कीर्तिमानी क्रिकेटर ऐरीको बढुवा

काठमाडौँ, असोज १८ गते । चीनको हाङझाउमा भएको १९ औँ एसियाली खेलकुद प्रतियोगिताअन्तर्गत पुरुष क्रिकेटमा विश्व कीर्तिमान कायम गर्न सफल राष्ट्रिय क्रिकेट टोलीका अलराउन्डर दीपेन्द्रसिंह ऐरी सहायक हवल्दारमा बढुवा हुनुभएको छ । 

यही असोज १० गते भएको नेपाल र मङ्गोलियाबिचको खेलमा खेलाडी ऐरीले नौ बलमा अर्धशतक प्रहार गर्दै विश्व कीर्तिमान कायम गर्नुभएको थियो । उहाँले नौ बल खेल्दा आठ छक्का र एक बलमा दुई रन लिँदै नौ बलमै अर्धशतक पूरा गरेर कीर्तिमान बनाउनुभएको हो । 

यसअघि उक्त कीर्तिमान भारतीय खेलाडी युवराज सिंहको नाममा अङ्कित थियो । भारतीय खेलाडी सिंहले १२ बलमा अर्धशतक बनाउँदै कीर्तिमान कायम गर्नुभएको थियो । विश्व कीर्तिमान कायम गरेबापत नेपाल प्रहरीले उहाँलाई पदोन्नति दिएको नेपाल प्रहरीका प्रवक्ता प्रहरी नायब महानिरीक्षक कुवेर कडायतले बताउनुभयो । खेलाडी ऐरी २०७३ सालदेखि नेपाल पुलिसमा आबद्ध हुनुहुन्छ । यसअघि उहाँ प्रहरी जवान हुनुहुन्थ्यो । रासस