प्रहरी र वडा कार्यालय बनाउन जग्गा दान

साजन परियार

पर्वत, चैत २१ गते । इलाका प्रहरी कार्यालय र वडा कार्यालय भवन निर्माण गर्न स्थानीयले चन्दा सङ्कलन गरेर जग्गा खरिद गरेका छन् । फलेवास नगरपालिका–५ खानीगाउँका स्थानीयवासीले गच्छे अनुसार चन्दा सङ्कलन गरेर ८ रोपनी ६ आना २ पैसाको जग्गा खरिद गरेका हुन् । 

स्थानीयवासीले इलाका प्रहरी कार्यालयको भवन निर्माणका लागि पाँच रोपनी ३ आना २ पैसाको जग्गा खरिद गरेका छन् भने वडा कार्यालय निर्माणका लागि ३ रोपनी ३ आना जग्गा खरिद गरेको अभियानकर्ता भोलानाथ शर्मा लम्सालले जानकारी दिनुभयो । जग्गा खरिदका लागि स्थानीयले ३३ लाख ५० हजार रकम चन्दा स्वरूप सङ्कलन गरेका थिए । उक्त रकमबाट जग्गा खरिद गरिएको हो । 

अभियानकर्ता लम्सालका अनुसार स्थानीयवासीले २ हजारदेखी ३ लाखसम्म चन्दा सहयोग गरेका छन् । भवन निर्माणका लागि निःशुल्क र उपयुक्त जग्गा नपाएपछि स्थानीयले चन्दा सङ्कलन गरेर जग्गा खरिद गरेका लम्सालले बताउनुभयो । जिल्ला सदरमुकाम कुश्मा बजार सँगै जोडिएको फलेवास नगरपालिका जिल्लाको दोस्रो व्यापारिक केन्द्र हो । समथर भू–भागसँगै बजारीकरणको सम्भावना बढेकाले शान्ति सुरक्षा व्यवस्थापनका लागि इलाका प्रहरी कार्यालय अनिवार्य रहेको लम्सालको भनाइ छ । 

खरिद गरिएको जग्गाको लालपुर्जा जिल्ला प्रहरी कार्यालय पर्वतका प्रहरी नायब उपरीक्षक रबिन भट्ट र खानीगाउँका वडाध्यक्ष नारायणप्रसाद लामिछानेलाई हस्तान्तरण गरिएको छ । जग्गा प्राप्तिपछि प्रहरी नायब उपरीक्षक भट्टले इलाका प्रहरी कार्यालयको भवन निर्माणका लागि तत्काल काम थालिने बताउनुभयो । इलाका प्रहरी कार्यालयको भवन निर्माणले जिल्लाको शान्ति सुरक्षासँगै प्रहरीको कार्यसम्पादन सहज र अपराध अनुसन्धानमा थप सहयोग पुग्ने उहाँको विश्वास छ ।

वडाध्यक्ष लामिछानेले सार्वजानिक हितका लागि वडावासीले देखाएको चासोले उत्साहित भएको बताउनुभयो । "अब वडा कार्यालय भवन निर्माणका लागि तत्काल प्रकिया अगाडि बढाइने छ", उहाँले भन्नुभयो, "हाल सिँचाइको भवनमा सञ्चालित उक्त भवन साँधुरो र जिर्ण भएकाले सेवा प्रवाहमा समस्या भइरहेको छ ।"