अर्जुन काफ्ले
स्याङ्जा, वैशाख २५ गते । हरिनास गाउँपालिका वडा नं. ६ दग्दीमा एक दिने पशु स्वास्थ्य शिविर गरिएको छ ।
नेपाल पाराभेटेरिनरी एण्ड लाइभस्ट्क एसोसिएसन (नेभ्ला) जिल्ला कार्य समितिले पालिकाको सहकार्य गर्दै शिविर सञ्चालन गरेको हो ।
१५ जना प्राविधिकले गरेको निःशुल्क पशु स्वास्थ्य शिविरमा २३२ जना किसानका ४७६ पशुको उपचार गरिएको थियो ।
गाई, भैँसी, बाख्रा, कुकुर, बिरालो तथा कुखुरालगायत पशुपक्षीको गोबर एवं स्वास्थ्य परीक्षण गरिएको थियो ।
शिविरमा गोबर जाँच, दूध परीक्षण, पशु उपचार सेवा, बन्ध्याकरण, रेबिज खोप तथा पशुपालनसम्बन्धी आवश्यक परामर्श समेत दिइएको थियो ।
प्राविधिकहरूका अनुसार गोबर परीक्षण गर्दा अधिकांशमा नाम्ले तथा गहते कीराको प्रकोप देखिएको पालिका उपाध्यक्ष इन्द्राकुमारी थापा रानाले बताउनुभयो ।
मानिसको जस्तै पशुको पनि बेला बेलामा स्वास्थ्य परीक्षण गर्न आवश्यक देखिएकाले शिविर गरिएको बताउनुभयो ।
दूध तथा मासुका लागि पालिँदै आएको पशुहरू स्वस्थ भए हाम्रो स्वास्थ्यमा पनि लाभ हुने बताउँदै उपाध्यक्ष रानाले पशुहरूले खान खाए नखाएको, चालचलन र दैनिकीका बारेमा ध्यान दिनुपर्ने बताउनुभयो ।
