गोरखापत्र समाचारदाता
काठमाडौँ, माघ १७ गते । साहित्यकार इन्द्रबहादुर राईको ऐतिहासिक कथामा आधारित चलचित्र ‘जार’ को औपचारिक रूपमा प्रदर्शनको मिति घोषणा गरिएको छ । निर्माण ब्यानर फेरि टेल पिक्चर्सले पोस्टर सार्वजनिक गर्दै ‘जार’ लाई आगामी वैशाख २६ ( मे ९) मा प्रदर्शनमा ल्याउने जानकारी गराएको हो ।
चलचित्र प्रदर्शनका लागि नेपालभित्र एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले वितरण अधिकार खरिद गरेको छ भने अन्तर्राष्ट्रिय वितरकका रूपमा सेभेन सिज सिनेमा अनुबन्ध भएको छ । यसै साता वितरण कम्पनीसँग सम्झौतापछि निर्माण टिमले आधिकारिक प्रदर्शन मिति तय गरेको हो ।
सार्वजनिक पोस्टरमा प्रमुख तीन पात्रको चारित्रिक रूपलाई देखाइएको छ । चलचित्रको शीर्ष भूमिकामा अभिनेताद्वय सौगात मल्ल, अनुपविक्रम शाही र भारतीय राष्ट्रिय चलचित्र पुरस्कार विजेता अभिनेतृ गीताञ्जली थापा हुनुहुन्छ । फुर्वा छिरिङ लामाको निर्देशनमा तयार भएको चलचित्रको सम्पूर्ण छायाङ्कन भारतको सिक्किममा गरिएको छ ।
