जीबछ यादव
लाहान, असार ९ गते। नेपाल विद्युत प्राधिकरण वितरण केन्द्र लाहानले एक हजार ५४३ जनाको विद्युत् लाइन कट्टा गरेपछि जेठ महिनासम्ममा चार करोड १७ लाख १४३ रुपियाँ असुल गरेको छ।
कार्यालय प्रमुख जितेन्द्रकुमार यादवका अनुसार विगत वर्षदेखि नउठेको विद्युत् महसुल यस पटक उठाउन सफल भएको भन्दै असार महिनासम्ममा यो रकम अझै बढ्नसक्ने बताउनुभयो।
उहाँका अनुसार एक हजार १४१ जनले रिकनेक्शन गर्दा प्रति ग्राहक ८७० को दरले लिइने जरिवाना वापत सात लाख ७४ हजार ६२० रूपियाँ जम्मा भएको छ। लाहान वितरण केन्द्रले लाहान बाहिरका नवराजपुर, भगवानपुर र सुखीपुर शाखाबाट विद्युत् महसुल उठ्ने क्रम उत्साहजनक छ। केन्द्रबाट ६५ हजार ग्राहकले लाहानबाट सेवा लिइरहेका छन्।
धनगडीमाई नगरपालिका–१४ मा विद्युतीकरण गर्न बाँकी रहेको प्रमुख यादवले बताउनुभयो। यो वर्ष वडासम्म विद्युतीकरण हुने उहाँको भनाइ छ। अनलाइन सेवाबाट १६ प्रतिशतले विद्युत् महसुल बुझाउने गरेको उहाँको भनाइ छ।
नेपाल विद्युत प्राधिकरण वितरण केन्द्र लाहान। तस्बिरः जीबछ
