काठमाडौँ, चैत ७ गते । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन)ले आपसी सहकार्यबाट नै देश अगाडि बढ्ने बताउनुभएको छ । इस्लाम धर्मावलम्बीको महान् पर्व इद (इद–उल–फितर) को पावन अवसरमा सम्पूर्ण नेपालीमा शुभकामना दिनुहुँदै यस्तो बताउनुभएको हो ।
उहाँले शुभकामना सन्देशमा देशको समृद्धि र विकासका लागि सामाजिक सद्भाव र सहिष्णुता अनिवार्य रहेको उल्लेख गर्नुभएको छ।
साहले नेपालको मौलिक धर्म, संस्कृति र विविधताको सम्मान गर्दै आपसी सहकार्यका माध्यमबाट राष्ट्रलाई अघि बढाउनुपर्नेमा जोड दिनुभएको छ। उहाँले सन्देशमा भन्नुभएको छ, “एक–अर्काप्रतिको सम्मान, समझदारी र एकताले नै हाम्रो समाजलाई अझ सुदृढ बनाउनेछ भन्ने कामना गर्दछु। इदको पावन अवसरले नेपालीबिचको भाइचारा, प्रेम र मेलमिलापको भावनालाई अझ प्रगाढ बनाओस्।”
वरिष्ठ नेता साहले यस पर्वले सबै नेपालीमा एकताको सन्देश प्रवाह गर्ने र समृद्ध नेपाल निर्माणमा थप ऊर्जा प्रदान गर्ने विश्वास समेत व्यक्त गर्नुभएको छ।
फागुन २१ गतेको निर्वाचनमा १८२ सिट जितेको रास्वपाले साहलाई प्रधानमन्त्रीका रुपमा अगाडि सारेको छ । नवनियुक्त सांसदले चैत १२ गते शपथ लिने कार्यक्रम निर्धारण भइसकेको छ । त्यस लगत्तै साह प्रधानमन्त्री नियुक्त हुनुहुनेछ ।
