काठमाडौँ, चैत १० गते । नेपाली चलचित्र र म्युजिक भिडियोको आकाशमा पछिल्लो समय प्रविधिको जुन चमक देखिएको छ, त्यसको पृष्ठभूमिमा केही यस्ता शिल्पी छन् जसले दृश्यको भाषालाई नै बदलिदिएका छन् । यो आधुनिक दृश्य क्रान्तिका एक अविचल र दरिलो खम्बा हुनुहुन्छ, रूपेश थापा । सन् २०१० को दशकदेखि सुरु भएको उहाँको क्यामराको यात्राले एक दशकभन्दा लामो अनुभव बटुलिसकेको छ । अस्कर इन्टरनेसनल कलेजबाट चलचित्र मेकिङमा स्नातक थापाले आफ्नो सिर्जनात्मक लेन्समार्फत नेपाली मिडियालाई वैश्विक र सिनेम्याटिक स्वरूप दिन महत्वपूर्ण भूमिका खेल्दै आउनुभएको छ ।
करिअरको सुरुवातमै प्रकाश, कोण र मानवीय संवेदनामाझको सन्तुलन मिलाउन सक्ने अद्वितीय खुबीले उहाँलाई उद्योगमा छुट्टै पहिचान दिलायो । उहाँका लागि क्यामरा केवल एक उपकरण मात्र होइन, बरु कथावाचनको एउटा शक्तिशाली माध्यम हो । प्राविधिक सटिकता र कलात्मक सोचको सङ्गम नै उहाँको कामको मुख्य विशेषता हो । विधा जुनसुकै होस् फिचर फिल्म, म्युजिक भिडियो वा विज्ञापन प्रत्येक फ्रेममा प्राण भर्ने उहाँको अनुशासन र लगाव सधैँ अब्बल रहने गर्छ ।
नेपालका विकट भिरपाखादेखि विदेशका आधुनिक गल्लीसम्म उहाँको लेन्सले सयौँ कथा बुनेको छ । दुस्मन हेरेको हे¥यैदेखि सिमसिमे पानीमासम्मका उहाँका सिर्जना हेर्दा लाग्छ, रूपेशले क्यामरा चलाइरहनुभएको छैन, बरु प्रकाश र छायाको माध्यमबाट पर्दामा जीवन्त कविता लेखिरहनुभएको छ ।
उहाँको यो साधनालाई राप्ती (२०७९) र म्युजिक खबर (२०८१) जस्ता घरेलु अवार्डदेखि सन् २०२५ मा लन्डन र अमेरिकाका अन्तर्राष्ट्रिय मञ्चहरूले ‘उत्कृष्ट छायाङ्कन निर्देशक’ का रूपमा सम्मान गरिसकेका छन् । यी पुरस्कारहरू केवल धातुका ट्रफी होइनन्, नेपाली माटोको सुगन्धलाई विश्व मञ्चमा पु¥याउने उहाँको अथक् यात्राका साक्षी हुन् । मौलिकता र पात्रको मनोविज्ञानलाई दृश्यमा उतार्न सिपालु रूपेश नयाँ पुस्ताका लागि एक प्रेरणा हुनुहुन्छ । नेपाली चलचित्रले विश्व बजारमा आफ्नो पहिचान खोजिरहँदा, पर्दापछाडि बसेर त्यो सपनालाई दृश्यमार्फत साकार पार्ने उहाँ एक दृश्यशिल्पी हुनुहुन्छ ।
