दैलेखका प्रजिअ प्याकुरेललाई कारबाही गर्न सांसद परियारको माग

काठमाडौं, साउन ३१ गते । नेपाली कांग्रेसका सांसद लक्ष्मी परियारले दैलेखका प्रमुख जिल्ला अधिकारी हरि प्याकुरेललाई कारबाही गर्न सरकारसँग माग गर्नु भएको छ ।

गृह मन्त्रालयको निर्देशन अनुसार नागरिकतामा आफ्नो नाम सच्याउँन पुगेका कर्णबहादुर कामीमाथि जातीय विभेदलाई प्रश्रय दिने गरी अपमानपूर्वक व्यवहार गरेको भन्दै प्रजिअ प्याकुरेल माथि तत्काल कारबाही गर्न सरकारसँग माग गर्नुभएको हो ।

मङ्गलबार प्रतिनिधिसभा बैठकमा बोल्नुहुँदै उहाँले कानुनभन्दा आफूलाई माथि राखि दलितमाथि दुव्र्यवहार गर्ने प्रजिअ प्याकुरेलले गृह मन्त्रालयको निर्देशनलाई समेत पालना नगरेर जातीय दम्भ देखाएकोमा आक्रोश व्यक्त गर्नुभयो ।

सांसद परियारले लोकतन्त्रमा कर्मचारीहरु शासक नभई जनताको सेवक हुने भएकाले उनीहरुले जनसेवाको काम नगरे सरकारले तत्काल कारबाही गर्नुपर्ने पनि बताउनुभयो ।