काठमाडौं, फागुन ३० गते । नेपाल प्रहरीका संयोग कपाली र नविता श्रेष्ठ १२औं पूर्णमान वज्राचार्य स्मृति राष्ट्रिय खुला टेबलटेनिस प्रतियोगितामा च्याम्पियन बन्नुभएको छ । खुलातर्फ सिंगल्सको पुरुषमा संयोग र महिलामा नवीता पहिलो हुनुभएको हो ।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको पुरुष फाइनलमा संयोगले आफ्नै क्लबका विनेश खनियाँलाई ११–९, ७–११, १५–१३, १३–११, १४–१२ को सेटमा हराउनुभयो । एभीएम टेबलटेनिस क्लबका रुविन महर्जन र गल्कोपाखा सेवा समाजका चन्दन शाही तस्रो हुनुभयो ।
महिलाको उपाधि भिडन्तमा राष्ट्रिय च्याम्पियन नविताले सौभाग्य ज्वेलर्सकी रविना महर्जनलाई १–११, ११–३, ११–८, ११–४, ७–११, ११–४ को सेटमा पाखा लगाउनुभयो । प्रहरीका मन्जु सुवाल र यशस्वी अवाल तेस्रो हुनुभयो ।
पुरुष-महिला दुवैमा शीर्षतीन स्थान हात पार्नेले क्रमशः ५० हजार, २५ हजार र १०/१० हजार रुपियाँ पुरस्कार पाउनुभयो ।प्रतियोगिताको महिला टिम इभेन्टमा प्रहरी पहिलो भयो । प्रहरीले फाइनलमा सौभाग्य ज्वेलर्सलाई ३–१ ले पाखा लगायो ।
प्राइम ग्लोबल र कान्तिपुर भ्याली पिङपोङ क्लब तेस्रो भएको छ । मिडियाको पुरुष सिंगल्स फाइनलमा मनोहरी थापाले मदन आचार्यलाई ११–३, ११–८, ११–८ को सोझो सेटमा हराउनुभयो ।
सुमन प्रधान तेस्रो हुनुभयो । प्रतियोगिताको कलेजतर्फ दुई स्वर्ण र एक कांस्यसाथ प्राइम टिम च्याम्पियन बन्यो । स्कुलतर्फ सृजना ज्ञानसागर एक स्वर्ण, दुई रजत र चार कांस्य जित्दै समूह विजेता भयो ।
‘टेबलटेनिस फर अल’ नाराका साथ भएको पाँचदिने प्रतियोगितामा विभिन्न ३४ स्पर्धामा ३ सय खेलाडीले सहभागिता जनाएको आयोजक काठमाडौं जिल्ला टेबलटेनिस सङ्घले जनाएको छ ।
