सिन्धुपाल्चोक, चैत१५ गते । जिल्लाको उच्च लेकाली भेग हेलम्बुमा ‘हाइअल्टिच्युड भलिबल’ प्रतियोगिता हुने भएको छ । समुद्री सतहदेखि दुई हजार पाँच सय मिटरको उचाइमा बागमती प्रदेशस्तरीय अन्तरपालिका अध्यक्ष कप पुरुष र महिला भलिबल प्रतियोगिता हुने भएको हो । सो खेल हेलम्बुको पर्यटकीय स्थल सेर्माथाङमा हुनेछ ।
खेल पर्यटन प्रवर्धन गराउने उद्देश्यले प्रतियोगिता आयोजना गरिएको गाउँपालिका अध्यक्ष निमा ग्याल्जेन शेर्पाले बताउनुभयो । प्रतियोगिता २०८० साल चैत २३ देखि ३० गतेसम्म हुनेछ । पुरुषतर्फको प्रतियोगिता चैत २३ देखि २६ गतेसम्म चल्नेछ । यसैगरी चैत २७ देखि ३० गतेसम्म महिलातर्फ भलिबल प्रतियोगिता हुने पालिकाले जनाएको छ ।
खेलमा प्रथम हुने महिला तथा पुरुषको टोलीले रु. तीन लाख नगद पुरस्कार, ट्रफी, पदक र प्रमाणपत्र पाउनेछ । यसैगरी, द्वितीय पुरस्कार रु. एक लाख ५० हजार र तृतीय पुरस्कार रु. ७५ हजार, ट्रफी, पदक र प्रमाणपत्र छ । उत्कृष्ट स्पाइकर, उत्कृष्ट सटर, उत्कृष्ट डिफेन्डर, उत्कृष्ट ब्लकर र उत्कृष्ट खेलाडीहरुलाई ट्रफी, पदक र प्रमाणपत्र दिइने आयोजकले जनाएको छ । रासस
