जानु पाण्डे
कपिलवस्तु, फागुन १५ गते । कपिलवस्तुको भृकुटी माध्यमिक विद्यालयले पढाइसँगै कृषि अभ्यासमा जोड दिएको छ । बुद्घभूमि नगरपालिका –४, बुड्ढीको सो विद्यालयले गत २०७३ देखि कृषिको अभ्याससँगै अध्यापन सुरु गरेको हो ।
विद्यालयले दुई विघा जग्गामा माछा र कृषि उत्पादनलाई आधुनिकीकरण गर्ने उद्देश्यले बालबालिकालाई अभ्यास गराएको विद्यालयका प्रधानाध्यापक बेदप्रकाश भुसालले बताउनुभयो । ती जग्गामा दाल बाली, नगदे बाली, तरकारी खेती, बेर्ना नर्सरी र हाइवेस्टिङलगायतको क्षेत्रमा विद्यार्थीलाई प्रयोगात्मक अभ्यास गराइएको छ ।
विद्यार्थी कृषि अध्ययनतर्फ आकर्षण बढ्दैगएको कृषिधारतर्फको संयोजक रमेश त्रिपाठीले बताउनुभयो । अध्ययनका लागि रुपन्देही, बाँके र बर्दियाका विद्यार्थी समेत आएका छन् । कक्षा ९ देखि १२ सम्म ११२ जना विद्यार्थी अध्ययनरत् छन् ।
विद्यालयमा आवासीय गृहको व्यवस्था भएपछि बाहिरी जिल्लाबाट अध्ययनका लागि आउनेगरेका छन् । जिल्लाको कनकमुनि मावि, अनिरुद्घ पब्लिक माविमा समेत प्राविधिक धारतर्फ बाली विज्ञानका कक्षा सञ्चालनमा रहेका छन् ।
