शिवराज ढुङ्गाना
अछाम, भदौ १२ गते । गोठालो गएको अवस्थामा नुहाउने क्रममा बुधबार एक किशोरी कर्णाली नदीमा बेपत्ता भएकी छन् । बेपत्ता हुनेमा तुर्माखाँद गाउँपालिका–१, रहफको कोटवाडा निवासी १६ वर्षीया कल्पना शाही रहेकी छन् ।
घरबाट गाईगोरु चराउन घाटखेत गएको बेलामा कर्णाली नदीमा नुहाउने क्रममा बगेर बेपत्ता भएको जानकारी आएको अछाम प्रहरी प्रमुख ओमप्रकाश खनालले जानकारी दिनुभयो । कर्णाली नदीमा बेपत्ता भएकी कल्पनाको प्रहरी चौकी रहफका प्रहरी र स्थानीयले खोजी गरिरहेका प्रहरीको भनाइ छ ।
इलाका प्रहरी कार्यालय कमल बजारमा प्रहरी निरीक्षक हर्षबहादुरकाे नेतृत्वमा थप टोलीहरू समेत परिचालन गरिएको खनालले जानकारी दिनुभयो ।
