लीलाधर वली
घोराही, साउन २८ गते । दाङमा खोलाले बगाएर बेपत्ता भएका वृद्धको शव फेला परेको छ । पत्रे खोलाले बगाउँदा बेपत्ता हुनुभएका घोराही उपमहानगरपालिका–११ झमरे निवासी ६४ वर्षीय तिलकराम विकको शव फेला परेको हो ।
जिल्ला प्रहरी कार्यालय दाङका सूचना अधिकारी एवम् प्रहरी नायब उपरीक्षक राजनकुमार गौतमले आइतबार बिहान ८ः३० बजेतिर घर नजिकै रहेको पत्रे खोलाले बगाउँदा विक बेपत्ता हुनुभएको थियो । प्रहरी नायब उपरीक्षक गौतमले भन्नुभयो, ‘‘घरमा शौचालय नभएका कारण दिसा गर्न खोलामा गएको बेला बग्नुभएका विकको शव दिउँसो भेटिएको हो ।’’
उहाँका अनुसार शव घोराही उपमहानगरपालिका–९ तेघरास्थित हापुर खोलामा जङ्गलमा घोप्टो परेको अवस्थामा फेला परेको थियो ।
