यो कुरा गर्दै नगर्नोस् बुझ्नो भो ? समय खराब छ
कस्सैको भर नपर्नोस् बुझ्नो भो ? समय खराब छ ।
चेपागाँडाहरू ठुलै विद्वान् भएर देखा परिरहेका छन्
त्यस्ताका लागि नमर्नोस् बुझ्नो भो ? समय खराब छ ।
परेवाको भेषमा आउनेजाने गर्छन् हुचिलहरू यता
अब कनिका नछर्नोस् बुझ्नो भो ? समय खराब छ ।
बल्लबल्ल दुःखले कमाउनु भो त्यत्रो नाम र इज्जत
माथिबाट झर्दै नझर्नोस् बुझ्नो भो ? समय खराब छ
कहिले कता कहिले कता धेरै कष्ट पाउनु भो यहाँले
त्यसरी आइन्दा नचर्नोस् बुझ्नो भो ? समय खराब छ ।
