समाजको कुसंस्कार विस्तारै हट्दै : उपप्रधानमन्त्री खड्का

काठमाडौं, असोज १६ गते । उपप्रधान एवम् रक्षामन्त्री पूर्णबहादुर खड्काले श्रीमानको मृत्यु भएपछि आफ्नो जीवन खुशीले बाच्न पाउने महिलाको अधिकारलाई समाजले विस्तारै स्वीकारेको बताउनुभएको छ । मङ्गलबार ‘रातो टिकी’ गीत सार्वजनिक कार्यक्रमलाई सम्बोधन गर्नुहुँदै उहाँले यस्तो बताउनुभएको हो ।

रक्षामन्त्री खड्काले पूरा उमेर हुँदै आफ्नो पति गुमाउँदा बाँकी जीवनमा महिलाले पाउने दुःखका बारेमा भिडियोमा राम्रोसँग देखाइएको बताउनुभयो । उहाँले देशको पश्चिमी क्षेत्रमा अझै पनि संस्कार, संस्कृति, परम्पराका रुपमा यस्तो प्रचलन रहेको भन्दै समाजलाई बदल्न जरुरी रहेको जिकिर गर्नुभयो ।

‘‘एउटा महिला हाम्रो संस्कार, परम्पराले हामीले सदियौँदेखि स्वीकार्दै तर त्यसका प्रतिको प्रनिनिधिमूलक प्रतिवाद गर्दै समाजमा परिवर्तन पनि आउँदै गरेको छ । एउटा पूरा उमेर हुँदै आफ्नो पति गुमाउँदा बाँकी जीवन ती महिलाको उमेर भएको, आफ्नो जीवन आफ्नो खुशीले बाच्न पाउने हक, आफ्नो जीवन अन्य महिलाहरुको जस्तै गरी बाच्न पाउने हक हाम्रो संस्कार, संस्कृति, परम्परा, त्यसले विगतमा छेकबार लगाएको थियो ।,’’ रक्षामन्त्री खड्काले भन्नुभयो, ‘‘त्यसलाई तोड्न् परम्परा सुरु भएको छ । समाजले स्वीकारेर आउन थालेको छ । यसको समस्या पश्चिममा अझै छ । आफ्नो जीवन हुँदाहुँदै पनि मन मारेर आफ्नो जीवन बिताउनुपरेको छ । यो भिडियोले समाजलाई बदल्ने कुरा देखाएको छ ।’’

कार्यक्रममा बोल्नुहुँदै अभिनेता दीपकराज गिरीले गीत सामाजिक दायित्व बोकेको रहेको र कर्णाली र सुदूरपश्चिम प्रदेशमा शिक्षाको अभावका कारण जनचेतना कम पुगेको अवस्थामा गीतले थप सचेत बनाउने बताउनुभयो । त्यस्तैm अभिनेत्री दीपाश्री निरौलाले सामाजिक दायित्व बोकेर निस्किएको गीत धेरै नै राम्रो रहेको बताउनुभयो ।

उहाँले गीत सामाजिक विषयवस्तुमा रहेकाले सबैले मन पराउनेमा आशावादी रहेको बताउनुभयो ।