प्रदेशमै आयुर्वेदिक औषधी उत्पादनको तयारी

गोकर्ण पौडेल 

तुलसीपुर, मङ्सिर ९ गते । लुम्बिनी प्रदेशमै आयुर्वेदिक औषधी प्रशोधन तथा उत्पादनको गरिने भएको छ । लुम्बिनी प्रदेश स्वास्थ्य मन्त्रालयअन्तर्गत रहेको प्रादेशिक आयुर्वेद चिकित्सालय बिजौरीमा औषधी प्रशोधन तथा उत्पादनका लागि भवन निर्माण गरिएको छ । 

लुम्बिनी प्रदेश सरकारले बिजौरीमा औषधी उत्पादन, प्रशोधनका लागि भवन निर्माण सम्पन्न गरेको छ । करिब ५ करोडका लागतमा भवन निर्माण गरिएको हो । लुम्बिनी प्रदेशका स्वास्थ्य मन्त्री खेमबहादुर सारुमगरले प्रदेशभित्र रहेको आयुर्वेद अस्पतालका लागि आवश्यक पर्ने औषधी उत्पादन,प्रशोधन केन्द्रका लागि आवश्यक भौतिक सामग्रीका लागि आवश्यक बजेट व्यवस्थापन गरिने बताउनुभयो ।

बिहीबार अस्पताल निरीक्षणका क्रममा पुग्नुभएका मन्त्री सारुमगरले लुम्बिनी प्रदेशभित्रै जडीबुटी पर्याप्त रहेको र ती जडीबुटीबाट प्रदेशभित्रै प्रशोधन,उत्पादन गर्दा यस क्षेत्रको स्वास्थ्य क्षेत्रका साथै आर्थिक क्षेत्रमा समेत टेवा पुग्ने बताउनुभयो । 

फरक प्रसङ्गमा मन्त्री मगरले प्रदेश निर्देशनालयबाट हुँदै आएको मिर्गौला, मुटुरोग उपचारको सिफारिस प्रदेशका सम्बन्धित स्वास्थ्य कार्यालयबाटै हुने व्यवस्था गरिएको बताउनुभयो । मन्त्री मगरले सरकारी अस्पतालमा कार्यरत डाक्टर,कर्मचारीहरू निजी क्लिनिकमा नाम राखी प्रचार प्रसार गर्दै आएकोमा त्यसलाई हटाइएको बताउनुभयो । लुम्बिनी प्रदेश स्वास्थ्य मन्त्रालयका सचिव वासुदेव उपाध्यायले प्रदेशभित्र रहेको आयुर्वेद अस्पतालको जनशक्ति,भौतिक सामग्री,उपकरणको व्यवस्थापन गरिने बताउनुभयो ।  

अस्पतालका निमित्त निर्देशक डाक्टर सन्तोष ठाकुरले प्रशोधन केन्द्र सञ्चालनका लागि करिब सात करोड आवश्यक रहेको बताउनुभयो । उहाँले पछिल्लो समयमा आयुर्वेदप्रति सेवाग्राहीको आकर्षण बढ्दो क्रममा रहेकाले सरकारले आयुर्वेद,प्राकृतिक चिकित्सा,योगका क्षेत्रमा बजेट वृद्धि गर्दा प्रतिफल निस्कने बताउनुभयो । डाक्टर ठाकुरले २०४८ सालमा स्थापना भएको अस्पताल ३० शप्यामात्रै भएको र बिरामीको चाप बढेकाले ५० शय्या बनाउन तत्कालै आवश्यक रहेको बताउनुभयो ।