काठमाडौँ, माघ २५ गते । सल्यानको कालीमाटी गाउँपालिकामा सडक स्तरोन्नति गर्ने क्रममा रुख कटानी तथा बिक्रीवितरणमा अनियमितता गरेको आरोपमा अख्तियार दुरुपयोग अनुसन्धान आयोगले छ जनाविरुद्ध मुद्दा दायर गरेको छ । मुद्दा दायर गरिएकामा कालीमाटी सब–डिभिजन वन कार्यालयका फरेस्टर जयपृथ्वीराज बुढाथोकी, उक्त कार्यालयका सहायक वन अधिकृत मनोज शर्मा लम्साल, सामुदायिक वन उपभोक्ता समूह कालीमाटी वडा नं. ३ का अध्यक्ष, सचिव र कोषाध्यक्ष क्रमशः भीमबहादुर कुँवर, पुष्पा वली, खासु मगर र जुद्धकुमारी वली रहेको आयोगले जनाएको छ ।
काठको गोलियाको वास्तविक परिमाणभन्दा कम नाप लिएको आरोपमा दाङको बबई गाउँपालिकास्थित दुर्गा टे«डर्स एन्ड सप्लायर्सका सञ्चालक दुर्गाप्रसाद वलीविरुद्ध पनि मुद्दा दायर गरिएको आयोगले जारी गरेको विज्ञप्तिमा उल्लेख गरिएको छ । बुढाथोकीलाई दुई लाख ६८ हजार ५६१ रुपियाँ, लम्साललाई एक लाख रुपियाँ, कुँवर, वलीद्वय र मगरलाई जनही दुई लाख ६८ हजार ५६१ रुपियाँ तथा दुर्गा टे«डर्सका सञ्चालक वलीलाई एक लाख रुपियाँ बिगो तथा भ्रष्टाचार निवारण ऐनअनुसार कारबाहीको माग गरिएको छ ।
