राजु लामिछाने
रुकुमपश्चिम, असोज ६ गते । रुकुमपश्चिमका विभिन्न स्थानमा यात्रु सहायता कक्ष स्थापना गरिएको छ । चाडपर्वको समयमा यात्रुलाई हुने समस्या कम गर्न जिल्ला ट्राफिक कार्यालय रुकुम पश्चिमले विभिन्न १० स्थानमा यात्रु सहायता कक्ष स्थापना गरेको जनाएको छ ।
जिल्ला प्रहरी कार्यालयसँगको सहकार्यमा यात्रुहरुको चाप बढी हुने स्थानमा सहायता कक्ष स्थापना गरिएको जिल्ला ट्राफिक प्रहरी कार्यालयका प्रमुख प्रहरी सहायक निरीक्षक शैलेन्द्र कुमार मल्लले जानकारी दिनुभयो । उहाँका अनुसार मुसिकोट नगरपालिकाको खलङगा, सेरीगाउँ, शीतलपोखरी, साँख, छिनखेत र सोलाबाङ, सानीभेरी गाउँपालिकाको सिम्ली, चौरजहारी नगरपालिकाको बसपार्क, आठबिसकोट नगरपालिकाको राडी र त्रिवेणी गाउँपालिकाको झुल्नेटामा चाडवाडलक्षित यात्रु सहायता कक्ष स्थापना गरिएको हो ।
ट्राफिक कार्यालय प्रमुख मल्लले जिल्लाभित्र चल्ने सवारी साधन र बाहिरबाट भित्रिने सवारी साधनमा यात्रुलाई पर्ने समस्या समाधानका लागि सहायता कक्षको स्थापना गरिएको बतानुभयो । उहाँका अनुसार चाडपर्वको बेलामा यात्रुहरुले विभिन्न सास्ती पाउन सक्ने भन्दै यातायातका साधनको सबैभन्दा बढी जमघट हुने स्थानमा सहायता कक्ष स्थापना गरिएको हो ।
चाडबाडको समयमा यातायातका साधनमा दोहोरो टिकट काटेर यात्रुले दुःख पाउने, भाडाका कारण यात्रु ठगिने, यात्रुहरुको सामान हराउने, सवारीमा क्षमताभन्दा बढी यात्रु राख्दा दुर्घटनाको जोखिम हुने लगायतका समस्या कम गराउन सहायता कक्ष स्थापना गरिएको मल्लले जनाउनुभयो ।
सहायता कक्षबाट यात्रुहरुको गुनासोको सुनुवाई समेत गरिनेछ । जिल्ला प्रहरी कार्यालय वा जिल्ला ट्राफिक प्रहरी कार्यालयमा फोन गरेर वा ड्युटीमा रहेका प्रहरीलाई भेटेर यात्राको बारेमा गुनासो गर्न सकिने छ । यसका साथै यात्रु सहायता कक्षबाटै यात्रुका समस्या समाधानको प्रयास गरिने प्रहरीको भनाइ छ ।
प्रहरीले राप्ती राजमार्ग, मध्यपहाडी राजमार्ग, भेरीकरीडोर लगायत ग्रामिण सडकमा चल्ने सवारी साधनको निगरानी र अनुगमन समेत बढाएको जनाएको छ । रुकुम पश्चिमबाट रुकुम पूर्व हुँदै काठमाडौँ, सल्यान हुँदै दाङ, नेपालगञ्ज, सुर्खेत लगायतका शहरमा सिधै गाडीहरु आउजाउ गर्ने सुविधा रहेको छ ।
