कालीकोट समाचारदाता
कालीकोट, असार १९ गते । कर्णाली लोकमार्गको यात्रा भन्ने बित्तिकै हिउँदमा धूलो र वर्षामा हिलोको कष्ट नै यात्रुको दिमागमा आउँछ । सुर्खेतको वाङ्गेसिमलबाट जुम्लासम्म २३२ किलोमिटर सडक छ । कालीकोट सदरमुकाम मान्मसम्म १४७ किलोमिटर सडक पर्दछ । बाँकी ८५ किलोमिटर सडक कालीकोटबाट जुम्लासम्म हो । कर्णाली लोकमार्गमा सबैभन्दा डरलाग्दो दैलेख खण्डको सियाला, पादुका, साङगे बजार, राकम क्षेत्रमा पर्दछ । कालीकोटको गगनेखोला, सेरीघाट, मेग्रखोला, तल्लो माथिल्लो सुनारखोला, पिली टाकुल्ला खोलामा दैनिक नागरिकले दुःख पाउँदै आएका छन् । लोकमार्गका दुई दर्जनभन्दा बढी स्थानमा वर्षात्को समयमा सडक अवरोध हुने गरेको छ ।
कर्णालीमा खासै ठूलो वर्षा भएको छैन । तर, सामान्य वर्षाले पनि लोकमार्गका विभिन्न ठाउँका खहरेखोलाले सडक अवरुद्ध हुँदै आएको छ । कालीकोट खण्डमा पहिरो बगिरहेकाले दैनिक यातायात अवरुद्ध हुने गरेको छ ।
सुनारखोलाले सबैभन्दा बढी दुःख यसपालि पनि दिइरहेको छ । सुनारखोलामा दैनिक एक्साभेटरले गाडी तान्ने काम गरिरहेको जिल्ला ट्राफिक कार्यालय कालीकोटले जनाएको छ । प्रमुख जिल्ला अधिकारी रामहरि शर्माले कालीकोटको पहिरो सफाका लागि वर्षात्को समयमा एक्साभेटर तयारी अवस्थामा राख्न सम्बद्ध निकायलाई निर्देशन दिनुभएको छ । अहिले एक्साभेटरले पहिरो पन्छाउने र गाडीलाई तान्ने काम गरिरहेको छ । यसअघि सो सडकखण्डमा यातायात अवरुद्ध हुँदा स्थानीयले ज्यादै दुःख खेप्दै आएका थिए । नगरपालिकाले पनि अवरुद्ध सडक खुलाउनेतर्फ चासो दिँदै आएको छ । यद्यपि महालेखाको प्रतिवेदनमा राष्ट्रियस्तरका सडक खुलाउन एक्साभेटर प्रयोग गरेको भन्दै नगरपालिकाले भुक्तानी गरेको बजेटमा बेरुजु देखाएपछि पालिकाले खासै चासो दिएको छैन ।
