काठमाडौं, फागुन २० गते । नेपाल महिला रेस्लिङ फाउन्डेसनको आयोजनामा अन्तर्राष्ट्रिय रेस्लिङ महाभिडन्त सोमबार हुने भएको छ । होलीको पावन अवसरमा हुन लागेको रेस्लिङ भक्तपुरको सल्ला घारीमा हुनेछ ।
रेस्लिङमा नेपालसहित अमेरिका, पाकिस्तान र भारत गरी चार राष्ट्रका रेस्लरको भिडन्त हुने आयोजक फाउन्डेसनकी अध्यक्ष भगवती खड्का (युनिका) ले जानकारी दिनुभयो ।
नेपालबाट भगवती खड्का, अस्मिता जुरेली, कुमार थापा (नेपाली ब्रो), हिक्मत थपलिया )स्कोरपियो), कृष्ण मगर (सिन्धुपाल्चोक टाइगर), मिस्टर यतिलगायतले प्रतिस्पर्धा गर्नुहुनेछ ।
भारतबाट अमित दलाल, दिव्या आले र अभिराज सिंह, पाकिस्तानबाट कोभु ब्रान्डम, मोहम्मद बिलाल खान, तलहल अलि खान, अफ्रीदी मुहम्मद उसाम खान र मुस्ताफा अलि खान तथा अमेरिकबाट रिकार्डेज भिल्लानुभा (सादिका) रिङमा उत्रनुहुनेछ । प्रतियोगितामा विभिन्न पाँच स्पर्धामा भिडन्त हुनेछ ।
२०७१ सालमा स्थापना भएको फाउन्डेसनले पहिलोपटक भक्तपुरमा अन्तर्राष्ट्रिय रेस्लिङ आयोजना गर्न लागेको अध्यक्ष भगवतीले बताउनुभयो । प्रतियोगितामा भरत विसुराल (हिमालयन टाइगर) ले निर्णायकको भूमिका निर्वाह गर्नुहुनेछ ।
