कोहलपुरकी एक युवतीको नेपालगञ्जमा मृत्यु

सिराज खान 

नेपालगञ्ज, वैशाख २९ गते । कोहलपुरकी एक युवती नेपालगञ्जमा मृत अवस्थामा फेला परेको प्रहरीले जनाएको छ ।  जिल्ला प्रहरी कार्यालय बाँकेका अनुसार कोहलपुर नगरपालिका–६ रझेनाकी २२ वर्षीया सुमित्रा रानी थारु मृत अवस्थामा नेपालगञ्जमा फेला पर्नुभएको हो । 

नेपालगञ्ज उपमहानगरपालिका–९ श्रद्धानगरमा कोठा भाडामा लिएर बस्दै आउनु भएकी थारु शुक्रबार बिहान मृत अवस्थामा फेला परेको जिल्ला प्रहरी कार्यालय बाँकेका निमित्त प्रहरी प्रमुख डिएसपी रामप्रसाद घर्तीले जानकारी दिनुभयो । 

उहाँले मृत भेटिएकी युवतीको हत्या भएको आशंकामा प्रहरीले अनुसन्धान सुरु गरेको बताउँदै युवतीको छातीमा धारिलो हतियार प्रहार भएको देखिएको बताउनुभयो । 

सोही कारणले उनको मृत्यु रहस्यमय रहेको प्रहरीले जनाएको छ । 

निमित्त प्रहरी प्रमुख घर्तिमगरले सो घटनाबारे थप अनुसन्धान भइरहेको बताउनुभयो ।