गोरखापत्र
'मोडल हन्ट नेपाल'को सातौं संस्करण सुरु
काठमाडौं, जेठ १६ गते । 'मोडल हन्ट नेपाल २०२२'का लागि आवेदन खुला गरिएको छ । आयोजक नेक्स्ट मोडल्स नेपालले विज्ञप्ति जारी गर्दै सन् २०२२ को सातौं संस्करण संस्करणको लागि आवेदन खुला भएको जानकारी दिएको हो ।प्रतियोगिताको अडिसन असार ४ गतेदेखि साउन अन्तिम सातासम्म हुनेछ । फाइनल प्रतिस्पर्धाका लागि छानिएका प्रतियोगीलाई व्यक्तित्व विकास, शारीरिक बनावट, -याम्प वाक, बडी ल्याङ्ग्वेज, फोटोसुट, एक्सप्रेसन लगायतका ग्रुमिङ कक्षामा सहभागी गराइनेछ ।१८ देखि २८ वर्ष उमेर समूहका युवायुवतीले सहभागिता जनाउन सक्ने प्रतियोगितामा युवकको हकमा कम्तीमा ५ फिट ६ इन्च र युवतीको हकमा कम्तीमा ५ फिट २ इन्च उचाइ हुनुपर्ने प्रावधान छ ।प्रतियोगिताको विजेताले ५ लाख रुपैयाँ बराबरको उपहारसहित १ देखि १५ सेप्टेम्बरसम्म थाइल्याण्डमा आयोजना हुने अन्तर्राष्ट्रिय मोडलिङ प्रतियोगिता ‘सुपर मोडल इन्टरनेसनलमा’ नेपालको प्रतिनिधित्व गर्ने अवसर प्राप्त गर्नेछन् ।
नेपाली क्रिकेट टोली अमेरिकामा
आईसीसी विश्वकप लिग–२ अन्तर्गत जुन ९ देखि १५ तारिखसम्म अमेरिकामा आयोजना हुन लागेको त्रिदेशीय सिरिज खेल्न नेपाली टोली अमेरिका पुगेको छ ।
त्रियुगा प्रमुखमा नेपाली कांग्रेस, उपप्रमुखमा एमालेका उम्मेदवार विजयी
जिल्ला सदरमुकाममा रहेको उदयपुरको त्रियुगा नगरपालिकाको प्रमुखमा बहुमत वडाध्यक्ष् सहित इतिहासमै पहिलोपल्ट नेपाली काँग्रेसले विजय प्राप्त गरेको छ । नेपाली काँग्रेसका उम्मेदवार वसन्तकुमार बस्नेतले दुईहजार ८६ मतको अन्तरले एमालेका उम्मेदवार भागवत राउतलाई पराजित गर्दै उहाँ नगर प्रमुखमा विजयी हुनुभएको हो ।
२० जनाको शव प्राप्त, पोस्टमार्टमका लागि काठमाडौं ल्याउने तयारी
मुस्ताङको थासाङ गाउँपालिका–२ सानसुरेमा भएको तारा एयरको जहाज दुर्घटनास्थलमा अहिलेसम्म २० जनाको शव भेटिएको छ । दुई जनाको शव विमानको भग्नावशेषबाट निकाल्ने प्रयास भइरहेको जानकारी प्राप्त भएको छ ।
अन्तःशुल्क, भन्सार, आयकर र मूल्य अभिवृद्धि करसम्बन्धी नियमावली संशोधन
सरकारले अन्तशुल्क, भन्सार, आयकर र मूल्य अभिवृद्धि करसम्बन्धी नियमावलीमा संशोधन गरेको छ ।
बर्सेनि हुने चुरे दोहनले नयाँ खहरे बन्दै
बाबुराम देवकोटाभिमान (सिन्धुली), जेठ १६ गते । कमलामाइ नगरपालिका–९ भिमान निवासी तेजप्रसाद घिमिरेलाई कमलाखुँज छिर्न चुरे जङ्गल छिचोल्दा अत्यास लाग्थ्यो । एकाध बाहेक खहरे थिएनन् । दुई दशक अघिसम्म चुरे जङ्गल चारकोशे झाडी जस्तै देखेका घिमिरेले हेर्दाहेर्दै नाङ्गो भएको छ । यो बीचमा सयौं नयाँ खहरेहरु चुरेबाट निस्किएका छन् ।‘भिमानबाट रानीबास पुग्न दुई घण्टाको पैदल बाटोमा चार÷पाँचवटा खहरे खोला थिए,’ उहाँले भन्नुभयो, ‘अहिले २० वटाभन्दा बढी नयाँ थपिएका छन् । चुरेबाट नयाँ खहरे बन्नुको कारण भनेको वन कटानी र फँडानी नै भएको उहाँको निष्कर्ष छ ।’ उहाँले थप्नुभयो, ‘ढलापडा सुख्खड खडा’ का नाममा चुरे जङ्गलबाट धमाधम सालका रुखहरु कटान गर्न थालेपछि ट्याक्टर जङ्गल छिर्न थाले, सालका गोलिया पाखै बग्ने गरी झार्न थालियो । घाटगद्धी भन्दै चुरेको खुकुलो जमिन चलाएपछि वर्षामा सबै बग्यो ।’ त्यँहीबाट नयाँ खहरेले जन्मलिएर अहिले विनाश निम्त्याएको घिमिरेको ठहर छ । हिउँद महिनामा दोहन, कटान र फँडानी हुने भएकाले बर्सेनि वर्षाको मौसममा नयाँ खहरे जन्मेर विनाश गर्दै आएको उहाँको बुझाइ छ । जङ्गल विनाशसँगै वर्षाको मौसममा जन्मिने नयाँ खहरेले बस्ती तथा खेतबारीमा क्षति पु¥याउने भएपछि चुरे जङ्गलको छेउछाउमा बस्ने बासिन्दामा चिन्ता छाएको छ । कमलाखुज र मरिण क्षेत्रमा चुरे जङ्गलको विनाशले बर्सेनि नयाँ खहरे जन्मने क्रम बढेको छ । सुकुम्बासीका नाममा वर्षेनी बढ्दै गएको चुरे अतिक्रमण र काठ चोरी निकासीका कारण खहरेखोला बढ्न गएर समस्या आएको स्थानीय बासिन्दाले बताएका छन् । दुधौली नगरपालिकाका प्राविधिक सहायक हेरम्बराज अधिकारी खहरे खोलाले यस क्षेत्रमा कति उर्वर जमिनलाई क्षति पु¥यायो, त्यसको लगत कुनै पनि निकायसँग नभएको बताउनुहुन्छ । जङ्गल विनाश गर्नुहुँदैन भन्ने स्थानीय उपभोक्तामा चेतनाको अभाव रहेको तथा त्योभन्दा बढी त समय–समयमा तस्करले जङ्गल फँडानी गरी अवैध रुपमा काठ लाने गरेकाले समस्या बढ्दै गएको स्थानीय बासिन्दाको भनाइ छ ।कमला नदी र खहरेले आफ्नो भएको जग्गा बगरमा परिणत गराएपछि जङ्गल फडानी गर्नेको सङ्ख्यामा समेत वृद्धि भएको छ । रानीबासको चन्दनपुरमा जङ्गल फँडानी गरेर बस्ती नै बसालिएको स्थानीय बासिन्दा बताउँछन् ।डिभिजन वन कार्यालय सिन्धुलीको एक तथ्याङ्कअनुसार जिल्लामा चुरे जङ्गलको क्षेत्रफल एक लाख १२ हजार ६३१ हेक्टर छ । यो मध्ये एक लाख हेक्टर जङ्गल सरकारी स्वामित्वमा रहेको र बाँकी समुदायलाई हस्तान्तरण भइसकेको छ । चुरे जङ्गलको तल्लो फाँटको तीन हजार ३८३ हेक्टर वन पूर्ण रुपमा नष्ट भइसकेको छ ।
सूचीकृत स्वास्थ्य संस्था बढेसँगै सुरक्षित गर्भपतन गराउने बढे
पुष्कर भण्डारीडडेल्धुरा, जेठ १६ गते । सूचिकृत स्वास्थ्य संस्थाहरुको संख्या बढ्दै गएसँगै सुरक्षित गर्भपतन गराउने महिलाको सङ्ख्यामा समेत वृद्धि भएको छ । चालू आर्थिक वर्षको अहिलेसम्म मात्रै डडेल्धुरामा ८५४ जना महिलाहरुले सुरक्षित गर्भपतन गरेको स्वास्थ्य कार्यालयले जनाएको छ । सात वटा स्थानीय तह रहेको डडेल्धुरामा सात वटै स्थानीय तहमा गरी २० वटा सूचिकृत स्वास्थ्य संस्थाहरुले सुरक्षित गर्भपतन गराउँछन् । औषधि र शल्यक्रिया गरी दुई वटा विधिमार्फत सुरक्षित गर्भपतन गरिन्छ । ८१५ जनाले औषधि र ३९ जनाले शल्यक्रियामार्फत् सुरक्षित गर्भपतन गरेको स्वास्थ्य कार्यालय परिवार नियोजन संयोजक भवानी कुँवरले बताउनुभयो । डडेल्धुरा अस्पतालमा मात्रै यस वर्ष १५७ जनाले सुरक्षित गर्भपतन गराउनुभएको छ । यी मध्ये १३१ जनाले औषधिको प्रयोग र २६ जनाले अप्रेसन गरेर सुरक्षित गर्भपतन गराउनुभएको उहाँले बताउनुभयो । सोमबार जिल्ला सदरमुकाममा सामुदायिक विकास मञ्चले आयोजना गरेको स्थानीय सञ्चारकर्मीहरुसँग यौन तथा प्रजनन स्वास्थ्य अधिकारसम्बन्धी छलफल कार्यक्रममा आयोजना गरिएको थियो । सूचिकृत स्वास्थ्य संस्थाहरुमा सुरक्षित गर्भपतन भए पनि अनेच्छिक गर्भ तथा गोपनीयता नरहने र लिङ्ग पहिचान गरी गर्भपतन गराउनेहरु अवैधानिक रुपमा निजी स्वास्थ्य संस्थाहरुमा असुरक्षित गर्भपतन गराउने गरेको बताइएको छ । सोमबार सञ्चारकर्मीहरुसँग गरिएको छलफल कार्यक्रमका सहभागी । तस्बिरः पुष्कर भण्डारी ।
सामूहिक बलात्कार आरोपमा चार जना पक्राउ
विजयकुमार साह ढल्केबर, जेठ १६ गते । गत १ चैतमा एक किशोरीलाई सामूहिक बलात्कार गरेको आरोपमा चार जनालाई धनुषा प्रहरीले नियन्त्रणमा लिएको छ । इलाका प्रहरी कार्यालय ढल्केबर धनुषाले आइतबार ती चार जनालाई नियन्त्रणमा लिएको हो । घटना संलग्न भनिएका अझै एकजना फरार रहेको तथा अनुसन्धान प्रक्रिया प्रभावित हुने भएकाले नियन्त्रणमा लिएकाहरुको नाम तत्काल सार्वजनिक गर्न नमिल्ने इलाका प्रहरी कार्यालय ढल्केवरका प्रहरी निरीक्षक रामसागर सिंहले बताउनुभयो । उहाँले पीडित पक्षले दिएको किटानी जाहेरीको आधारमा चारजनालाई नियन्त्रणमा लिएका जानकारी दिनुभयो । गत चैत १ गते उनीहरुले ती किशोरीलाई घरबाट मिथिला नगरपालिका–५ स्थित एक होटल ल्याएर जबर्जस्ती करणी गरेका थिए । पीडित पक्षले जेठ ३ गते इलाका प्रहरी कार्यालय ढल्केबरमा किटानी जाहेरी दिएका थिए ।प्रहरी निरीक्षक सिंहका अनुसार जिल्ला अदालत धनुषाले आरोपितहरु विरुद्ध पक्राउ पुर्जी नै जारी गरेको छ । आरोपितमध्ये चारजना पक्राउ गरिएको र घटनामा संलग्न भनिएका अन्य एकजनालाई पक्राउ गर्न खोजतलास भइरहेको छ । पक्राउ परेकाहरुलाई धनुषा जिल्ला अदालतबाट म्याद थपको अनुमति लिएर थप अनुसन्धान भइरहेको प्रहरी निरीक्षक सिंहले जानकारी दिनुभयो ।
विनोद पहाडीलाई कर्मयोगी बद्री पहाडी समाजसेवा पुरस्कार प्रदान गरिने
गाेरखापत्र अनलाइनकाठमाडाैं, जेठ १६ गते । मानवअधिकार तथा शान्ति समाजले ‘कर्मयोगी बद्री पहाडी समाजसेवा पुरस्कार‘–२०७८ विनोद पहाडीलाई प्रदान गर्ने निर्णय गरेको छ । संविधानसभा सदस्य (२०६४–६९) समेत रहनुभएका अधिकारकर्मी एवं सञ्चारकर्मी पहाडीलाई तीन दशकदेखि सामाजिक न्यायको क्षेत्रमा गर्नुभएको उल्लेखनीय योगदानका लागि मानवअधिकार तथा शान्ति समाजले पुरस्कृत गर्ने निर्णय गरेको हो । २०७९ मङ्सिरमा अन्तराष्ट्रिय मानव अधिकार दिवसको सन्दर्भमा आयोजना गरिने कार्यक्रममा एक लाख १० हजार रूपियाँ पुरस्कार राशी र सम्मानपत्रसहित उहाँलाई पुरस्कृत गरिनेछ ।तीन दशक लामो अधिकारको आन्दोलनमा संलग्न रहँदा पटक पटक पक्राउ पर्नुभएका विनोद पहाडी डा. भीमराव अम्वेडकर अवार्डबाट समेत सम्मानित भइसक्नुभएको छ ।पिता रामबहादुर नेपाली र आमा सोभी नेपालीका सुपुत्र विनोद पहाडीको जन्म २०२८ साल वैशाख ६ गते पाल्पाको भुवनपोखरीमा भएको थियो । हाल बुटवल, रुपन्देही निवासी पहाडी २०४६ सालदेखि पत्रकारिता क्षेत्रमा संलग्न हुनुहुन्छ । विभिन्न सञ्चारमाध्यममा आबद्ध पहाडी नेपाल राष्ट्रिय दलित पत्रकार संघको संस्थापक अध्यक्ष , नेपाल पत्रकार महासंघको पूर्व केन्द्रीय सदस्य एवं पत्रकार महासंघ रुपन्देही शाखाको दुई कार्यकाल (२०५३–५८)मा सभापति रहिसक्नुभएको छ ।
स्रोत नखुलेको रकमसहित एक भारतीय नागरिक पक्राउ
स्रोत नखुलेको रकमसहित एक भारतीय युवकलाई महोत्तरी प्रहरीले पक्राउ गरेको छ । भारत विहारको पानावेला ग्रामपञ्चायत–१३ घर भएका २२ वर्षीय युवक जिशान शेखलाई स्रोत नखुलेको रकमसहित पक्राउ गरिएको जिल्ला प्रहरी कार्यालय महोत्तरीले जनाएको छ ।
सिक्टा सिँचाइ आयोजनामा एक अर्ब ८८ करोड रुपियाँ बजेट विनियोजन, ३३ करोड वृद्धि
सिराज खान नेपालगञ्ज, जेठ १६ गते । सरकारले बाँकेमा निर्माणाधीन राष्ट्रिय गौरवको सिक्टा सिँचाइ आयोजनालाई प्रमुख प्राथमिकतामा राखेर बजेट विनियोजन गरेको छ । सो आयोजनाका लागि सरकारले आगामी आर्थिक वर्ष २०७९/८० मा खर्च गर्ने गरी एक अर्ब ८८ करोड रुपियाँ विनियोजन गरेको हो । अर्थमन्त्री जनार्दन शर्माले संसदमा पेश गर्नुभएको बजेटमा पश्चिम नेपालको बहुप्रतिक्षित सो आयोजनाका लागि उक्त रकम विनियोजन गरिएको सिक्टा सिँचाइ आयोजनाले जनाएको छ । आयोजनाका प्रमुख सन्तोष कैनीले गत आर्थिक वर्षमा सो आयोजनाका लागि एक अर्ब ५५ करोड रुपियाँ विनियोजन गरिएकोमा आगामी आर्थिक वर्षका लागि ३३ करोड रुपियाँ थप गरेर एक अर्ब ८८ करोड रुपियाँ विनियोजन गरिएको बताउनुभयो । उहाँले सरकारले सो आयोजनालाई प्रमुख प्राथमिकतामा राखेर बजेट वृद्धि गरेको जनाउँदै बजेटलाई आयोजनाको निर्माण कार्य पूरा गर्नमा तीव्ररुपमा खर्च गरिने बताउनुभयो । सरकारले विनियोजन गरेको सो बजेट आयोजनाको पश्चिम मूल नहर मर्मत र सञ्चालनलाई निरन्तरता दिनुका साथै पूर्वी मूल नहरको निर्माण र गुरुवा गाउँ शाखा नहरको निर्माण शुरु गर्नमा खर्च गरिने आयोजना प्रमुख कैनीले बताउनुभयो । उहाँले यसका साथै क्रमगत रुपमा सञ्चालन हुँदै आएका आयोजनाका काममा पनि सो बजेट खर्च गरिने जनाउनुभयो । आगामी आर्थिक वर्षमा पूर्वी मूल नहरको नरैनापुरसम्मको ४४ देखि ५३ किलो मिटरको अध्ययनलगायत गुरुवा गाउँ शाखा नहरको निर्माण शुरु गर्ने र पश्चिमी तथा पूर्वी मूल नहरको निर्माण र मरम्मत तथा सिँचित क्षेत्र बचावटलाई प्राथमिकतामा राखिने आयोजनाले जनाएको छ । बजेट बढाइएपछि किसान उत्साहितसरकारले आगामी आर्थिक वर्षका लागि सिक्टा सिँचाइ आयोजनामा गत आर्थिक वर्षभन्दा ३३ करोड रुपियाँ बजेट बढाएपछि राप्तीपारिका किसानहरु उत्साहित भएका छन् । मुख्य बाँधस्थल अगैयादेखि पूर्वी क्षेत्रको ५३ किलोमिटरको पूर्वी शाखा नहरको ५३ किलोमिटर क्षेत्र मध्ये ३८ किलोमिटर क्षेत्रसम्म नहरका स्ट्रक्चरहरु निर्माण भैसकेको र नहर फिनिसिङको काम भैरहकाले बजेट वृद्धिबाट काम छिटो हुने उनीहरुको भनाइ छ । राप्तीसोनारी गाउँपालिकाका किसान नरेश चौधरीले सरकारले सिक्टा सिँचाइको बजेट वृद्धि गरेर आयोजना निर्माणलाई प्रमुख प्राथमिकतामा राखेकाले आफूहरु उत्साहित भएको बताउनुभयो । उहाँले छिट्टै आयोजनाको पानी खेतबारीमा पुग्ने आशा पनि किसानहरुमा पलाएको बताउनुभयो । सिक्टाको बजेट वृद्धि गरेर सरकारले नरैनापुरका किसानलाई ध्यानमा राखेको देखिएको नरैनापुर गाउँपालिकाका नवनिर्वाचित अध्यक्ष ईश्तियाक अहमद शाहले बताउनुभयो । यसअघि नै मुख्य बाँधस्थल अगैयाबाट ४५.३ किलोमिटर पश्चिमी मुख्य नहरको निर्माण पूरा गरेर सो नहरमा पानी बगाइएको छ । उक्त नहरबाट करिब ३० हजार हेक्टरमा सिँचाइ सुविधा पुगेको आयोजनाले जनाएको छ । बाँके जिल्लाको करिब ४३ हजार हेक्टर जमिनमा सिँचाइ सुविधा पुर्याउने उद्देश्यले १५ वर्ष अघि निर्माण सुरु भएको राष्ट्रिय गौरवको सिक्टा सिँचाइ आयोजनामा हालसम्म १५ अर्ब रुपियाँभन्दा बढी खर्च भइसकेको छ ।
आधारभूत पत्रकारिता प्रशिक्षण सुरु
राष्ट्रिय नेवाः पत्रकार मञ्च (एनएफएनजे) काठमाडौं शाखाले काठमाडौं महानगरपालिकाको सहकार्यमा १५ दिने आधारभूत पत्रकारिता क्षमता अभिवृद्धि तालिम आइतबारदेखि काठमाडौंमा सुरु भएको छ ।
सवारी लाइसेन्सको नयाँ आवेदन आज साँझदेखि
सवारी चालक अनुमति पत्र (लाइसेन्स)को नयाँ आवेदन प्रणाली सोमबार साँझदेखि सुरु गरिने भएको छ । यातायात व्यवस्था विभागले एक सूचना जारी गर्दै आज साँझ ६ बजेदेखि सवारी चालक अनुमति पत्रको नयाँ अनलाइन आवेदन प्रणाली सुरु गर्न लागिएको जानकारी गराएको हो ।
काठमाडौं महानगरका प्रमुख र उपप्रमुखद्वारा शपथग्रहण समारोह (लाइभ)
काठमाडौं महानगरपालिकाका नवनिर्वाचित प्रमुख वालेन्द्र साह र उपप्रमुख सुनिता डङ्गोलसहितका जनप्रतिनिधिहरुले सोमबार पद तथा गोपनियताको शपथ ग्रहण गर्नुभएको छ ।
फोहोर व्यवस्थापनका लागि नगरप्रमुखको घरदैलो अभियान
मुगु जिल्लाको छायाँनाथ रारा नगरपालिकाका नवनिर्वाचित नगरप्रमुख विष्णुकुमार भामले नगरको फोहोर व्यवस्थापनका लागि अभियान सुरु गर्नुभएको छ । नगरप्रमुख भामले घरदैलो अभियान चलाएर जथाभावी फोहोर नफाल्न आग्रह गर्नुभएको हो । उहाँले सरसफाईलाई व्यवस्थापन गर्नका लागि गमगढी बजारको घरदैलोमा पुग्नु भएको हो ।
