हुम्लाको डाँडाफयामा आगलागी हुँदा दुई घर जलेर नष्ट

राजन रावत 

हुम्ला, माघ २२ गते। सिमकोट गाउँपालिका–७ को डाँडाफया गाउँमा आगलागी हुँदा दुई घर पूर्ण रुपमा जलेर नष्ट भएका छन्। एउटा घरमा एक्कासि आगलागी भएको र अन्य दुई घरमा आगो सल्किएको हो। 

वडा अध्यक्ष बलवीर शाहीले आइतबार दिउँसो छक्क सिंहको घरमा लागेको आगोले अन्य दुई घरमा क्षति पुर्याएको बताउनुभयो। उहाँका अनुसार आगलागीबाट छक्क सिंह र काली सिंहको घर पूर्ण रुपमा जलेर नष्ट भएको छ। सुरसिंह सिंहको घरमा आंशिक क्षति पुगेको बताउनुभयो। दुई जनाको घर पूर्ण रुपमा जलेर नष्ट भएको कारण के कति क्षति भएको छ त्यसको विवरण आउन सकेको छैन। 

प्रहरी निरीक्षक गीताप्रसाद चौधरीले आगलागी भएको क्षेत्रमा प्रहरी पुगेको जानकारी दिनुभयो। क्षतिको विवरण सङ्कलन भइरहेको उहाँको भनाइ छ।