गोरखापत्र अनलाइन
काठमाडौं, भदौ २२ गते । सत्ता गठबन्धनको कार्यदलले सिट बाँडफाँट सम्बन्धमा प्रतिवेदन तयार गरेको छ । कार्यदलका सदस्य एवम् सञ्चार तथा सूचना प्रविधि मन्त्री ज्ञानेन्द्रबहादुर कार्कीले प्रतिवेदन तयार भएको र यसलाई भोलिको बैठकमा अन्तिम रूप दिइने जानकारी दिनुभयो ।
बैठकपछि सञ्चारकर्मीहरूसँग कुरा गर्नुहुँदै उहाँले भन्नुभयो, ‘‘अत्यन्त संक्षिप्त कुरा तपाईंहरुमार्फत जानकारी गराउँछु । जुन दिएको जिम्मेवारी छ, त्यस अनुसार प्रतिवेदन तयार गरेका छौँ । अन्तिम रूप दिनका निमित्त भोलि बिहान ९ बजे बैठक बस्छ ।’’
अन्तिम रूप दिएपछि प्रतिवेदन शीर्षस्थ नेतृत्वमा भोलि नै बुझाइने उहाँको भनाइ छ । यद्यपि सिट सङ्ख्याबारे भने थप छलफल गरेर औपचारिकरुपमा सार्वजनिक गरिने उहाँले बताउनुभयो ।
उहाँले भन्नुभयो, ‘‘सिट सङ्ख्या करिब–करिब मिलेको छ । त्यसका निमित्त छलफलको आवश्यकता छ । प्रतिवेदन बनाउने काम प्रारम्भ गरिसकेका छौँ ।’’
कुल ११ सदस्यीय कार्यदलको संयोजक काँग्रेसका पूर्व महामन्त्री कृष्णप्रसाद सिटौला हुनुहुन्छ । काङ्ग्रेसबाट सञ्चार तथा सूचना प्रविधि मन्त्री ज्ञानेन्द्रबहादुर कार्की, महामन्त्री गगन कुमार थापा सदस्य हुनुहुन्छ । नेकपा (माओवादी केन्द्र)बाट देव गुरुङ, वर्षमान पुन, एकीकृत समाजवादीबाट वेदुराम भुषाल, प्रमेश हमाल हुनुहुन्छ ।
यसैगरी, जनता समाजवादी पार्टीबाट रामसहायप्रसाद यादव, रकम चेम्जोङ र राष्ट्रिय जनमोर्चाबाट हिमलाल पुरी, आनन्द शर्मा सदस्य हुनुहुन्छ ।
