.jpg)
सिराज खान
नेपालगन्ज, चैत ७ गते । पश्चिमका प्रमुख नाकाहरूमध्येको एक नेपालगन्ज नाकाबाट भन्सार कार्यालयले आठ महिनाको अवधिमा निर्धारित लक्ष्यको ८० प्रतिशतभन्दा बढी राजस्व सङ्कलन गरेको छ ।
सो कार्यालयका अनुसार चालु आर्थिक वर्ष २०८२–८३ को आठ महिनामा १५ अर्ब ७७ करोड ११ लाख ५७ हजार रुपियाँ राजस्व सङ्कलन गर्ने लक्ष्य निर्धारित गरिएकोमा १२ अर्ब ७५ करोड ४३ लाख ८० हजार रुपियाँ अर्थात लक्ष्यको ८०.८८ प्रतिशत राजस्व सङ्कलन गरिएको छ ।
नेपालगन्ज भन्सार कार्यालयका प्रमुख जनार्दन पौडेलले गत आर्थिक वर्ष २०८१–८२ को आठ महिनामा लक्ष्यको ७२.४८ प्रतिशत राजस्व सङ्कलन भएकोमा चालु आवमा ८०.८८ प्रतिशत सङ्कलन भई आठ प्रतिशत वृद्धि भएको बताउनुभयो ।
उहाँले लक्ष्यको सबैभन्दा बढी माघ र फागुन महिनामा राजस्व सङ्कलन भएको जनाउँदै माघमा ८८.२४ र फागुनमा ८८.३२ प्रतिशत राजस्व सङ्कलन भएको बताउनुभयो ।
नेपालगन्ज भन्सार कार्यालयका अनुसार चालु आवमा २४ अर्ब ५४ करोड ५७ लाख ८२ हजार रुपियाँ राजस्व सङ्कलनको लक्ष्य निर्धारण गरिएकोमा आठ महिनामा करिब ५२ प्रतिशत मात्र राजस्व सङ्कलन भएको छ ।
लक्ष्य पूरा गर्नका लागि बाँकी रहेका चार महिनामा ४८ प्रतिशत राजस्व सङ्कलन गर्नुपर्ने देखिएकाले यो वर्ष पनि लक्ष्य पूरा नहुने सङ्केत देखिएको भन्सार कार्यालयका प्रमुख पौडेलले बताउनुभयो ।
गत आर्थिक वर्ष २०८१–८२ मा नेपालगन्ज भन्सारले लक्ष्यको ७४.६४ प्रतिशत राजस्व सङ्कलन गरेको थियो । त्यसको अघिल्लो आर्थिक २०८०–८१ मा ६३.३५ प्रतिशत राजस्व सङ्कलन गरेको थियो ।
