सिराज खान
नेपालगञ्ज, वैशाख २४ गते । फरक क्षमता भएका प्रेस सेन्टर नेपालका केन्द्रीय सदस्य पत्रकार मनबहादुर कठायतलाई स्कुटर हस्तान्तरण गरिएको छ ।
लुम्बिनी प्रदेशका पूर्व आन्तरिक मामिला मन्त्री तथा माओवादी केन्द्रका नेता तिलक शर्माले कर्णाली प्रदेशको कालिकोट निवासी पत्रकार कठायतलाई नेपालगञ्जमा आइतबार आयोजित एक कार्यक्रममा स्कुटरको चाबी दिएर हस्तान्तरण गर्नुभयो ।
हस्तान्तरण कार्यक्रममा बोल्दै पूर्व मन्त्री शर्माले विश्वासको खडेरी परेको वर्तमान समयमा विश्वास गरी फरक क्षमता भएका व्यक्तिलाई आर्थिक सहयोग गर्ने सहयोगी दाताहरूलाई धन्यवाद दिनुभयो ।
सामाजिक अभियन्ता लोकराज जैसीको पहलमा आर्थिक अभियान सञ्चालन गरिएको कार्यक्रममा डा. रवीन्द्र बासकोटी, डा. निस्ता श्रेष्ठ र सुनिल पोखरेलबाट एक लाख ८० हजार रुपियाँ सहयोग भएको र अरू सानोतिनो रकम अन्य दाताहरूबाट प्राप्त भएको थियो ।
उहाँले पत्रकार महासङ्घ र प्रेस काउन्सिल नेपाललाई समेत सहयोगका लागि आग्रह गरिएको बताउनुभयो ।
प्रेस सेन्टर, नेपालका केन्द्रीय सदस्य कठायतले दुई लाख १८ हजार रुपियाँ मूल्य परेको उक्त स्कुटर पाएपछि सबैलाई धन्यवाद दिँदै निरन्तर पत्रकारितामा कलम चलाउने जनाउनुभयो । उहाँले यसका लागि पहल गर्ने र सहयोग गर्ने सबैप्रति पनि आभार प्रकट गर्नुभयो ।
नेपालगञ्जमा ग्यारेज सञ्चालन गरेका सलमान राईले उक्त स्कुटरलाई तीन पाङ्ग्रे बनाउन प्राविधिक सहयोग गरेको जनाइएको थियो ।
