लालबन्दीमा गाडीको ठक्करबाट बेवारिसे महिलाको मृत्यु

जनार्जन खत्री

सर्लाही, वैशाख २४ गते । सर्लाहीको लालबन्दीमा गाडीको ठक्करबाट एक बेवारिसे महिलाको मृत्यु भएको छ । आइतबार बिहान झिसमिसेमै अज्ञात गाडीको ठक्करबाट मागी खाँदै हिँड्ने तराई मुलको जस्तो देखिने अन्दाजी ५० वर्षीया महिलाको मृत्यु भएको हो ।

पूर्व–पश्चिम राजमार्ग अन्तर्गत लालबन्दी नगरपालिका–९, बस्तीपुरमा भएको दुर्घटनामा महिलाको मृत्यु भएको इलाका प्रहरी कार्यालय लालबन्दीले जनाएको छ । 

बिहान मर्निङवाकमा निस्किएका व्यक्तिले सडकमा गाडीको ठक्करबाट महिलाको मृत्यु भएको देखेपछि प्रहरीमा खबर गरेका थिए । महिलालाई ठक्कर दिने सवारीको पहिचान गर्न प्रहरी परिचालन भइरहेको लालबन्दीका निमित्त प्रहरी प्रमुख प्रहरी नायब निरीक्षक (सइ) भिमराज सुवेदीले जानकारी दिनुभयो । 

मृतक महिलाको शव पोष्टमार्टमका लागि प्रादेशिक अस्पताल मलङ्गवा पठाइएको लालबन्दी प्रहरीले जनाएको छ ।