अभिनय गर्दा रमाइलो भयो : गायक विक

काठमाडौँ, कात्तिक २२ गते । ‘उता हजुर मुसुक्कै, यता यो ज्यान भुसुक्कै’ गीतमार्फत चर्चामा आएका गायक कृष्ण विकको दोस्रो गीत सार्वजनिक भएको छ। सो गीत उहाँले गायिका समीक्षा अधिकारीसँग मिलेर गाउनुभएको छ। श्रीकृष्ण बम मल्लको शब्द रहेको गीतमा सङ्गीत र एरेन्ज स्वयं गायक कृष्णकै रहेको छ। संस्कृति, पर्यटन तथा नागरिक उड्डयनमन्त्री जीवनराम श्रेष्ठको प्रमुख आतिथ्य र अभिनेता राजेश हमालको विशिष्ट आतिथ्यतामा सोमबार गीतको भिडियो सार्वजनिक गरिएको हो।

मन्त्री श्रेष्ठले युवापुस्ताले नेपाली कला, संस्कृतिको उत्थानमा महत्त्वपूर्ण भूमिका खेल्नुपर्ने बताउनुभयो। अभिनेता राजेश हमालले भिडियो आकर्षक बनेको भन्दै गीतको तारिफ गर्नुभयो। “गीतको भिडियो निर्माणमा मेहनत गरिएको देखिन्छ। बिनासम्झौता प्रोजेक्टलाई स्तरीय बनाउनु हामी कलाकारका लागि झनै राम्रो हो,” अभिनेता हमालले भन्नुभयो। गायक कृष्णले गीतसङ्गीत स्तरीय बनाउने आफ्नो चाहना रहेको बताउनुभयो। “यो मेरो दोस्रो प्रयास हो। अडियो र भिडियो बलियो बनाउने कोसिस गरेको छु। गायनसँगै अभिनय गर्दा रमाइलो भयो,” गायक कृष्णले भन्नुभयो। मोडल अनु आचार्यले भिडियोमा गरिएको मेहनत पर्दामा देख्दा भुलेको बताउनुभयो। सो गीतमा स्वयं गायक कृष्णले अनु आचार्यसँग अभिनय गर्नुभएको छ। 

गीतमा सन्तु तामाङको मेकअप, सरस्वती श्रेष्ठको हेयर, बोनिका कार्की एन्ड रीत खड्काको कस्ट्युम डिजाइन, मनोज श्रेष्ठको भीएफएक्स, रेनिश फागोको रङ संयोजन, कविराज गहतराजको नृत्य निर्देशन, सञ्जय लामाको छायाङ्कन, बनिश शाहको सम्पादन र जीबी आग्रीको निर्देशन रहेको छ। सार्वजनिक गीत ‘नेपाल’ नामक युट्युब च्यानलमा उपलब्ध छ।