घोराही, असोज २० गते । अविरल वर्षाका कारण खोलामा आएको बाढीमा बगेर दाङमा एक जना बेपत्ता भएका छन् ।
अविरल वर्षाको कारण घोराही उपमहानगरपालिका वडा नम्बर १० गुर्जेखोलामा आएको बाढीमा बगेर स्थानीय ५५ वर्षीय कल्लु चौधरी बेपत्ता भएको जिल्ला प्रहरी कार्यालय दाङका प्रहरी उपरीक्षक एवं एसपी वीरबहादुर वलीले जानकारी दिनुभएको छ ।
प्रहरी प्रमुख वलीका अनुसार बुधवार दिउँसो दक्षिण अमराईबाट सर्रा जाने क्रममा चौधरी बगेर बेपत्ता हुनुभएको हो । चौधरी दिउँसो खोला तर्ने क्रममा बगेको र खोजी गर्दा अहिलेसम्म फेला पार्न नसकिएको प्रहरी प्रमुख वलीले जानकारी दिनुभयो ।
त्यसैगरि घोराही उपमहानगरपालिका ३ बेलुवा निवासी ४५ वर्षीय धिरज घिमिरेको घर नजिकैको खाल्डोमा डुबेर मृत्यु भएको प्रहरी प्रमुख वलीले जानकारी दिनुभयो । शवलाई पोष्टमाटमका लागि राप्ती स्वास्थ्य विज्ञान प्रतिष्ठान घोराहीमा राखिएको प्रहरीले जानकारी दिएको छ ।
