ट्याङ्कीभित्र घोरेढुङ्गो

काठमाडौँ, चैत २१ गते । ‘हल्लाउँ हल्लाउन सकिँदैन, फुटाउँ फुटाउन सकिँदैन’ खानेपानीको ट्याङ्कीभित्र पहिरोले बगाएर ल्याएको १३ फिट लामो र आठ फिट गोलाइ भएको विशाल ढुङ्गा (घोरेढुङ्गो) छिरेपछि काभ्रेपलाञ्चोकको पनौती नगरपालिका वडा नं. ११ कोलभन्ज्याङका नागरिकलाई पिरलो परेको छ । 

एक लाख लिटर क्षमताको ट्याङ्की ढुङ्गोले ओगटेपछि अहिले मुस्किलले ४० हजार लिटर पानीमात्रै अट्ने र त्यहीँबाट पानी वितरण हुने गरेको छ । यसले दीर्घकालमा समस्या पार्ने चिन्तामा स्थानीय छन् । खानेपानीको ट्याङ्कीमा पटक–पटक गल बोकेर स्थानीय नगएका पनि होइनन्, बिजुलीबाट चल्ने ढुङ्गा फुटाउने मेसिन प्रयोग गरे पनि ढुङ्गाको एक टुक्रा पनि निकाल्न नसकेपछि उहाँहरूको चिन्ता बढेको हो । असोज ११ को अविरल वर्षापछि बाढीपहिरोले पारेको क्षतिलाई बिर्र्सिएर पुरानै लयमा फर्किने प्रयास गरे पनि कोलभन्ज्याङका नागरिक भने खानेपानीको पिरलोमा परेको स्थानीय सुरेशप्रसाद हुमागाईंले उल्लेख गर्नुभयो । 

विगतमा खानेपानी ल्याउन भोगेको दुःख सम्झँदै फेरि त्यस्तो दिन आउने चिन्तामा परेको सोबिता तिमल्सिना बताउनुहुन्छ । उहाँले सो गाउँका महिलाले एक घन्टा टाढा पुगेर खानेपानी बोक्नुपर्नेमा अहिले उक्त ट्याङ्कीमा जम्मा गरेर घरघर पानी आएको छ । तर उक्त ढुङ्गाले सबैको निद्रै हराइदिएको छ । पानी भएपछि बाख्रा र गाई पालेर जीविकोपार्जन गर्ने परिवारलाई पनि समस्या पारेको तिमल्सिनाले बताउनुभयो । “पानी भएपछि बाख्रा पालेर दुई पैसा कमाउन थालेका महिला पनि बाख्रा बेच्न पर्ने चिन्तामा परेका छन्,” तिमल्सिनाले भन्नुभयो । 

पहिला फुट्लाजस्तो लागे पनि ढुङ्गा फुटाउन भएका अनेकौँ प्रयास असफल भएपछि चिन्ता थपिएको पनौती नगरपालिका वडा नं. ११ वडाध्यक्ष विपेन्द्र लामाले उल्लेख गर्नुभयो । वडाले ढुङ्गा फुटाउन पटक पटक जनशक्ति प्रयोग गरे पनि सम्भव नभएको बताउनुभयो । 

बागमती प्रदेश सरकारको सहयोगमा २०७९ असार २ मा सुरु भई २०७९ भदौको १२ मा सम्पन्न यो खानेपानी परियोजना नमुनाका रूपमा रहेको छ । यसबाट दुई सय ५५ परिवारले खानेपानी उपभोग गर्दै आएको उपभोक्ता समितिका अध्यक्ष दामोदर केसीले बताउनुभयो । वर्षामा केही सजिलो भए पनि सुक्खायाममा पानीको हाहाकार हुन सक्ने भएकाले सबै निकायले सहयोग गरेर ढुङ्गा हटाउन पहल गरिदिन स्थानीय जयराम हुमागार्इंले अनुरोध गर्नुभयो । उहाँले एक्साभेटर लैजान सक्ने अवस्था नभएको र अरू प्रयास गर्दा ट्याङ्की नै फुट्ला भन्ने चिन्ताले थप कार्य गर्न नसकिएको बताउनुभयो । पहिरोले ट्याङ्कीको मुख फुटाएर ढुङ्गोभित्र छिराएको हो । ढुङ्गा निकालेपछि मुख मर्मत गरेर सोही ट्याङ्की चलाउन सकिने भए पनि त्यसो गर्न नसक्दा समस्या बढेको उहाँले बताउनुभयो ।