गोरखापत्र अनलाइन
निर्वाचित जनप्रतिनिधिलाई शपथ तथा प्रमाणपत्र
हरिकृष्ण ऐडी मुगु, जेठ ६ गते । जिल्लाका चारवटा स्थानीय तहका निर्वाचित जनप्रतिनिधिलाई निर्वाचित भएको प्रमाणपत्र प्रदान गरिएको छ । छायाँनाथ रारा नगरपालिकामा निर्वाचित सबै पदाधिकारीलाई प्रमाणपत्र प्रदान गरिएको निर्वाचन अधिकृतको कार्यालय गमगढीले जनाएको छ । नगर प्रमुख, उपप्रमुख, गाउँपालिका अध्यक्ष, उपाध्यक्ष , वडा अध्यक्ष , वडा सदश्यलाई प्रमाणपत्र प्रदान गरिएको हो । जिल्लाको समन्वय समितिको हलमा मुख्य निर्वाचन कार्यालयबाट आज दिउँसो कार्यक्रम आयोजना गरी छायाँनाथ रारा नगरपालिकाका प्रमुख लगायत खत्याड गाउँपालिका अध्यक्ष, सोरु गाउँपालिका अध्यक्ष र मुगमकार्मारोङ गाउँपालिकाका निर्वाचित पदाधिकारीलाई मुख्य निर्वाचन कार्यालयका अधिकुत पुण्यप्रसाद सापकोटाले शपथ खुवाउनुभयो ।
हुम्लाका नवनिर्वाचित गाउँपालिकाका अध्यक्षहरुलाई शपथ
राजन रावतहुुम्ला, जेठ ६ गते । सातमध्ये छ वटा गाउँपालिकाका नवनिर्वाचित अध्यक्षलाई पद तथा गोपनीयताको शपथ ग्रहण गराइएको छ । उहाँहरुलाई मुुख्य निर्वाचन अधिकृत एवम् जिल्ला न्यायाधीश जगतबहादुुर पौडेलले शपथ खुवाउनुुभयो । मुुख्य निर्वाचन अधिकृत पौडेलले नवनिर्वाचित सातवटा गाउँपालिकाका अध्यक्षमध्ये छ जनाको पद तथा गोपनीयताको शपथ खुवाउने कार्य सम्पन्न भएको बताउनुुभयो । शुक्रबार शपथ लिनुुहुने अध्यक्षमा नाँम्खा गाउँपालिकाका प्रेम लामा, सिमकोट गाउँपालिकाका बिजय भण्डारी, खार्पुनाथका कर्णबहादुुर रावल, सर्केगार्डका ठानबहादुुर रोकाया, अदानचुुलीका मोहनबिक्रम सिंह र ताँजाकोटका लालकेश जैसी रहनुुभएको छ । निर्वाचित अध्यक्षहरुलाई प्रमाणपत्र समेत मुख्य निर्वाचन अधिकृत पौडेलले प्रदान गर्नुभयो । सो कार्य भएपछि औपचारिक रुपमा निर्वाचित अध्यक्षहरुको पदवहाली भएको छ । सो कार्यक्रममा निर्वाचित अध्यक्षहरुको तर्फबाट खार्पुनाथ गाउँपालिकाका अध्यक्ष रावलले अब नयाँ जिम्मेवारी काँधमा आएको र जनताको पक्षमा काम गर्ने प्रतबद्धता ब्यक्त गर्नुभयो । कार्यक्रममा प्रमुख जिल्ला अधिकारी सीता परियार, संबिधान सभाका सदस्य रीता शाही, सुुरक्षा निकायका प्रमुख, नाम्खा र खार्पुनाथ गाउँपालिकाका निर्वाचन अधिकृत लगायतको उपस्थिति रहेको थियो । बिहीबार राती मात्र मतगणनाको परिणाम सार्वजनिक भएको चङ्खेली गाउँपालिकाका निर्वाचित अध्यक्ष प्यारीलाल शाही भने मौसम बिग्रेको र हेलिकोप्टरका लागि इन्धन नभएको कारण उडान नभएपछि कार्यक्रममा उपस्थित हुन सक्नुु भएन । उहाँ बिहान हेलिकोप्टरबाट सिमकोट आउने कार्यक्रम थियो । यसैबीच पद तथा गोपनीताको शपथ लिएपछि सिमकोट गाउँपालिकाका अध्यक्ष भण्डारीले पनि गाउँपालिकाका उपाध्यक्ष, वडा अध्यक्ष, महिला सदस्य, दलित महिला सदस्य र अन्य सदस्यलाई शपथ खुवाउनुुभयो ।
२०७४ मा पराजित खाँ अहिले विजयी
गोविन्द शर्माबाँके, जेठ ६ गते । बाँकेको जानकी गाउँपालिकामा २०७४ सालको निर्वाचनमा झिनो मतान्तरले पराजित नेपाली काङ्ग्रेसका छब्बन खाँ फराकिलो मतान्तरले अहिले विजयी हुनुभएको छ । निर्वाचन अधिकृतको कार्यालयले शुक्रबार दिउँसो सार्वजनिक गरेको अन्तिम मत परिणाम अनुसार खाँ ६ हजार ६५३ मत प्राप्त गरी अध्यक्षमा विजयी हुनुभएको छ । खाँका निकटतम प्रतिष्पर्धी नेकपा (एमाले) का हिमांशु यादवले ४ हजार ७९७ मत प्राप्त गर्नुभयो । जनता समाजवादी पार्टीका राजिवकुमार कुर्मीले दुई हजार ९३८ मत प्राप्त गर्नुभयो । खाँ २०७४ सालमा भएको निर्वाचनमा एमालेका रामनिवास यादवसँग ७४ मतले पराजित हुनुभएको थियो । यादव तीन हजार ८३ मतले विजयी हुँदा खाँले तीन हजार ९ मत पाउनुभएको थियो । अध्यक्ष यादवको निधन भएपछि एमालेले उहाँका ३१ बर्षिय छोरा हिमांशुलाई उम्मेदवार बनाएको हो ।यसैगरी उपाध्यक्षमा पनि काङ्ग्रेसका रामप्यारी यादव ६ हजार ९०९ मत प्राप्त गरी विजयी हुनुभएको छ । उहाँका निकटतम प्रतिष्पर्धी पूर्व कार्यवाहक अध्यक्ष एमालेका भूमिसरा धितालले तीन हजार ४५६ र माओवादी केन्द्रका रक्षाराम कुर्मीले दुई हजार २२९ मत पाउनुभयो । जानकीका ६ वडामध्ये वडा नम्बर १ र ३ मा जसपा, २ मा माओवादी केन्द्र र ४,५,६ मा काङ्ग्रेस विजयी भएको छ ।
हेटौँडा उपमहानगरको प्रमुखमा लामाको अग्रता कायमै
हेटौँडा उपमहानगरपालिकामा ६५ हजार २९५ मत गणना हुँदा नगर प्रमुखमा सत्ता गठबन्धनका उम्मेदवार मीना लामाको अग्रता कायमै छ । गठबन्धनको तर्फबाट नेकपा (एकीकृत समाजवादी) का उम्मेदवार लामाले २० हजार ४८२ मत प्राप्त गर्दा उहाँका निकटतम प्रतिस्पर्धी नेकपा (एमाले) का उम्मेदवार अनन्त पौडेलले १८ हजार ७५३ मत प्राप्त गर्नुभएको छ ।
ताप्लेजुङका नवनिर्वाचित पदाधिकारीले लिए पद तथा गोपनीयताको शपथ
चन्द्र पन्दाकताप्लेजुङ, जेठ ६ गते । ताप्लेजुङमा वैशाख ३० गते सम्पन्न स्थानीय तहको निर्वाचनबाट निर्वाचित प्रमुख तथा अध्यक्षले शपथग्रहण गर्नुभएको छ । जिल्लाका नौ स्थानीय तहका नवनिर्वाचित प्रमुख तथा अध्यक्षहरुले पद तथा गोपनीयताको शपथ ग्रहण लिनुभएको हो ।जिल्लास्थित मुख्य निर्वाचन अधिकृतको कार्यालयमा शुक्रबार आयोजित कार्यक्रममा मुख्य निर्वाचन अधिकृत एवम् जिल्ला न्यायाधीश प्रकाश राउतले नवनिर्वाचित पदाधिकारीलाई पद तथा गोपनीयताको शपथ ग्रहण गराउनुभयो । जिल्लाको एकमात्र फुङ्लिङ नगरपालिकाका नवनिर्वाचित प्रमुख अमिर मादेन, मैवाखोला गाउँपालिकाका अध्यक्ष विजयप्रकाश वनेमले शपथग्रहण गर्नुभयो । यस्तै, पाथीभरा याङ्वरक गाउँपालिकाका नवनिर्वाचित अध्यक्ष केशरकुमार सुब्बा, आठराई त्रिवेणी गाउँपालिकाका अध्यक्ष दीपेन्द्र पोमु, मिक्वाखो गाउँपालिकाका अध्यक्ष भक्तबहादुर कार्कीले शपथ लिनुभयो । फक्ताङ्लुङ गाउँपालिकाका अध्यक्ष राजन लिम्बू (मुक्ति), सिदिङ्वा गाउँपालिकाका अध्यक्ष मानबहादुर राई, सिरिजङ्घा गाउँपालिकाका अध्यक्ष लालकृष्ण चौहानले र मेरिङ्देन गाउँपालिकाका अध्यक्ष युकहाङबीर (डम्बर) हाङ्गामले पद तथा गोपनीयताको शपथग्रहण गर्नुभयो । स्थानीय तहका नवनिर्वाचित प्रमुख तथा अध्यक्षले पद तथा गोपनीयताको शपथग्रहण गरेसँगै शुक्रबारदेखि आफ्नो पालिकामा पदभार ग्रहण गर्नुहुने भएको छ । फुङ्लिङ नगरपालिकाका प्रमुख मादेनले पदभार ग्रहणलगत्तै उपप्रमुख लगायतका नवनिर्वाचित जनप्रतिनिधिलाई शुक्रबार नै शपथग्रहण गराउने तयारी गर्नुभएको छ । बाँकी स्थानीय तहका अध्यक्षहरुको शनिबार शपथग्रहण गराउने बताउनुभयो । ताप्लेजुङमा फुङ्लिङ नगरपालिका, मिक्वाखोला गाउँपालिका, मेरिङ्देन गाउँपालिका र सिरिजङ्घा गाउँपालिकामा नेपाली काँग्रेस विजयी भएको छ । यस्तै पाथीभरा याङ्वरक गाउँपालिका, आठराई त्रिवेणी गाउँपालिका र सिदिङ्वा गाउँपालिकामा नेकपा (एमाले) विजयी भएको छ । मैवाखोला गाउँपालिका र फक्ताङ्लुङ गाउँपालिकामा माओवादी केन्द्रले विजयी हासिल गरेको छ ।
पेशागत महासङ्घ २८ औँ वर्षमा प्रवेश
गोरखापत्र अनलाइनकाठमाडौँ, जेठ ६ गते । औपचारिक र अनौपचारिक क्षेत्रमा क्रियाशील पेशाकर्मीहरुको छाता सङ्गठन नेपाल पेशागत महासङ्घ (कोनेप) स्थापनाको २८ औँ वर्षमा प्रवेश गरेको छ । महासङ्घको केन्द्रीय कार्यालय थापाथलीमा आज आयोजित अठ्ठाइसौँ स्थापना दिवस तथा शुभकामना आदानप्रदान कार्यक्रममा महासङ्घका संयोजक एवं नेकपा (एमाले) का केन्द्रीय सदस्य बाबुराम थापाले पेशागत मर्यादा, स्वाभिमान र सुरक्षाका लागि सङ्घर्षशील हुँदै ट्रेड युनियन अधिकार र बौद्धिक श्रमिकका हितका सवालमा बुलन्द आवाज उठाउनुपर्नेमा जोड दिनुभयो । महासङ्घका सल्लाहकार कुलबहादुर आचार्यले पेशागत हक, हित र सुरक्षाका सवालमा एकताबद्ध भएर लाग्न शुभकामना दिनुभयो । महासङ्घका सचिव डा.ऋषिकेश पन्थीका अनुसार महासङ्घमा हाल २९ आबद्ध घटक (राष्ट्रिय सङ्घ), ४३ प्रतिष्ठान कमिटी र छ लाख ३० हजार साधारण सदस्य छन् । महासङ्घमा निजामति कर्मचारी, शिक्षक, वित्तीय कर्मचारी, स्थानीय तह तथा स्वास्य क्षेत्रका कर्मचारी, विश्वविद्यालयका कर्मचारी, इञ्जिनीयरिङ पेशाकर्मी, सामुदायिक क्याम्पसका प्राध्यापक, सार्वजनिक संस्थाका कर्मचारीलगायत आबद्ध छन् ।ट्रेड युनियन अधिकार र हितको प्राप्ति तथा संरक्षण गर्दै पेशागत सङ्घ—सङ्गठनमा आवद्ध शक्तिलाई एकापसमा समायोजन तथा सबलीकरण गरी राष्ट्रको सेवामा समर्पित भई पेशागत दक्षता वृद्धिका लागि विसं. २०५२ जेठ ५ गते सो महासङ्घको स्थापना भएको थियो । शुरुमा पेशागत ऐक्यबद्धता मञ्च नेपालको नामबाट स्थापित सो संस्थाको २०५३ जेठ ४ र ५ गतेको राष्ट्रिय भेलाबाट महासङ्घमा परिणत भएको हो ।
खोलामा डुबेर एक जनाको मृत्यू
रेखीराम रानापाल्पा, जेठ ५ गते । तिनाउ खोलामा डुबेर एक जना पुरुषको मृत्यु भएको छ । बिहीबार दिउँशो ३ बजेतिर तिनाउ गाउँपालिका–३, स्थित तिनाउ खोलामा फोटो खिच्दै पौडी खेल्ने क्रममा डुबेर रुपन्देही जिल्ला सिद्धार्थनगर नगरपालिका–१० का ३६ वर्षीय कयम अलीको मृत्यु भएको हो । साथीहरूसँगै पौडी खेल्ने क्रममा अचानक खोलामा बेपत्ता भएका अलीलाई प्रहरीको सहायताबाट खोजतलास गरेर भेटिएपछि उपचारका लागि लुम्विनी प्रादेशिक अस्पताल बुटवलमा लगिएको थियो । अस्पतालका चिकित्सकले अलीको मृत्यु भएको घोषणा गरेको जिल्ला प्रहरी कार्यालय पाल्पाले जनाएको छ । घटनाको बारेमा थप अनुसन्धान कार्य भइरहेको जिल्ला प्रहरी कार्यालय पाल्पाका प्रहरी नायव उपरीक्षक वीरेन्द्र थापाले जानकारी दिनुभयो ।
रामधुनी नगरपालिकामा एमालेका उम्मेदवार विजयी
जयकृष्ण यादव इनरुवा, जेठ ५ गते । सनुसरीको रामधुनी नगरपालिकाको प्रमुखमा शंकरलाल चौधरी निर्वाचित हुनुभएको छ । स्थानीय तह निर्वाचनको मतपरिणामअनुसार एमालेका उम्मेदबार रामधुनी नगरपालिकाको प्रमुखमा शंकरलाल चौधरी र उपप्रमुख तारा थापा निर्वाचित हुनुभएको हो ।चौधरीले १३ हजार ७७२ मतसहित विजयी हुनुभयो । उहाँका निकटतम प्रतिस्पर्धी नेपाली काँग्रेसका सुदिप अधिकारीले ११ हजार ४३५ मत ल्याई पराजित हुनुभयो । उपप्रमुखमा एमालेकै थापाले १२ हजार १२८ मतसहित विजयी हुनुभयो । काँग्रेसका उम्मेदबारले १० हजार ४९३ मत ल्याई पराजीत हुनुभयो । रामधुनी नगरपालिकाको वडा नम्बर १, ५, ६ को वडा अध्यक्षमा काँग्रेस र वडा नम्बर २, ३, ७ र ८ को वडा अध्यक्षमा एमाले र वडा नम्बर ९ को वडा अध्यक्षमा नेकपा एसका उम्मेदबार चिर्वाचित हुनुभएको छ ।
सुरूङगा नगरपालिका प्रमुखमा चौधरी विजयी
ललिता साहवोदेवर्साइन (सप्तरी), जेठ ५ गते । सप्तरीमा पहिलोपटक नगरपालिका प्रमुखमा महिला उम्मेदवार विजयी हुनुभएको छ । स्थानीय तह निर्वाचन अन्तर्गत विहीवार आएको परिणामअनुसार सुरूङगा नगरपालिका प्रमुखमा नेपाली काँग्रेसकी गीता चौधरीले जित हात पार्नुभएको हो । चौधरी सात हजार दुई सय ९२ मत ल्याउँदा एकीकृत समाजवादीका रामनारायण चौधरीले चार हजार, एक सय १७ र जनता समाजवादीका साबीर अलीले तीन हजार छ सय ६८ मत मात्र ल्याउनुभयो । नगर उपप्रमुखमा नेकपा एमालेका सलीमकुमारी पासवान, माओवादी केन्द्रका शिवकुमार राम र एकीकृत समाजवादीका सुनिताकुमारी मुखियालाई हराउँदै कांग्रेसका रुद्रबहादुर कार्की निर्वाचित हुनुभयो । कार्कीले ६ हजार दुई सय ७५ मत ल्याउँदा एमालेकी पासवानले दुई हजार एक सय तीन, माओवादी केन्द्रका रामले दुई हजार चार सय ६७ र एकीकृत समाजवादीकी सुनीता कुमारी मुखियाले तीन हजार नौ सय ९८ मत ल्याउनुभयो । योसँगै सप्तरीको इतिहासमा पहिलो महिला प्रमुख चौधरी पहिलो बन्नुभएको छ ।
वीरेन्द्रनगरको प्रमुख र उपप्रमुख दुवैमा एमालेका उम्मेदवार विजयी
मुना हमालसुर्खेत, जेठ ५ गते । वीरेन्द्रनगर नगरपालिकाको प्रमुख र उपप्रमुख दुवैमा एमालेका उम्मेदवार विजयी हुनुभएको छ । नेपाली काँग्रेस र नेकपा माओवादी केन्द्रको गठबन्धनलाई हराउँदै एमालेका उम्मेदवार विजयी हुनुभएको हो । नगर प्रमुखमा एमालेका मोहनमाया ढकाल (भण्डारी) र उपप्रमुखमा निलकण्ठ खनाल विजयी हुनुभएको छ । प्रमुखमा ढकालले १६ हजार ३८ मत ल्याउँदा उहाँका निकटतम प्रतिद्वन्द्वी काँग्रेसका उपेन्द्रबहादुर खड्काले १५ हजार ४८४ मत ल्याएर पराजित हुनुभयो । मुख्य निर्वाचन अधिकृतको कार्यालयका अनुसार उपप्रमुखमा निलकण्ठ खनालले २० हजार ३६४ मत ल्याएर विजयी हुनुभयो । उहाँका निकटतम प्रतिद्वन्द्वी माओवादी केन्द्रकी शान्ति ढकालले ११ हजार ५३३ मत ल्याएर पराजित हुनुभयो । एमालेले यस पटक वीरेन्द्रनगरमा काँग्रेसको गढ भत्काउँदै विजयी हासिल गरेको छ । एमालेले अघिल्लो निर्वाचनमा प्रमुखमा हारेको थियो । प्रमुख ढकाल अघिल्लो निर्वाचनमा उपप्रमुखमा निर्वाचित हुनुभएको थियो । यसपटक उहाँलाई एमालेले प्रमुखको उम्मेदवार बनाएको थियो । यसपटक गठबन्धनलाई हराउँदै नगरको १६ वडामध्ये ११ वटा वडासहित प्रमुख र उपप्रमुखमा एमालेले जितेको छ । काँग्रेसले पाँच वटा वडा जितेको छ । मुख्य निर्वाचन अधिकृतको कार्यालयका अनुसार वडा नं २ मा एमालेबाट गजबहादुर बुढा, वडा ३ मा विनोदसिंह विष्ट, वडा नं ४ मा शेरबहादुर के सी, वडा नं ५ मा लोकवहादुर शाही विजयी हुनुभएको छ । यस्तै, एमालेबाट वडा नं ८ मा टीकाराम शर्मा, वडा नं ९ मा ऋषि गिरी, वडा नं १० मा डिलबहादुर रखाल, वडा नं ११ मा खिमलाल देवकोटा, वडा नं १२ मा चुडामणि चपाई, वडा नं १४ मा देवबहादुर रोकाय र वडा नं १६ मा डण्डबहादुर विश्वकर्मा विजयी हुनुभएको छ । सोहीअनुसार वडा नं १ मा काँग्रेसका दिनेश खत्री, वडा नं ६ मा जनकबहादुर रावल, वडा नं ७ मा ध्रुव कुमार चपाई, वडा नं १३ मा दीपेन्द्रराज कोइराला र वडा नं १५ मा कृष्णबहादुर थापा विजयी हुनुभएको छ ।
सिरानचोक गाउँपालिकाको अध्यक्षमा गुरुङ, उपाध्यक्षमा देवकोटा
नरेन्द्र ढकालगोरखा, जेठ ५ गते । सिरानचोक गाउँपालिकामा पुनः नेपाली कांगे्रस बिजयी भएको छ । अध्यक्षका उम्मेदवार ज्ञानेन्द्र गुरुङ ४ हजार ६३० मतका बिजयी बन्नुभएको हो । उहाँका निकतम् प्रतिस्पर्धी नेकपा माओवादी केन्द्रका नवराज पुडासैनीले ३ हजार ५३५ मत ल्याउनुभयो । पुडासैनीलाई १ हजार ९५ को फराकिलो मतान्तर हराउँदै गुरुङ बिजयी बन्नुभएको सिरानचोक गाउँपालिका निर्वाचन अधिकृत डोलनाथ न्यौपानेले जानकारी दिनुभयो । वडा २ थालाजुङका निवर्तमान वडाध्यक्ष रहनुभएका गुरुङ लोकप्रिय मत ल्याएर बिजयी बन्नुभयो । ४१ वर्षे युवा गुरुङ यसअघिका वडा अध्यक्षमध्येबाट अध्यक्ष, प्रमुखमा टिकट पाउने एकमात्र व्यक्ति हुनुहुन्छ । स्नात्तोतर गर्नु भएका उहाँ राम्रा योजनाकार समेत मानिनुहुन्छ । नेकपा (एमाले) बाट अध्यक्षका प्रत्यासी देबराज श्रेष्ठले १ हजार ५४५ मत ल्याउनु भएको छ । यसैगरी जनता समाजवादी पार्टीका चित्रबहादुर गुरुङले ४८६, राष्ट्रिय प्रजातन्त्र पार्टीका जयप्रकाश बगालेले १२८, मंगोल नेशनल अर्गनाइजेसनका यमबहादुर गुरुङ, ८९ र राष्ट्रिय नागरिक पार्टीका सन्तबहादुर बिश्वकर्माले १० मत पाउनुभयो । त्यसैगरी उपप्रमुखमा पनि कांग्रेसका उम्मेदवार रीता देबकोटा बिजयी हुनुभएको छ । ४ हजार १ सय ४ मत ल्याएर उहाँ बिजयी हुनुभयो । उहाँका निकटम् प्रतिस्पर्धी माओवादी केन्द्रकी उम्मेदवार पूर्णकुमारी ढकालले ३ हजार २ सय ४६ मत ल्याएर पराजित हुनुभयो । यसअघि पनि उपाध्यक्ष रहनु भएकी उहाँ दोस्रो कार्यकालका लागि निर्वाचित हुनभयो । एमालेकी शशिकला देवकोटाले १ हजार ८४४, जनता समाजवादी पार्टीकी शोभा सुनारले ६५२, मंगोल नेशनल अर्गनाइजेसनकी पञ्चमायाँ गुरुङले १७५, राष्ट्रिय प्रजातन्त्र पार्टीकी सीता पोखरेलले १४४ र राष्ट्रिय नागरिक पार्टीकी दिपमायाँ बिकले २५ मत ल्याउनुभयो । ८ वटा वडामा रहेको सिरानचोक गाउँपालिकामा वडा नं. १, २, ३, ४, ८ गरी ५ वटा वडामा कांग्रेस बिजयी भएको छ । वडा ५, ६, ७ मा माओवादी केन्द्रले जित हासिल गरेको निर्वाचन अधिकृतको कार्यालयले जनाएको छ ।
पाँचसय सत्तरी स्थानीय तहको परिणाम सार्वजनिक
गोरखापत्र अनलाइनकाठमाडौं, जेठ ५ गते । गत वैशाख ३० गते सम्पन्न स्थानीय तह सदस्य निर्वाचनको आजसम्म ५७० स्थानीय तहको निर्वाचन परिणाम आएको छ । निर्वाचन आयोगका प्रवक्ता तथा सहसचिव शालिग्राम शर्मा पौडेलले आज आयोगमा आयोजित नियमित पत्रकार सम्मेलनमा सो जानकारी गराउनुभएको हो ।प्रवक्ता पौडेलका अनुसार हालसम्म प्रमुखमा १७४, उपप्रमुखमा १७४, अध्यक्षमा ३९६, उपाध्यक्षमा ३९६, वडाध्यक्षमा ५ हजार ६५९, महिला सदस्यमा ५ हजार ६५३, दलित महिला सदस्य ५ हजार ५५६ र वडा सदस्यमा ११ हजार २९५ गरी कूल २९ हजार ३०३ जना उम्मेदवार निर्वाचित भइसकेका छन् । कुल ३५ हजार २२१ मध्ये अहिलेसम्म आएको परिणाम ८० प्रतिशत रहेको प्रवक्ता पौडेलले बताउनुभयो । देशभरका ७५३ पालिकामध्ये दाङको तुल्सीपुर उपमहानगरपालिका वडा १७ र कपिलवस्तुको महाराजगञ्ज नगरपालिकाबाहेक देशभरका सबै मतदान केन्द्रमा मतदान कार्य सञ्चालन भएको प्रवक्ता पौडेलले बताउनुभयो । स्थगन भएका स्थानमध्ये ५ स्थानमा जेठ १ गते, ७ स्थानमा जेठ २ गते, ८ स्थानमा जेठ ३ गते र १५ स्थानमा जेठ ४ गते मतदान कार्य सम्पन्न भइसकेको आयोगले जनाएको छ । यसैगरी अछामको साँफेबगरमा जेठ ६ गते पुनः मतदान हुने कार्यक्रम रहेको प्रवक्ता पौडेलले जानकारी गराउनुभयो । यस्तै, उदयपुरको त्रियुगा नगरपालिका वडा १२ र बाजुराको बुढीगंगा नगरपालिकाको सम्बन्धमा आयोगबाट निर्णय हुन बाँकी रहेको छ । जेठ ५ गतेलाई स्थानीय तहका जनप्रतिनिधिहरुको पदमा बहाल रहने अन्तिम मिति मानेर सो मितिसम्ममा वैशाख ३० मा सम्पन्न भएको मतदानको गणना कार्य सक्नेगरी निर्वाचन आयोगले सम्बन्धित निर्वाचन अधिकृतहरुलाई यसअघि नै आवश्यक निर्देशन दिइसकेको छ ।जेठ ५ गतेसम्ममा सम्पूर्ण स्थानीय तहमा मतगणना कार्य सम्पन्न हुन नसकेको हुँदा यथासक्य छिटो, बढीभन्दा बढी मत गणना टोली परिचालन गरी गणना कार्य सम्पन्न गर्न र गत वैशाख ३० गते मतदान स्थगित भई पुनः मतदान भएका मतदान केन्द्रको हकमा मतपेटिका प्राप्त भएको बढीमा ४ दिनभित्र मत गणना कार्य सम्पन्न हुने विश्वास आयोगले गरेको छ ।नेपालको संविधानको धारा २१५ उपधारा (४) मा गाउँसभाको निर्वाचनको अन्तिम परिणाम प्राप्त भएको मितिले पन्ध्र दिनभित्र गाउँसभाका सदस्यहरुले आफूमध्येबाट निर्वाचित गरेका चार जना महिला सदस्य र उपधारा (५) बमोजिमको योग्यता भएका दलित वा अल्पसंख्यक समुदायबाट गाउँसभाले निर्वाचित गरेका दुई जना सदस्य हुने व्यवस्था छ ।त्यस्तै, धारा २१६ को उपधारा (४) बमोजिम नगरसभाको निर्वाचनको अन्तिम परिणाम प्राप्त भएको पन्ध्र दिनभित्र नगरसभाका सदस्यहरुले आफूमध्येबाट निर्वाचित गरेका पाँच जना महिला सदस्य र उपधारा (५) बमोजिमको योग्यता भएका दलित वा अल्पसंङ्ख्यक समुदायबाट नगरसभाले निर्वाचित गरेका तीन जना सदस्य समेत नगर कार्यपालिकाको सदस्य हुने व्यवस्था रहेको भन्दै आयोगले स्मरण गराएको छ ।त्यसैगरी, निर्वाचित जनप्रतिनिधिहरुमध्ये गाउँपालिकाको अध्यक्ष, नगरपालिकाको प्रमुख र जिल्ला समन्वय समितिको प्रमुखले आफ्नो कार्यभार सम्हाल्नु अगावै निर्वाचित भएको सात दिनभित्र स्थानीय सरकार सञ्चालन ऐन, २०७४ ले तोकेको ढाँचामा सम्बन्धित जिल्ला न्यायाधीशसमक्ष पद तथा गोपनियताको शपथ लिनुपर्ने व्यवस्था छ ।सोहीअनुसार गाउँपालिकाको उपाध्यक्ष, नगरपालिकाको उपप्रमुख, वडाअध्यक्ष, गाउँ तथा नगरसभाका सदस्य र जिल्ला समन्वय समितिका उपप्रमुख र सदस्यले अध्यक्ष वा प्रमुखले शपथ लिएको सात दिनभित्र तोकिएको ढाँचामा पद तथा गोपनियताको शपथ लिनुपर्ने व्यवस्था रहेकाले सोहीअनुसार गर्न गराउन आयोगले सम्बन्धित सबैमा स्मरण गराएको छ । आयोगले निर्वाचन प्रक्रियामा स्थानीय तह निर्वाचन निर्देशिका, २०७८ तथा स्थानीय तह निर्वाचन (मतदान) निर्देशिका, २०७८ र स्थानीय तह निर्वाचन (मतगणना) निर्देशिका, २०७८ को व्यवस्थाको प्रतिकूल हुनेगरी कार्य गर्ने कर्मचारीको विवरण पठाउने मुख्य निर्वाचन अधिकृत तथा निर्वाचन अधिकृतलाई निर्देशन दिएको छ । त्यस्तै, आयोगले स्थानीय तह सदस्य निर्वाचनको सिलसिलामा देशका विभिन्न मतदानस्थलका मतदान केन्द्रमा भएका कानूनविपरीत गतिविधिमा संलग्नलाई कारवाही गर्न निर्देशन दिएको छ । त्यस्ता गतिविधिमा संलग्नलाई तत्काल पक्राउ गरी निर्वाचन (कसूर तथा सजाय) ऐन, २०७३ बमोजिम कारवाही गर्न नेपाल सरकार, गृह मन्त्रालयमार्फत ७७ जिल्लाका सबै जिल्ला प्रहरी कार्यालयलाई निर्देशन दिने र सोको जानकारी प्रहरी प्रधान कार्यालयलाई दिने आयोगले निर्णय गरेको प्रवक्ता पौडेलले बताउनुभयो ।
कपिलवस्तुको यशोधरा गाउँपालिकामा एमालेका उम्मेदवार विजयी
नारद कोहारतौलिहवा, जेठ ५ गते । कपिलवस्तुको यशोधरा गाउँपालिकाको अध्यक्षमा नेकपा (एमाले) का उम्मेदवार शिवदायल तिवारी निर्वाचित हुनुभएको छ । तिवारीले नेपाली काँग्रेसका उम्मेदवार अनुपकुमार पाण्डेयलाई १ हजार २६२ मतले पछि पार्दै अध्यक्षमा विजयी हुनुभएको हो । विजयी तिवारीले ४ हजार ४ सय ६२ मत प्राप्त गर्दा उहाँका निकटतम प्रतिस्पर्धी काँग्रेसका पाण्डेयले ३ हजार २ सय मत प्राप्त गर्नुभयो । त्यस्तै, गाउँपालिकाको उपाध्यक्षमा एमालेकै गुन्जादेवी मौर्या निर्वाचित हुनुभएको छ । मौर्याले काँग्रेस उम्मेदवार बिन्द्रावती यादवलाई ८ सय ८ मतले हराउँदै विजयी हुनुभएको हो । उपाध्यक्षमा निर्वाचित मौर्याले ४ हजार ४५ मत ल्याउनुभयो । उहाँका निकटतम प्रतिस्पर्धी कांग्रेसकी यादवले ३ हजार २३७ मत प्राप्त गर्नुभयो । एमालेले गाउँपालिका अध्यक्ष र उपाध्यक्षसहित वडा नं. १, २ र ८ गरी तीनवटा वडा जितेको छ । त्यस्तै कांग्रेसले वडा नं. ३ र ७ गरी दुर्ई वटा वडा, जनता समाजवादीले एक, जनमत पार्टीले एक र स्वतन्त्र उम्मेदवारले एक वडाध्यक्ष जितेका छन् । गाउँपालिकामा आठ वटा वडा छ । २०७४ को निर्वाचनमा यशोधरा गाउँपालिका काँग्रेसले जितेको थियो ।
स्याङ्जाको नगरमा काँग्रेस, गाउँमा एमालेको दबदबा
स्थानीय तह निर्वाचन २०७९ मा स्याङ्जामा रहेका सबै ११ वटा स्थानीय तहको नतिजा सार्वजनिक भएको छ । पाँच नगरपालिका र ६ गाउँपालिकामध्ये चार नगरपालिका र एक गाउँपालिकामा नेपाली काँग्रेस तथा एक नगरपालिका र पाँच गाउँपालिकामा नेकपा (एमाले) का उम्मेदवार विजयी भएका छन् ।
गुल्मीमा काँग्रेस ५, माओवादी ४ र एमालेलाई ३ प्रमुख
तिलाचन पाण्डेतम्घास, जेठ ५ गते । वैशाख ३० गते सम्पन्न स्थानीय तहको निर्वाचनबाट गुल्मीका २ स्थानीय तहमा पुरानै अनुहार निर्वाचित हुनुभएको छ । जिल्लाको धुर्कोट गाउँपालिका र कालीगण्डकी गाउँपालिकाका अध्यक्षहरु पुनःनिर्वाचित हुनुभएको हो । धुर्कोट गाउँपालिकामा नेकपा (माओवादी केन्द्र) का भुपाल पोखरेल र कालीगण्डकी गाउँपालिकामा नेपाली कांग्रेसका बेदबहादुर थापा दोस्रो कार्यकालका लागि निर्वाचित हुनुभएको छ । पोखरेलले काँग्रेसका महेन्द्र भण्डारीलाई एक हजार ८२८ मतले पराजित गर्नुभएको हो । थापाले नेकपा (एमाले) का रामजी ढकाललाई १३३ मतले पराजित गर्नुभयो । यस्तै, जिल्लाको मदाने गाउँपालिकामा एमालेकी सरीता खड्का पुनः उपाध्यक्ष पदमा निर्वाचित हुनुभएको छ । उहाँले माओवादी केन्द्रका बेगम चन्दलाई पराजित गर्दै दोस्रो कार्यकालका लागि निर्वाचित हुनुभएको हो । खडकाले चन्दलाई ३५६ मतले पराजित गर्नुभयो । गुल्मीको १२ स्थानीय तहमध्ये ५ स्थानीय तहमा काँग्रेस, ४ तहमा माओवादी केन्द्र र ३ स्थानीय तहमा एमालेले प्रमुख पदमा विजयी हासिल गरेको छ ।
