काठमाडौं, पुस ८ गते । बिहीबार शपथ ग्रहण गर्न छुट्नुभएका चारमध्ये दुई जना प्रतिनिधिसभा सांसदले आज (शुक्रबार) पद तथा गोपनीयताको शपथ ग्रहण गर्नुभएको छ ।
सङ्घीय संसद् सचिवालयका सहायक प्रवक्ता एवम् सूचना अधिकारी दशरथ धमलाले नेकपा (माओवादी केन्द्र)का महिन्द्र राय यादव र रामकुमार राईले पद तथा गोपनीयताको शपथ ग्रहण गर्नुभएको जानकारी दिनुभयो ।
सांसद यादव र राईलाई प्रतिनिधिसभाका ज्येष्ठ सदस्य पशुपति शमशेर जबराले बिहान साढे ११ बजे शपथ ग्रहण गराउनुभएको सहायक प्रवक्ता धमलाले जानकारी दिनुभयो ।
यसैगरी, एकीकृत समाजवादीका प्रेमबहादुर आले र नेपाली कांग्रेसकी माया राई शपथ ग्रहण समारोहमा छुट्नुभएको थियो । सांसद आले पारिवारिक शोकमा हुनुुहुन्छ भने राई सुत्केरी भएकाले अस्पतालमा भर्ना हुनुभएको छ ।
संसद सचिवालयले उहाँहरुले आफ्नो अनुकूलतामा शपथ लिन सक्ने जनाएको छ ।
बिहीबार प्रतिनिधि सभाका २७० जना सांसदले संसद् भवन नयाँ बानेश्वरमा शपथ ग्रहण गर्नुभएको थियो ।
