फेरि रोकियो उपत्यकाको फोहोर व्यवस्थापन

काठमाडौं, साउन १ गते । पटक–पटक रोकिँदै आएको काठमाडौं उपत्यकाको फोहोर व्यवस्थापन आजदेखि पुनः रोकिएको छ । अन्तिम फोहोर व्यवस्थापनस्थल आसपासका बासिन्दाको अवरोधका कारण सोमबार काठमाडौं उपत्यकाको फोहोर व्यवस्थापन हुन नसकेको हो ।  

यसअघि काठमाडौं महानगरपालिकासँग भएको सहमति कार्यान्वयन नभएको भन्दै नुवाकोटको ककनी गाउँपालिका र धादिङको धुनीबेँसी नगरपालिकाका केही बासिन्दाले अवरोध गरेकाले आज उपत्यकाका १८ स्थानीय तहको फोहोर व्यवस्थापन हुन नसकेको हो । धुनीबेंसी नगरपालिका–१ का वडाध्यक्ष मानबहादुर तामाङका अनुसार सहमति भएको एकवर्ष बितिसक्दासम्म महानगरले स्थानीयवासीको मागप्रति बेवास्ता गरेकाले आजदेखि फोहोर व्यवस्थापनमा रोक लगाइएको हो । 

उहाँले भन्नुभयो, “फोहोर र मानिससँगै बस्नै सक्दैन, फोहोरलाई अन्यत्र व्यवस्थापनका लागि प्रबन्ध गर्नुपर्‍यो कि उक्त स्थानका बासिन्दालाई उपयुक्त स्थानमा स्थानान्तरण गर्नुपर्‍यो, अन्यथा फोहोर व्यवस्थापनमा समस्या आइरहन्छन् ।” आज बिहान फोहोर बोकेर ल्याण्डफिल्ड साइटमा जाँदै गरेका गाडी स्थानीयवासीको अवरोधका कारण बञ्चरेडाँडा र सिसडोलको बीचमै रोकिएको पनि वडाध्यक्ष तामाङले जानकारी दिनुभयो ।

फोहोर बोकेका करिब ५० वटा गाडी रोकिएका थिए । स्थानीयवासीले सहमतिका नाममा आफूहरुलाई झुक्याइएको आरोप लगाएका छन् । कामपाले  यसअघि कुहिने र नकुहिने फोहोर वर्गीकरण गरेर कुहिने फोहोर मात्र व्यवस्थापन गर्नेलगायत सहमति ल्याण्डफिल्ड साइट पीडित क्षेत्रका बासिन्दासँग गरेको थियो ।

यता कामपाको पूर्वाधार सल्लाहकार सुनिल लम्सालले यसअघि स्थानीयवासीसँग भएको सम्झौताअनुसार नै काम भइरहेको भन्दै फोहोर व्यवस्थापनमा रोक लगाउनु राम्रो नभएको बताउनुभयो । 

उहाँले भन्नुभयो,“स्थानीयवासीको मुख्य माग आसपासका तीन हजार रोपनी जग्गा अधिग्रहण गरिदिनुपर्‍यो भन्ने हो कामपाले मात्र गर्न सक्दैन त्यसका लागि केन्द्र सरकारसँग छलफल भइरहेको छ ।” विगतका वर्षमा पनि स्थानीयवासीकै अवरोधका कारण उपत्यकाको फोहोर महिनौँ सडकमै थुप्रने गरेको थियो ।   कामपाले यसवर्ष वर्ष फोहोर व्यवस्थापनमा कुनै समस्या हुँदैन भने पनि साउन महिना लागेसँगै फोहोर रोकिन थालेको छ । त्यसअघि सिसडोलमा व्यवस्थापन हुँदै आएको उपत्यकाको फोहोर गत भदौ ७ देखि बञ्चरेडाँडामा व्यवस्थापन हुँदै आएको छ । रासस