‘ह्वाइट हाउस’ कैद गर्नेको घुइँचो

वासिङ्टन डिसी (अमेरिका), साउन २६ गते । विश्वकै शक्तिशाली मुलुक अमेरिकाको शक्ति कहाँ छ ? सायद यसको जवाफ हुन्छ– राष्ट्रपतिको कार्यालय ह्वाइट हाउस । सम्भवतः यही भएर होला यो भवन वा यसवरिपरिका संरचना भ्रमण गर्न वार्षिक एक करोडभन्दा बढी मानिस यहाँ आउने तथ्याङ्क छ । 

यसैलाई पुष्टि गर्ने गरी विश्वकै आँखा परेको ह्वाइट हाउसलाई नियाल्नेको भिड शनिबार र आइतबार थेगिनसक्नु देखियो । सात समुद्र पार गरेर घुम्न आएका विदेशी पाहुना हुन् वा अमेरिकामा रहेर अध्ययन वा कामका लागि आएका आगन्तुकै किन नहुन् । यो स्थान भ्रमण गर्न आउने गर्छन् । 

दुबईबाट सपरिवार अमेरिका घुम्न आउनुभएका मोहम्मद थानीले भन्नुभयो, “ह्वाइट हाउस त विश्वको पावर हाउस हो, यहाँ आएपछि नहेरी कसरी जानु ?’’ सपरिवार लहरै बसेर उहाँले प्रफुल्ल मुद्रामा फोटो खिचाउनुभयो ।

अर्जेन्टिनाबाट आउनुभएकी भिन्ताजले पनि ह्वाइट हाउसको आकर्षण आइफेल टावरभन्दा बढी रहेको सुनाउनुभयो । विश्वलाई कता लैजाने भन्ने निर्णय यही ह्वाइट हाउसमा निर्भर रहने गरेको अधिकांश आगन्तुकको भनाइ थियो । अमेरिकामा शुक्रबार गुड फ्राइडे, शनिबार र आइतबार कार्यालयको पनि छुट्टीको दिन मनाइने गरिन्छ । त्यसैले पनि ह्वाइट हाउसलाई अनेक कोणबाट नियाल्ने, फोटो, भिडियो खिच्नेको लर्कै लागेको थियो । 

व्यापार, व्यवसाय, विभिन्न कार्यक्रमको अवसर पारेर आइपुगेका पाहुनाका लागि शनिबार र आइतबारको दिन ह्वाइट हाउस हेर्न पाउने अवसरको दिन जस्तै हुन्छ । स्थानीयको पनि छुट्टीको दिन भएकाले बालबच्चासहित घुमफिर गर्नेहरू पनि धेरै भेटिए । स्कुल पढ्दै गरेका डेभिड आफ्ना बुवाआमा र साना भाइबहिनीसहित आएका थिए । ह्वाइट हाउसअघि सडकमा बजिरहेको गीतमा नाच्दै रमाउँदै पारिपट्टिको बगैँचामा उहाँहरू जस्तै शीतलमा सुस्ताउनेको पनि ठुलै भिड थियो । पारिबाट झन् राम्ररी ह्वाइट हाउस देखिने भन्दै डुलिरहेका फोटोग्राफरबाट ह्वाइट हाउसको तस्बिरसँगै आफूलाई समेट्नेको पनि तँछाडमछाडै थियो ।

सासा र उहाँका साथीहरू राता फूलसँगै सुनौलो बनेको साँझको घाममा ह्वाइट हाउस मोबाइलमा कैद गर्दै हुनुहुन्थ्यो । अमेरिकी, अफ्रिकी, मुस्लिम, एसियाली, कोरियाली होस् वा युरोपियन मुलुकका नागरिकै किन नहोऊन्, ह्वाइट हाउसको समर्थन वा विरोध जे गरे पनि ह्वाइट हाउसलाई शक्ति स्थल नमान्नेहरू कोही भेटिएनन् । कतिपय अमेरिकामा बसोवास गरिरहेका नेपाली नागरिक पनि ह्वाइट हाउस हेर्नका लागि बेलाबेलामा आउने गरेको सुनाउनुभयो ।

विश्व राजनीति होस् वा युद्धको अवस्था राष्ट्रपति डोनाल्ड ट्रम्पले यही ह्वाइट हाउसमा लिनुहुने निर्णय अमेरिकाको लागि मात्र हैन, विश्वकै लागि महत्वको हुने भएकाले पनि हरेक दिन कस्तो निर्णय ह्वाइट हाउसबाट बाहिरिन्छ भन्ने चासो विश्वका अन्य उच्च नेतृत्वको रहने गर्छ । त्यसैले पनि सेतो रङको आवरणमा मात्र ह्वाइट हाउसको सुन्दरता झल्केको नभई यसभित्र हुने निर्णयको बलले पनि हरेक मानिसको मस्तिष्कलाई तानिरहने आगन्तुकहरू बताउनुहुन्छ । बिदाको दिन बिहानदेखि रातिसम्म ह्वाइट हाउस हेर्नेको लाम लाग्ने गरेको स्थानीय युवा बताउँछन् ।