप्तरी १ मा कांग्रेसको अग्रता
सप्तरीको प्रतिनिधि सभा सदस्य क्षेत्र नं. १ मा नेपाली कांग्रेसले अग्रता लिएको छ ।
कपिलवस्तु ३ कांग्रेसका शाहको अग्रता
कपिलवस्तु प्रतिनिधि सभा निर्वाचन क्षेत्र नम्बर ३ मा नेपाली कांग्रेसका अभिषेक प्रताप शाहले अग्रता लिनु भएको छ ।
डोटीमा मतगणना ५ बजे पछि मात्रै
केशवचन्द्र महरा दिपायल, मंसिर ५ गते । डोटीमा ५ बजे पछि मात्रै मतगणना हुने भएको छ । राजनैतिक दल तथा उम्मेदवारसँगको सर्वपक्षीय बैठकले ५ बजेदेखि मतगणना सुरु गर्ने सहमति गरेको हो।बैठकमा प्रतिनिधि सभा र प्रदेश सभा दुवै तर्फको मतगणना एकै पटक सुरु गर्ने सहमति भएको मुख्य निर्वाचन अधिकृत शिवलाल पाण्डेले जानकारी दिनुभयो ।एउटा प्रतिनिधि सभा र दुईवटा प्रदेशसभा निर्वाचन क्षेत्र रहेको डोटीमा ५१.१७ प्रतिशत मत खसेको थियो । २७ हजार ४५७ जना पुरुष र ३६ हजार ६०१ महिला मतदाता गरी जम्मा ६४ हजार ५८ मत खसेको थियो । "यसअघि प्रतिनिधि सभाको मात्रै मतगणना सुरु गर्ने तयारी भएको थियो", मुख्य निर्वाचन अधिकृत पाण्डेले भन्नुभयो,"बैठकमा तीन वटै निर्वाचन क्षेत्रको मतगणना एकै पटक सुरु गर्ने निर्णय भएका कारण थप तयारी गर्नु भएकाले ५ बजे देखि गणना सुरु गर्ने निर्णय भएको हो ।"
कास्की क्षेत्र नं १ र ३ मा मतगणना सुरु
कास्की निर्वाचन क्षेत्र नं ३ को मतगणना सुरु भएको छ । सर्वदलीय सहमतिका आधारमा आज दिउँसो २ बजेबाट मतगणना सुरु भएको हो ।
