काठमाडौँ, माघ १७ गते । फागुन २ गते प्रदर्शन हुने नेपाली चलचित्र ‘दुःखी आत्मा’ को पहिलो गीत ‘जुनी जुनीभरिलाई’ सार्वजनिक भएको छ । केतन क्षेत्री र मुना ठटालको आवाजमा रहेको यो गीत ईश्वर कार्कीको शब्द तथा सङ्गीतमा तयार भएको हो ।
भक्तपुर दरबार स्क्वायरमा छायाङ्कन गरिएको यो गीतको भिडियोमा नायक दयाहाङ राई र नायिका आँचल शर्माको रोमान्टिक जोडीलाई देख्न सकिन्छ । यसमा रामजी लामिछानेको नृत्य निर्देशन र आलोक शुक्लाको छायाङ्कन रहेको छ । पछिल्लो समय चलचित्रको टिजरमा जुनार शब्द निकै चर्चित भएको हुँदा यो गीतमा पनि जुनारको प्रयोग गरिएको छ । नृत्य निर्देशकले जुनारलाई रोचक ढङ्गले प्रस्तुत गर्नुभएको छ ।
दीपेन्द्र लामाको लेखन तथा निर्देशनमा बनेको चलचित्रले यौनमा कमजोर रहेको एक पुरुषको कथा भन्छ । रमाइलो शैलीमा गम्भीर विषयवस्तु उठान गरिएको चलचित्रमा दया र आँचलसँगै अनुपविक्रम शाही, बुद्धि तामाङलगायतका कलाकारको अभिनय छ । हिमाल कडरियाको लगानी रहेको चलचित्र क्लक वर्क क्रियसनको ब्यानरमा निर्माण गरिएको हो ।
