गोरखापत्र अनलाइन
काँग्रेस सभापति शाही सवार गाडी दुर्घटना, तीन जना घाइते
हरिकृष्ण ऐडी मुगु, जेठ ४ गते । काँग्रेस पार्टी मुगुका जिल्ला सभापति ऐनबहादुर शाही सवारी दुर्घटनामा पर्नुभएको छ । सोरु गाउँपालिका ६ बन्जाहा भन्ने स्थानमा शाही सवार गाडी दुर्घटनामा परेको प्रहरी नायव उपरीक्षक सुवास हमालले जानकारी दिनुभयो ।उहाँकाअनुसार सभापति ऐनबहादुर शाही, कुबेरजंङ शाही र नरबिर शाही सवार गाडी दुर्घटना हुदा घाइते हुनुभएको छ । उहाँहरुलाई माउन्टेन हेलिकप्टरबाट बाँकेको कोहलपुरस्थित मेडिकल कलेजमा उपचारका लागि लगिएको छ प्रहरी नायब उपरीक्षकले जानकारी गराउनुभयो । उहाँहरु जिल्लाको सदरमुकाम गमगढीदेखि सोरु गाउँपालिकाको सदरमुकाम सोरुकोटमा जाँदैगर्दा सोरुको बन्जाहा भन्ने ठाँउमा आज गाडी दुर्घटना भएको थियो । जिल्ला सभापति शाही सवार गाडी लु १ ज १७७२ नम्बरको भएको प्रहरीले जनाएको छ ।
सन्धिखर्क नगरपालिकामा एमालेका मेयर उपमेयर विजयी
गणेश खनालअर्घाखाँची, जेठ ४ गते । सन्धिखर्क नगरपालिकाको मेयर र उपमेयर पदमा नेकपा (एमाले) का उम्मेदवार कृष्णप्रसाद श्रेष्ठ र मिश्रा आचार्यको बिजयी हुनुभएको छ । गठबन्धनका तर्फबाट काग्रेसका मेयर पदकी उम्मेदवार शान्ता भण्डारी र उपमेयरमा गठबन्धन तर्फबाट नेकपा (माओवादी केन्द्र) का राजेन्द्र भुसाल पराजित हुनुभयो । ६ स्थानीय तह रहेको जिल्लामा मालारानी गाउँपालिकामा एमालेका उम्मेदवार दलबहादुर भट्टराई, उपाध्यक्षमा दिपा प्रोखरेल, छत्रदेव गाउँपालिकामा काग्रेसका चन्द्रमान श्रेष्ठ, एमालेबाट मनि पन्थि विजयी हुनुभएको छ । त्यस्तै, छत्रदेव गाउँपालिकामा एमालेका टेकराज गैरे अध्यक्ष, उपाध्यक्षमा नर्मदा पौडेल, भुमिकास्थान नगरपालिका जनमोर्चाका झविलाल थापा र उपमेयरमा माओवादीका बालकृष्ण बजान्डे विजयी हुनुभएको छ । सितगंगा नगरपालिकामा मतगणना जारी रहेको छ ।
खैरहनी नगरपालिकामा मेयर काँग्रेस, उपमेयरमा एमाले विजयी
शालिग्राम नेपाल चितवन, जेठ ४ गते । चितवनको खैरहनी नगरपालिकामा गठवन्धनबाट नेपाली काँग्रेसका उम्मेदवार शशीकुमार खनिया निर्वाचित हुनुभएको छ । उहाँले नेकपा (एमाले) का उम्मेदवार लालमणि चौधरीलाई ८५० मतले पराजित गर्दै निर्वाचित हुनुभएको हो । खनियाले १४ हजार ५४५ मत प्राप्त गर्नुभएको छ । उहाँका निकटतम प्रतिष्पर्धी चौधरीले १३ हजार ६९५ मत प्राप्त गर्नुभयो । नगरपालिकाको उपमेयरमा एमालेका उम्मेदवार कविता उप्रेती विजयी हुनुभएको छ । उप्रेतीले १४ हजार १६४ मत प्राप्त गरी विजयी हुनुभयो । उहाँको निकटतम प्रतिष्पर्धी गठवन्धनबाट माओवादी केन्द्रका उपमेयरका उम्मेदवार लक्ष्मी ढकाल ९ हजार ६७० मत प्राप्त गर्नुभयो । खैरहनी नगरपालिका वडा १ मा काँग्रेसका नवराज भुसाल, वडा २ मा काँग्रेसका रोहीणीप्रसाद उप्रेती, वडा ३ मा काँग्रेसकै पूर्णवहादुर गुरुङ, वडा ४ मा एमालेका वेदवहादुर अधिकारी, वडा ५ मा एमालेका छत्रनाथ सुेवेदी निर्वाचित हुनुभयो ।त्यस्तै, वडा ६ मा एमालेका कमलप्रसाद न्यौपाने, वडा ७ मा एमालेका मनेजर महतो, वडा ८ मा काँग्रेसका शंकर कँडेल, वडा ९ मा एमालेका वन्धुराम महतो, वडा १० मा काँग्रेसका चन्द्रविक्रम चौधरी, वडा ११ मा एमालेका दीपेन्द्रकुमार दरै, वडा १२ मा काँग्रेसका केदारनाथ पन्त र वडा १३ मा एमालेका कुलप्रसाद भुसाल निर्वाचित हुनुभयो । यसअघि खैरहनी नगरपालिकाको मेयरमा एमालेका लालमणि चौधरी, उपमेयरमा एमालेकै सुनिता थपलिया निर्वाचित हुनुभएको थियो ।
इच्छाकामना गाउँपालिकामा एमालेका उम्मेदवार निर्वाचित
शालिग्राम नेपाल चितवन, जेठ ४ गते । चितवनको एक मात्र इच्छाकामना गाउँपालिकाको अध्यक्षमा एमालेका उम्मेदवार दानबहादुर गुरुङ र उपाध्यक्षमा एमालेकै माया सिलवाल निर्वाचित हुनु भएको छ । चण्डीभन्ज्याङका स्थायी बासिन्दा गुरुङले नेपाली कांग्रेसकी अध्यक्ष उम्मेदवार गीताकुमारी गुरुङलाई फराकिलो मत अन्तरले पछाडि पार्दै विजयी हुनुभएको हो ।एमालेका दानबहादुरले छ हजार ११० मत ल्याउँदा कांग्रेसकी गीताकुमारीले चार हजार ६०८ मत ल्याउनुभयो । वुधबार वडा नम्बर ७ को मतगणना सकिएसँगै विजय घोषणा गरिएको छ ।सरकारी विद्यालयको प्रधानाध्यापक बनेका दानबहादुर पेन्सन पाक्न चार वर्ष मात्रै बाँकी रहँदा स्थायी जागिर छाडेर चुनावी मैदानमा उत्रनु भएको हो । एमाले निकट शिक्षक संगठन चितवनको निवर्तमान जिल्ला अध्यक्षसमेत रहनुभएका गुरुङ सो क्षेत्रमा निकै लोकप्रिय नेताका रुपमा चिनिनुहुन्छ । अध्यक्षका प्रतिस्पर्धी गीताकुमारी पनि शिक्षा क्षेत्रबाट नै राजनीतिमा आउनु भएको हो । त्यसैगरी उपाध्यक्षमा एमालेकी माया सिलवालले पाँच हजार ३४४ मत प्राप्त गर्दै विजयी हुनुभयो । मुग्लिनकी स्थायी बासिन्दा उहाँले माओवादी केन्द्रका प्रताप गुरुङलाई ३०० मतले पछााडि पार्दै निर्वाचित हुनुभयो । प्रतापले पाँच हजार ४४ मत ल्याउनुभयो । यसअघि २०७४ सालमा कांग्रेसले विजय हासिल गरेको इच्छाकामनामा अहिले एमालेले राम्रो मत ल्याएको हो । गाउँपालिकाको वडा १ को अध्यक्षमा माओवादी वडा २, ३, ४ र ५, ६ मा एमाले विजयी भएको छ । वडा नम्बर ७ मा कांग्रेसले विजय हासिल गरेको छ ।
भेरी र बारेकोटमा एमाले, छेडागाडमा काँग्रेस बिजयी
वासुदेव शर्मा जाजरकोट, जेठ ४ गते । जाजरकोटको भेरी नगरपालिकमा दोस्रो कार्यकालका लागि पुनः नेकपा (एमाले) का चन्द्रप्रकाश घर्ती निर्वाचित हुनुभएको छ । छेडागाड नगरपालिका प्रमुखमा गठबन्धनबाट नेपाली काँग्रेसका रत्नबहादुर खडका विजयी हुनुभएको छ ।त्यस्तै, बारेकोट अध्यक्षमा एमालेबाट बीरबहादुर गिरि निर्वाचित हुनुभएको छ । सत्ता गठबन्धनका उम्मेदवार गगनबहादुर खडकालाई फराकिलो मतान्तरले पराजित गर्दै उहाँ बिजयी हुनुभएको हो । अन्तिम मतगणनाको परिणामअनुसार एमालेका चन्द्रप्रकाश घर्तीले पाँच हजार २१० मत ल्याएर बिजयी हुनु भएको छ । उहाँका निकटतम प्रतिद्धन्दी माओवादी केन्द्रका गगनबहादुर खडकाले चार हजार १८८ मत प्राप्त गर्नुभएको छ । घर्तीले खडकालाई १ हजार २२ मतको अन्तरले पराजित गर्नुभयो । २०७४ सालको स्थानीय तह निर्वाचनमा काग्रेसलाई पराजित गर्दै उहाँ बिजयी हुनुभएको थियो । नगरप्रमुख र उपप्रमुख दुवै एमालेले जितेको थियो । यसपाली उपप्रमुखमा सत्ता गठबन्धनबाट काग्रेसकी सीता गौतम ६ हजार ४६८ मतका साथ बिजयी हुनुभयो । उहाँका निकटतम प्रतिद्धन्दी एमालेकी साबित्रि चन्दले पाँच हजार ६०३ मत प्राप्त गर्नुभयो । यस्तै, छेडागाड नगरपालिकाको प्रमुखमा गठबन्धनको तर्फबाट काग्रेसका रत्नबहादुर खडका बिजयी हुनुभएको छ । उहाँले एमालेका लालबहादुर महतारालाई पराजित गर्दै नगरप्रमुखमा बिजयी हुनुभएको हो । खडकाले आठ हजार ६०५ मत प्राप्त गरी जिय हुनुभयो । उहाँका निकटतम प्रतिद्धन्दी एमालेका महताराले चार हजार ९१८ मत प्राप्त गर्नुभयो । महताराले २०७४ को स्थानिय तह निर्वाचनमा खडकालाई पराजित गर्दै नगर प्रमुखमा विजय हुनु भएको थियो । उपप्रमुखमा सत्ता गठबन्धनकै चन्द्रबहादुर थापा निर्वाचित हुनुभयो । थापा सात हजार ४६१ मत ल्याएर विजय हुनुभयो । उहाँका निकटतम प्रतिद्धन्दी एमालेकी अन्जु थापाले पाँच हजार ४३६ मत प्राप्त गर्नुभयो । १३ वडा रहेको छेडागाडमा काग्रेसले ४, माओबादी केन्द्रले ४, एमालेले ४, समाजवादीले १ वडामा बिजयी बनेको छ । बारेकोटमा एमालेका बीरबहादुर गिरी बिजयी हुनुभएको छ । काग्रेसका निर्बतमान अध्यक्ष महेन्द्रबहादुर शाहलाई एक सय ९ मतले पराजित गर्दै गिरी बिजयी हुनुभएको हो ।गिरीले तीन हजार ९५४ मत प्राप्त गरी बिजयी हुनुभयो । उहाँका निकटतम प्रतिद्धन्द्धी काग्रेसका शाहले तीन हजार ८४५ मत प्राप्त गर्नुभयो । उपाध्यक्षमा माओवादी केन्द्रका नरबहादुर गिरी बिजयी हुनुभयो । गठबन्धनका उपाध्यक्षका उमेदवार गिरीले तीन हजार ६६३ मत प्राप्त गर्नुभयो । उहाँका निकटतम प्रतिद्धन्दी एमालेकी गीता सिहले तीन हजार ४०१ मत प्राप्त गर्नुभयो । भेरीमा एक उपप्रमुखसहित काग्रेस ७, माओबादी केन्द्र ४, एमालेले २ वटा वडा अध्यक्ष जितेको छ ।
खत्याड गाउँपालिकामा गठबन्धनका उम्मेदवार निर्वाचित
हरिकृष्ण ऐडीमुगु, जेठ ४ गते । मुगुको खत्याड गाउँपालिकाको अध्यक्षमा नेकपा (माओवादी केन्द्र) का अजबहादुर शाही बिजयी हुनुभएको छ । उपध्यक्षमा नेपाली काँग्रेसकी सरिता रोकाया निर्वाचित हुनुभएको छ । खत्याड निर्वाचन कार्यालयका निर्वाचन अधिकृत डा. बाबुराम ढुङ्ग्यानाका अनुसार अध्यक्ष पदमा उम्मेदवार शाहीले ३ हजार ५ सय २१ मत ल्याएर ५ बर्षका लागि प्रमुखमा निर्वाचित हुनुभएको हो । उहाँको प्रतिद्वन्दी नेकपा (एमाले) का लालबहादुर मल्ल ले २ हजार ६ सय २१ मत ल्याएर पराजित हुनुभयो । यस्तै गठबन्धनको तर्फबाट उपाध्यक्षमा काँग्रेसकी सरिता रोकायाले ४ हजार ५ सय ४८ मत ल्याएर बिजयी हुनुभएको छ । प्रतिद्वन्दी एमालेकी कविता गिरिले २ हजार ४ सय ९९ मत प्राप्तगरी पराजित हुनुभयो । ११ वडा रहेको खत्याड गाउँपालिकामा एमालेले ३ वटा, कांग्रेसले ३ वटा र यसैगरी माओवादीले ५ वटा वडामा जित हात पारेको छ । ०७४ को स्थानीय तह निर्बाचनमा एमालेले गाउँपालिका अध्यक्ष, उपाध्यक्षसहित ४ वटा वडामा जितेको थियो ।
देवदहको प्रमुख उपप्रमुख दुवैमा एमालेका उम्मेदवार विजयी
छविलाल पाण्डे बुटवल, जेठ ४ गते । रुपन्देहीको देवदह नगरपालिकाको प्रमुखमा नेकपा (एमाले) का उम्मेदवार ध्रुव खरेल निर्वाचित हुनुभएको छ । एमालेको तर्फबाट नगर प्रमुख पदमा उम्मेदवार बन्नुभएका खरेलले नेपाली काँग्रेस र माओवादी केन्द्रको गठबन्धनबाट उम्मेदवार बन्नुभएका निवर्तमान नगर प्रमुख हिरा खत्रीलाई १ हजार ६ सय २० मत अन्तरले पराजित गर्नुभयो । खरेलले १२ हजार ९४३ मत पाउँदा खत्रीले ११ हजार ३२३ मत पाउनुभयो । खरेलसँग पराजित हुनुभएका खत्री २०७४ सालको निर्वाचनमा एमालेका टीकाराम चापागाईलाई पराजित गरी नगर प्रमुख निर्वाचित हुनुभएको थियो ।त्यसैगरी नगर उपप्रमुखमा पनि एमालेकै बिद्यालक्ष्मी गुरुङ निर्वाचित हुनुभएको छ । २०७४ सालमा उपप्रमुख निर्वाचित गुरुङले गठबन्धनको तर्फबाट उम्मेदवार बन्नुभएकी नेकपा माओवादी केन्द्रकी सुन्दरी गिरीलाई ६ हजार ४९४ मतान्तरले पराजित गर्नुभयो ।
मोहन्याल गाउँपालिका अध्यक्षमा माओवादीका उपाध्याय विजयी
कैलालीको मोहन्याल गाउँपालिकाको अध्यक्षमा नेकपा (माओवादी केन्द्र) का देवीदत्त उपाध्याय (हिमशिखर) विजयी हुनुभएको छ । गठबन्धनबाट चुनाव लड्नु भएका उपाध्यायले नेकपा (एमाले) का उम्मेदवार धर्म थापालाई ४०९ मतान्तरले पछिपार्दै विजयी हुनुभएको हो ।
गम्भीर त्रुटि गर्ने कर्मचारीको विवरण पठाउन आयोगको निर्देशन
गोरखापत्र अनलाइनकाठमाडौं, जेठ ४ गते । निर्वाचन प्रक्रियामा जानी जानी गम्भीर त्रुटि र गल्ती गर्ने कर्मचारीको विवरण निर्वाचन आयोगमा पठाउन आयोगले मुख्य निर्वाचन अधिकृत तथा निर्वाचन अधिकृतलाई निर्देशन दिएको छ । आयोगका प्रवक्ता तथा सहसचिव शालिग्राम शर्मा पौडेलद्वारा बुधबार जारी विज्ञप्तिमा सो निर्देशन दिइएको हो । स्थानीय तह निर्वाचन निर्देशिका, २०७८ तथा स्थानीय तह निर्वाचन (मतदान) निर्देशिका, २०७८ का व्यवस्थाको प्रतिकुल हुनेगरी काम गर्ने कर्मचारीको आयोगले विवरण माग गरेको छ । मतपत्रमा दस्तखत नगरी मतदातालाई दिने, अर्धकट्टीसहित मतपत्र दिने, अर्धकट्टीमा दस्तखत नगराउने, स्ट्याम्प प्याडको सट्टामा अर्कै मसी प्रयोग गराउने, मतपत्र र मतदाताको सही विवरण तयार नगर्ने, मतपत्रमा मतसङ्केत गर्न रबरको स्वस्तिक छाप दिनुपर्नेमा पित्तलको स्वस्तिक छाप दिनेजस्ता त्रुटि भएको देखिएको आयोगको भनाइ छ ।“सही किसिमले मुचुल्का तयार नगर्ने, सुरक्षण सिलहरू सही ढङ्गले नलगाउने, पोलबुकमा स्पष्ट विवरण नराख्ने, मतदाता नामावली विवरणमा स्पष्ट रेजा नलगाउने, मतगणना गर्दा आएको सङ्ख्या र कम्प्युटरमा प्रविष्ट सङ्ख्या फरक पार्ने, मतगणना सम्पन्न भएपछि घोषणा गर्न ढिलाइ गर्ने, स्थानीय तह निर्वाचन (मतगणना) निर्देशिका, २०७८ विपरीत मतपत्र सदर वा वदरको निर्णय गर्ने आदि गम्भीर प्रकृतिका गल्तीहरू गरेको देखिएका छन्” विज्ञप्तिमा उल्लेख छ । मतदान कार्यमा खटिएका जिम्मेवार मतदान अधिकृतबाट भएका यस्ता गल्तीहरूले निर्वाचनमा विवाद उत्पन्न भई निर्वाचन अवरुद्ध हुने, स्थगित हुने र मतगणना समेत प्रभावित हुने अवस्था आएको आयोगले प्रष्ट पारेको छ । “यसप्रकारका गम्भीर त्रुटि गल्ती गर्ने मतदान अधिकृत र संलग्न अन्य कर्मचारीको नाम, थर, पद, कार्यरत कार्यालयको नाम र ठेगाना, कर्मचारी संकेत नम्बर, खटिएको मतदान केन्द्रको नाम र ठेगाना सबै विवरण खुलाई आयोगमा पठाउन सम्बन्धित मुख्य निर्वाचन अधिकृत र निर्वाचन अधिकृतलाई आयोगले निर्देशन दिएको छ” विज्ञप्तिमा भनिएको छ ।
निर्वाचन प्रक्रियामा भ्रम उत्पन्न हुने समाचार सम्प्रेषण नगर्न आग्रह
गोरखापत्र अनलाइनकाठमाडौं, जेठ ४ गते । निर्वाचन पद्धति र प्रक्रियामा भ्रम उत्पन्न हुनेखालका समाचार सम्प्रेषण नगर्न नगराउन निर्वाचन आयोगले आग्रह गरेको छ । आयोगका प्रवक्ता शालिग्राम शर्मा पौडेलले बुधबार विज्ञप्ति जारी गर्नुहुँदै सो आग्रह गर्नुभएको हो ।“निर्वाचान सञ्चालनका सबै प्रक्रियामा आयोगको समग्र जिम्मेवारी रहेकोप्रति कुनै द्विविधा नरहेको सन्दर्भमा केही सञ्चारमाध्यममा आएका अन्यथा अर्थ लाग्ने आशयको समाचारप्रति आयोगको गम्भीर ध्यानाकर्षण भएको छ” विज्ञप्तिमा भनिएको छ, ”निर्वाचन पद्धति र प्रक्रियामा भ्रम उत्पन्न हुनेखालका समाचार सम्प्रेषण नगर्न नगराउन आयोग आग्रह गर्दछ । आयोगको गरिमा र निर्वाचन प्रक्रियाप्रति नै अविश्वास हुनेगरी समाचार सम्प्रेषण नगर्न, नगराउन आयोग सबैमा हार्दिक अनुरोध गर्दछ ।”यथासमयमा मतगणना सम्पन्न होस् भन्ने सबैको चाहनालाई छिटो कार्य सम्पादन गर्न पनि आयोगले आग्रह गरेको छ । आज मध्यान्हसम्म चार सय ६० पालिकाको अन्तिम परिणाम प्राप्त भइसकेको पनि आयोगले प्रष्ट पारेको छ । अन्य ठाउँको मतपरिणाम आउनेक्रम जारी रहेको आयोगले बताएको छ । परिणाम आउन बाँकी पालिकामा मतगणना कार्य २०७९ जेठ ५ गतेसम्म सम्पन्न गर्न आयोगका तर्फबाट अधिकतम् प्रयास भइरहेको जनाउँदै प्रवक्ता पौडेलद्वारा जारी विज्ञप्तिमा भनिएको छ, “धेरै मत गणना गर्नुपर्ने अवस्था रहेको महानगर र उपमहानगरपालिकाहरुका हकमा बढीभन्दा बढी मतगणना टोली व्यवस्था गरी तोकिएको समयभित्र मतगणना कार्य सम्पन्न गर्न यसअघि नै आयोगबाट भएको निर्देशनलाई आयोग पुनः स्मरण गराउन चाहन्छ ।” पाँच दिनभित्र मतगणना सक्न निर्देशनविभिन्न कारणबाट मतदान कार्य स्थगन भएका पालिकाहरुलाई पाँच दिनभित्र गणना कार्य सम्पन्न गर्न निर्देशन दिएको छ । आयोगको संवैधानिक जिम्मेवारी एवम् मितव्ययीरुपमा निर्वाचन सम्पन्न गराउने दायित्व र जिम्मेवारीलाई पूर्णरुपमा सफल पार्न सबै राजनीतिक दल, उम्मेदवार, आमसञ्चार जगत, नागरिक समाजलगायत सबै सरोकारवालाको उत्तिकै साथ र सहयोग अपरीहार्य रहने आयोगले प्रष्ट पारेको छ ।विद्यमान कानूनी व्यवस्थाबमोजिम बहालवाला स्थानीय जनप्रतिनिधिहरुको पदावधि यही जेठ ५ गतेसम्म रहेको र तत्पश्चात स्थानीय तह सरकारमा जनप्रतिनिधि विहीनता हुने अवस्थालाई मध्यनजर गरी जेठ ५ गतेभित्र नै मतगणना सम्पन्न गर्न आयोगले भनेको छ । “मतगणना कार्यमा सानातिना विषयलाई ठूलो मुद्दा बनाइ विवाद बल्झाउने, गणना कार्य सम्पन्न भइ मुचुल्का उठाएर अन्तिम परिणाम घोषणा गर्ने समयमा पुनः गणना गराउन माग गर्नेजस्ता समस्याहरु खडा गर्ने, गणना गर्दैजाँदा मतगणनाको अन्तिम चरणमा पुग्दा झिनो मतान्तर देखिएमा शुरुदेखि नै पुनः मतगणना गराउन खोज्नेजस्ता कार्यबाट मतगणना यथासमयमा सम्पन्न गर्ने कार्यमा व्यवधान उत्पन्न हुने हुँदा त्यस प्रकारका व्यवहार प्रदर्शन नगर्न आयोग हार्दिक आग्रह गर्दछ” विज्ञप्तिमा उल्लेख छ ।
बाह्रदशी गाउँपालिकामा एमालेका उम्मेदवार विजयी
विष्णुप्रसाद पोखरेलदमक, जेठ ४ गते । झापाको बाह्रदशी गाउँपालिकाको अध्यक्ष र उपाध्यक्षमा नेकपा (एमाले) का उम्मेद्वारहरु विजयी हुनुभएको छ । अध्यक्षमा देवेन्द्र चम्लागाई र उपाध्यक्षमा शान्ता खरेल निर्वाचित हुनुभएको हो । अघिल्लो स्थानीय निर्वाचनमा दुबै पद काँग्रेसले जितेको थियो ।एमालेले गाउँपालिकाको अध्यक्ष, उपाध्यक्षसहित वडा ६ मा प्यानलै जितेको छ । वडा १, २, ३, ७ काँग्रेस, ४ स्वतन्त्र र ५ नम्बर वडा राप्रपाले जितेको निर्वाचन अधिकृतको कार्यालय बाह्रदशीले जनाएको छ ।चम्लागाईले ७ हजार १४८ मत ल्याई अध्यक्ष पदमा विजयी बन्नुभयो । उहाँका निकटतम प्रतिस्पर्धी निवर्तमान अध्यक्ष काँग्रेसका खड्गप्रसाद राजवंशीले ४ हजार ३६१ मत ल्याउनुभएको छ । यसैगरी उपाध्यक्षमा एमालेकी शिवाकोटीले ६ हजार ६३६ मत ल्याई निर्वाचित बन्नुभयो । निकटतम प्रतिस्पर्धी राप्रपाकी कमला राजवंशीले ४ हजार १९५ मत पाउनुभयो ।
धुलिखेलको मत गणना कार्य रोकियो
केदार तिमल्सिना बनेपा, जेठ ४ गते । स्थानीय तह निर्वाचन अन्तर्गत काभ्रेको धुलिखेल नगरपालिकाको मतगणना गर्ने क्रममा निर्वाचन आयोगले जारी गरेको मतगणना निर्देशिका अनुसार नभएको भन्दै विरोध भएपछि धुलिखेलमा जारी मतगणना कार्य रोकिएको छ । स्थानीय तह निर्वाचन मतगणना (पहिलो संशोधन) निर्देशिका २०७९ अनुसार मत गणना कार्य नहुँदा मतगणना कार्य बीचैमा रोकिएको बताइएको छ । धुलिखेल नगरपालिका–९ को मत गणना सुरु हुनुअघि मुख्य निर्वाचन अधिकृत समेत रहनुभएका निर्वाचन अधिकृत मोहनराज भट्टराईले मतपत्रको छैटौँ नम्बरमा रहेका खुल्ला सदस्यको मत सदर हुने विषयमा सर्वदलीय बैठक बोलाएपछि गणना कार्य रोकिएको हो । मंगलबार साँझदेखि रोकिएको मतगणना कार्य अझै सुचारु हुन सकेको छैन । स्थानीय तह निर्वाचन मतगणना (पहिलो संशोधन) निर्देशिका २०७९को परिच्छेद २६ (छ) मा उल्लेख भएअनुसार सुरुदेखि नै मतगणना नगरेका कारण समस्यमा आएको बताइएको छ । उक्त बुँदामा एकभन्दा बढी उम्मेदवारको निर्वाचन चिन्ह भएको कोठामा मत सङ्केत चिन्ह पर्नेगरी मत सङ्केत गरिएमा उक्त मत बदर हुने उल्लेख छ । सो बुँदाअनुसार मतगणना नहुँदा मत गणनाका क्रममा समस्या आएको गणनामा सहभागीको भनाइ छ । आयोगको बैशाख ३० गतेको थप निर्देशनमा मतपत्रको छैटौँ नम्बरमा रहेको खुला सदस्य पदमा उम्मेदवारी दिएको र उम्मेदवारी नदिएको पार्टीमा छाप लगाएको खण्डमा उम्मेदवारी दिएको पार्टीको मत सदर हुने व्यवस्था छ । तर धुलिखेलमा खुल्ला सदस्यमा मात्रै नभई सबै पदमा सोही अनुसार मत गणना गरिएपछि विवाद चुलिएको छ ।धुलिखेलका सहायक मतदान अधिकृत शेषराज दाहालले आयोगको थप निर्देशनको बारेमा सर्वदलीय बैठकमा कुरा राखिएको भएपनि त्यस बारेमा कुनै दलका प्रतिनिधिले प्रश्न नगरेका कारण सोहीअनुरुप सबै पदमा मतगणना गरिएको बताउनुभयो । ‘हामीले सबै पदमा यसरी नै मतगणना गरेका थियौँ, जुन निर्देशिका विपरित रहेछ, हिजो (मङ्गलबार) पाँचखालमा पनि सोहीअनुरुप मतगणना गर्न लागेपछि नियम विपरित भएको थाहा पाएपछि हामीले सर्वदलिय बैठक राख्न खोजेका हौँ, दलहरु आउनुभएको छैन’ सहायक मतदान अधिकृत दाहालले भन्नुभयो, ‘हामीले आयोगलाई पत्र लेखेर धुलिखेलको समस्या समाधानको अनुरोध गरेका छौँ’ । गठबन्धनमा रहेका दलहरुले यसअघि सर्वदलीय बैठकअनुसार धुलिखेल वडा नम्बर–१ देखि ८ सम्म मतगणना गरेअनुरुप नै मत गणना हुनुपर्ने माग राखेका छन् । नेकपा (एमाले) धुलिखेल नगर कमिटिका अध्यक्ष दयाराम महतले निर्वाचन अधिकृतले आफुहरुलाई आयोगको थप निर्देशनको बारेमा छलफल गर्न बोलाए पनि निर्देशनको बारेमा कुनै जानकारी नदिइएको गुनासो गर्नुभयो । एमाले विधि र कानुनअनुसार चल्ने भन्दै कानुन अनुसार नै मतगणना हुनुपर्ने पक्षमा आफुहरु रहेको उहाँले बताउनुभयो । निर्देशिकामा सम्बन्धित मतदान अधिकृतको दस्तखत नभएको, औँठाछाप लगाई वा आयोगद्वारा निर्धारित स्वस्तिक चिन्ह बाहेक अन्य चिन्ह वा छाप लगाई मत सङ्केत गरिएको, मत सङ्केत चिन्ह नबुझिने गरी लतपतिएको वा च्यातिएको, उम्मेदवारको निर्वाचन चिन्ह रहेको कोठामा मत सङ्केत नगरी अन्यत्र मत सङ्केत गरिएको, उम्मेदवार नरहेको निर्वाचन चिन्हमा मात्र मत सङ्केत गरिएको, निर्वाचित गर्नुपर्ने सङ्ख्याभन्दा बढी उम्मेदवारको निर्वाचन चिन्ह भएको कोठामा छुट्टाछुट्टै मत सङ्केत गरिएको, एकभन्दा बढी उम्मेदवारको निर्वाचन चिन्ह भएको कोठामा मत सङ्केतको चिन्ह पर्नेगरी मत सङ्केत गरिएको अवस्थामा मत बदर हुने उल्लेख छ ।
झापाको हल्दिबारीमा राप्रपाका रवीन्द्र लिङ्देन अध्यक्षमा निर्वाचित
विष्णुप्रसाद पोखरेलदमक, जेठ ४ गते । राप्रपाका अध्यक्ष राजेन्द्र लिङ्देनको आफ्नो पालिका झापाको हल्दिबारीमा राप्रपाले अध्यक्ष र उपाध्यक्षसहित पालिकामा बहुमत ल्याएको छ । गाउँपालिकाको अध्यक्ष रवीन्द्र लिङ्देन पुनः निर्वाचित हुनुभएको हो । उहाँ राप्रपाका अध्यक्ष राजेन्द्रप्रसाद लिङ्देनका आफ्नै भाइ हुनुहुन्छ । निर्वाचन अधिकृतको कार्यालय हल्दिबारीका अनुसार लिङ्देन ६ हजार ८५६ मत ल्याएर विजयी बन्नुभएको छ । निकटतम प्रतिस्पर्धी नेकपा (एमाले) का डम्बरबहादुर गिरीलाई २ हजार १९० मतान्तरले पराजित गर्नुभयो । गिरी निवर्तमान गाउँपालिका उपाध्यक्ष हुनुहुन्छ । गिरीले ४ हजार ६६६ मत ल्याउनुभयो । गाउँपालिका उपाध्यक्षमा राप्रपाकै लक्ष्मीदेवी मैनाली निर्वाचित हुनुभएको छ । मैनालीले ५ हजार ७८ मत ल्याउनुभयो । उहाँको निकटतम प्रतिस्पर्धी एमालेका शान्तादेवी गौतमले ४ हजार १०६ मत ल्याउनुभयो ।
-original-thumb.jpg)
पूर्व राज्यमन्त्रीको वडामा उन्मुक्ति पार्टीका उम्मेदवार विजयी
अविनाश चौधरीधनगढी, जेठ ४ गते । नेपाली काङ्ग्रेसका नेता एवम् पूर्वराज्यमन्त्री जनकराज चौधरीको वडामा नागरिक उन्मुक्ति पार्टीले विजय हासिल गरेको छ । सो पार्टीका अनर चौधरी अत्यधिक मतका साथ वडा अध्यक्षमा विजयी हुनुभएको हो । नेपाली काङ्ग्रेसका उम्मेदवारलाई २२६ मतान्तरले पराजित गरी उहाँ वडा अध्यक्षमा विजयी हुनुभएको छ । जित हासिल गर्नुभएका चौधरीले ८०३ मत प्राप्त गर्नुभएको छ । महिला सदस्यमा नागरिक उन्मुक्ति पार्टीका सोनी डङ्गौरा, नागरिक उन्मुक्ति पार्टीबाट दलित महिला सदस्यको उम्मेदवार नहुँदा सो पद्मा काङ्ग्रेसका उम्मेदवार शान्ती नेपाली विजयी हुनुभएको छ । खुला सदस्यमा नागरिक उन्मुक्ति पार्टीका रामबहादुर चौधरी र श्यामसुन्दर चौधरी विजयी हुनुभएको छ । काङ्ग्रेसका नेताद्वय एवम् पूर्वमन्त्री रामजनम चौधरी र पूर्व राज्यमन्त्री चौधरीको गृह पालिका हो । दुवै जनाको वडामा नागरिक उन्मुक्ति पार्टीले कब्जा जमाउन सफल भएको छ । पूर्वमन्त्री चौधरीको घर रहेको वडामा नागरिक उन्मुक्ति पार्टीका रामजनम चौधरी नै विजयी भइसक्नुभएको छ । जोशीपुर गाउँपालिकाको अध्यक्ष र उपाध्यक्षमा नागरिक उन्मुक्ति पार्टीकै उम्मेदवार जित नजिक रहनु भएको छ । अब औपचारिक घोषणा गर्न मात्रै बाँकी रहेको निर्वाचन अधिकृतको कार्यालयको भनाई छ ।
पन्ध्र ठाउँमा मतदान जारी, मतदान शान्तिपूर्ण रहेको आयोगको भनाई
गोरखापत्र अनलाइनकाठमाडौं, जेठ ४ गते । गत वैशाख ३० गतेका लागि तोकिएको स्थानीय तह सदस्य निर्वाचन २०७९ विभिन्न कारणले स्थगित भएको पन्ध्र ठाउँमा आज मतदान भइरहेको छ । निर्वाचन आयोगका अनुसार मतदान कार्य शान्तिपूर्ण रुपमा भइरहेको छ । आयोगका सहायक प्रवक्ता सूर्यप्रसाद अर्यालका अनुसार मतदान शान्तिपूर्ण र उत्साहप्रदरुपमा भइरहेको खवर आयोगलाई प्राप्त भएको छ । उहाँकाअनुसार आज तनहुँको व्यास नगरपालिका वडा ४, हुम्लाको चंखेली गाउँपालिकाको वडा २, बाराको पचरौता नगरपालिका वडा २, सोही नगरपालिकाको वडा २ को श्रीनगर प्रावि मतदान केन्द्रमा मतदान कार्य जारी छ । सोहीअनुसार रौतहटको फतुवाविजयपुर नगरपालिकाको वडा ७, देवाही गोनाही नगरपालिका वडा २, यमुनामाई गाउँपालिका वडा १, वडा २, गढीमाई नगरपालिका वडा ३, वडा ६, बौधीमाई नगरपालिका वडा १, वडा २, वडा ९ र गरुडा नगरपालिका वडा ७ मा मतदान कार्य जारी रहेको आयोगले जनाएको छ ।आयोगकाअनुसार अछामको साँफेबगर नगरपालिका वडा १३ मा जेठ ६ गतेका लागि मतदान समय तोकिएको छ । सोहीअनुसार उदयपर र बाजुरा जिल्लाका विभिन्न मतदान केन्द्रमा स्थगित निर्वाचनको मिति तोक्न बाँकी रहेको आयोगको भनाई छ ।आयोगकाअनुसार उदयपुरको त्रियुगा नगरपालिका वडा १२, बाजुराको बुढीगंगा नगरपालिका वडा १, वडा २, वडा ३, वडा ४, वडा ५, वडा ६, वडा ७, वडा ८, वडा ९, वडा १० र बुढीनन्दा नगरपालिकाको वडा ८ मा स्थगित निर्वाचनको मितिबारे निर्णय गर्न बाँकी रहेको छ । सोको निर्णय आयोगले छिटै गर्ने सहायक प्रवक्ता अर्यालले बताउनुभयो ।
