मोटरसाइकल दुर्घटनामा एककाे मृत्यु

अमरराज नहर्की

तनहुँ, असार ६ गते । तनहुँमा मोटरसाइकल दुर्घटना हुँदा एकको मृत्यु भएको छ भने एक जना घाइते भएका छन् । पृथ्वीराजीमार्गमा पर्ने आँबुखैरेनी गाउँपालिका –२ एक्लेफाँटमा भएको दुर्घटनामा लम्जुङ, सुन्दरबजार न.पा.–९ बस्ने ५८ वर्षीय चन्द्र ब. गुरुङको घटनास्थलमै मृत्यु भएको जिल्ला ट्राफिक प्रहरी कार्यालय तनहुँका प्रमुख राजीव विष्टले जानकारी दिनुभयो । 

मुस्लिनबाट लम्जुङ जाँदै गरेको ना ६ ख ३०१६ न. को ट्रकलाई बा ७० प ९४७४ न. को मोटरसाइकलले ओभरट्याक गर्न खोज्दा ट्रकसँग ठोक्किएपछि मोटरसाइकलमा सवार दुईमध्ये पछाडि सवारको घटनास्थलमा नै मृत्यु भएको हो । 

यस्तै, घाइते चालकलाई भने उपचारको लागी आबुँखैरेनी अस्पताल पठाइएको प्रमुख विष्टले जानकारी दिनुभयो । उहाँका अनुसार ५५ वर्षीय मोटरसाइकल चालक राजु गुरुङ आँबुखैरेनी गाउँपालिका –२ मार्कीचोक घर भई हाल काठमाडौँ बुढानीलकण्ठ नगरपालिका –३ बस्दै आएका छन् । 

गुरुङको शव भने पोष्टमार्टमको लागी दमौली अस्पतालमा ल्याइएको प्रहरीले जनाएको छ ।